بساطة الشعب السوداني

[مزمل محمد وداعة الله]

نحن شعب بسيط جداً ابسط من ما يتصور الخيال ، شعب مسالم وكريم ، شعب يحتفظ بخصال اندثرت منذ الاف السنين واصبحت طي النسيان ولم يعد لها وجود سوى في بين صفحات كتب التاريخ ، والبساطة التي اعنيها هنا تشمل كل شي يتعلق بحياة المجتمع من عادات وتقاليد وتعامل واخلاقيات وخصال ، ولعل ما ساقني لكتابة هذا الموضوع الذي ارجو من ادارة المنتدى تثبيته لنقراء مداخلات الاعضاء واضافاتهم الى الموضوع وان يتحول من مجرد بوست عادي الى حلقة نقاش حول بساطة الانسان السوداني في الريف والمدينة ، ما ساقني لكتابة الموضوع صارحة هي جلسة في منزل عمنا العميد معاش من الجيش السوداني والنقيب بالجيش القطري حالياً عمنا علي مسار ، هذا الرجل موسوعة من التاريخ والذكريات عن كل بقاع السودان ، سجلنا له زيارة اسرية في منزله بمدينة خليفة الشمالية في الدوحة وكان في معيتنا والدى محمد وداعة الله وشقيقي المستشار فوزي والوالدة واسرة شقيقي ، وقد رحب بنا الرجل بكرم انسان السودان المضياف وجلسنا معه في صالونه العريض واخذنا نتجازب اطراف الحديث وقد دار محور النقاش عن مشروع الجزيرة العملاق وما آل اليه هذا الصرح الذي كنا شهوداً على آخر سنوات شبابه قبل ان يحال الى المعاش بحكم اننا من ابناء قرية بورتبيل في جنوب الجزيرة وعمنا علي مسار من ابناء منطقة كاب الجداد بشمال الجزيرة وبداء الوالد يروي سنوات البدايات الاولي للمشروع وكيف ان الانجليز قد شيدوا لنا نظاماً متكامل ولكننا وللاسف الشديد ضيعناه بايدينا ، حكى الوالد وبحكم عمله السابق في وزارة الري حيث تنقل في عدد كبير من قناطر وادارات مشاريع المياه بالجزيرة حتى انه يكاد يحفظ 80% من اسماء القناطر والترع بالمشروع وعمنا علي مسار يثني عليه ويتداخل معه في المواضيع والاخ فوزي ايضاً كان يتداخل من خلال معرفته الجيدة بالكثير عن مناطق وقرى المشروع .
اخذ العم علي مسار يروي لنا عن بساطة الشعب السوداني في حقبة الستينات من القرن الماضي وحتي آواخر السبعينات وكيف كان الانسان في القري يعيش علي ارضه يحلم فقط بما يجنيه من محصول وكيفية اصلاح ارضه والاهتمام بتربية الحيوانات التي تمده باحتياجاته من اللبن وغيره حيث ان الانسان في القرية لا يفكر في الذهاب الى المدينة الا في حالة المرض يذهب لمعاودة الطبيب فقط وهذا اليوم يكون يوم عيد للاطفال في المنزل لان الوالد سيجلب معه ( رغيف ) و(موز) يا اخونا في ابسط من كدا ، وهنا تدخلت بالسؤال معقولة ياحاج للدرجة دي فرد علي عمنا علي مسار والله يامزمل ياولدي نحنا كنا في الحلة لما نسمع صوت جدادة بنمرق نشوف الساكيها منو وطبعاً بكون واحد من الجيران ساكي الجدادة دا معناهو انو عندهم ضيف عزيز الحلة كلها تعرف انو الزول الساكي الجدادة دا جاهم ضيف ويبدوا يشاركوه في سك الجدادة والجدادة تنط في الراكوبة حقت حليمة يسكوها تطفر عند ناس البلة يسكوها وتنط في تكل ام الحسن بت الامام واخيراً ينجح واحد في القبض علي الهاربة الجدادة ويضبحوها ويشدوها دمعة الريحة تطق لحدي اخر الحلة عمك الحسين والطاهر يشم الريحة يسال الحرم بتو الليلة الجاه ضيف في الحلة دا منو ترد علية الحرم ( ديل ناس الخمجانة جاهم زميل ولدم في الجامعة ضوبحوا ليه ديك )
اها الجيران القراب قراب وقت الغداء العندو ملاح مفروكة بامية وكسرة فتريتة حمراء يشيلا وعلي ناس الخمجانة تلاقي تلاتة جيران جابو صوانيهم واخدوا مع الضيف في جو من الالفة والاريحية والناس قاعدة علي برش سعف في الارض والابريق الكبير مليان موية والشفع يغسلوا للكبار في ضل الديوان والاب يكورك يابخيت يا ولد لحقنا كسرة ، وبعد الغداء يجيبوا الشاي بالكفتيرة الكبيرة شاي بي النعناع تشم ريحتو من الكبري القدامي الله والله الايام دي انا عشتا جزء منها في بورتبيل ومعاي اخوي مدثر يذكر هذه الايام جيداً ، دا الانسان السوداني البسيط والله قيم ومعاني كتيرة بداءت تتلاشي من حياتنا
ارجع بيكم لعمنا علي مسار وقصتو عن بساطة الشعب السوداني قال لي انا سكنتا الخرطوم والوالد والوالدة في القرية في الجزيرة كنتا بمشي يوم الخميس عشان ازورم في الحلة ولما اصل محطة المسيد على طريق مدني الخرطوم بوقف سيارتي الخاصة في قسم الشرطة هناك وبمشي اركب المواصلات بتاعت الحلة ( بكاسي هايلوكس مسقوفة ) البوكس بياخد 12 راكب اركب مع ناس الحلة ( طبعاً دا تواضع منو لانو بحس انو لو وصل لدرجة رئيس جمهورية فهو في الاخر مزارع وولد مزارع من قرية تعبانة من قري الجزيرة ) سالتو لي بتركب مع ناس الحلة قال لي انا مجرد ما اركب بدفع حق البوكس كلو لجميع الركاب بحس بمتعة اني قدمتا حاجة لناس قريتي وما بركب قدام رغم انو بعض الناس لما يشوفوني بينزلوا لي من قدام ويحلفوا لال اركب انا قدام ولكن انا اصر انو اركب ورا واتونس مع الناس لحدي ما اصل الحلة ومن البوكس لحدي بيتنا اسلم على كل زول الاقيه وفي البيت البس العراقي والسروال واتغداء مع ناس البيت بملاح قرع اصفر وكسرة وسلطة خضراء والله كاني اكلتا في افخر مطعم في الخرطوم وبعدها كباية شاي تحبس بيها تمام التمام
غداً نواصل الرحلة الجميلة ......

[أم ريم]

نحن شعب بسيط جداً ابسط من ما يتصور الخيال ، شعب مسالم وكريم ، شعب يحتفظ بخصال اندثرت منذ الاف السنين واصبحت طي النسيان ولم يعد لها وجود سوى في بين صفحات كتب التاريخ ، والبساطة التي اعنيها هنا تشمل كل شي يتعلق بحياة المجتمع من عادات وتقاليد وتعامل واخلاقيات وخصال ، ولعل ما ساقني لكتابة هذا الموضوع الذي ارجو من ادارة المنتدى تثبيته لنقراء مداخلات الاعضاء واضافاتهم الى الموضوع وان يتحول من مجرد بوست عادي الى حلقة نقاش حول بساطة الانسان السوداني في الريف والمدينة ، ما ساقني لكتابة الموضوع صارحة هي جلسة في منزل عمنا العميد معاش من الجيش السوداني والنقيب بالجيش القطري حالياً عمنا علي مسار ، هذا الرجل موسوعة من التاريخ والذكريات عن كل بقاع السودان ، سجلنا له زيارة اسرية في منزله بمدينة خليفة الشمالية في الدوحة وكان في معيتنا والدى محمد وداعة الله وشقيقي المستشار فوزي والوالدة واسرة شقيقي ، وقد رحب بنا الرجل بكرم انسان السودان المضياف وجلسنا معه في صالونه العريض واخذنا نتجازب اطراف الحديث وقد دار محور النقاش عن مشروع الجزيرة العملاق وما آل اليه هذا الصرح الذي كنا شهوداً على آخر سنوات شبابه قبل ان يحال الى المعاش بحكم اننا من ابناء قرية بورتبيل في جنوب الجزيرة وعمنا علي مسار من ابناء منطقة كاب الجداد بشمال الجزيرة وبداء الوالد يروي سنوات البدايات الاولي للمشروع وكيف ان الانجليز قد شيدوا لنا نظاماً متكامل ولكننا وللاسف الشديد ضيعناه بايدينا ، حكى الوالد وبحكم عمله السابق في وزارة الري حيث تنقل في عدد كبير من قناطر وادارات مشاريع المياه بالجزيرة حتى انه يكاد يحفظ 80% من اسماء القناطر والترع بالمشروع وعمنا علي مسار يثني عليه ويتداخل معه في المواضيع والاخ فوزي ايضاً كان يتداخل من خلال معرفته الجيدة بالكثير عن مناطق وقرى المشروع .
اخذ العم علي مسار يروي لنا عن بساطة الشعب السوداني في حقبة الستينات من القرن الماضي وحتي آواخر السبعينات وكيف كان الانسان في القري يعيش علي ارضه يحلم فقط بما يجنيه من محصول وكيفية اصلاح ارضه والاهتمام بتربية الحيوانات التي تمده باحتياجاته من اللبن وغيره حيث ان الانسان في القرية لا يفكر في الذهاب الى المدينة الا في حالة المرض يذهب لمعاودة الطبيب فقط وهذا اليوم يكون يوم عيد للاطفال في المنزل لان الوالد سيجلب معه ( رغيف ) و(موز) يا اخونا في ابسط من كدا ، وهنا تدخلت بالسؤال معقولة ياحاج للدرجة دي فرد علي عمنا علي مسار والله يامزمل ياولدي نحنا كنا في الحلة لما نسمع صوت جدادة بنمرق نشوف الساكيها منو وطبعاً بكون واحد من الجيران ساكي الجدادة دا معناهو انو عندهم ضيف عزيز الحلة كلها تعرف انو الزول الساكي الجدادة دا جاهم ضيف ويبدوا يشاركوه في سك الجدادة والجدادة تنط في الراكوبة حقت حليمة يسكوها تطفر عند ناس البلة يسكوها وتنط في تكل ام الحسن بت الامام واخيراً ينجح واحد في القبض علي الهاربة الجدادة ويضبحوها ويشدوها دمعة الريحة تطق لحدي اخر الحلة عمك الحسين والطاهر يشم الريحة يسال الحرم بتو الليلة الجاه ضيف في الحلة دا منو ترد علية الحرم ( ديل ناس الخمجانة جاهم زميل ولدم في الجامعة ضوبحوا ليه ديك )
اها الجيران القراب قراب وقت الغداء العندو ملاح مفروكة بامية وكسرة فتريتة حمراء يشيلا وعلي ناس الخمجانة تلاقي تلاتة جيران جابو صوانيهم واخدوا مع الضيف في جو من الالفة والاريحية والناس قاعدة علي برش سعف في الارض والابريق الكبير مليان موية والشفع يغسلوا للكبار في ضل الديوان والاب يكورك يابخيت يا ولد لحقنا كسرة ، وبعد الغداء يجيبوا الشاي بالكفتيرة الكبيرة شاي بي النعناع تشم ريحتو من الكبري القدامي الله والله الايام دي انا عشتا جزء منها في بورتبيل ومعاي اخوي مدثر يذكر هذه الايام جيداً ، دا الانسان السوداني البسيط والله قيم ومعاني كتيرة بداءت تتلاشي من حياتنا
ارجع بيكم لعمنا علي مسار وقصتو عن بساطة الشعب السوداني قال لي انا سكنتا الخرطوم والوالد والوالدة في القرية في الجزيرة كنتا بمشي يوم الخميس عشان ازورم في الحلة ولما اصل محطة المسيد على طريق مدني الخرطوم بوقف سيارتي الخاصة في قسم الشرطة هناك وبمشي اركب المواصلات بتاعت الحلة ( بكاسي هايلوكس مسقوفة ) البوكس بياخد 12 راكب اركب مع ناس الحلة ( طبعاً دا تواضع منو لانو بحس انو لو وصل لدرجة رئيس جمهورية فهو في الاخر مزارع وولد مزارع من قرية تعبانة من قري الجزيرة ) سالتو لي بتركب مع ناس الحلة قال لي انا مجرد ما اركب بدفع حق البوكس كلو لجميع الركاب بحس بمتعة اني قدمتا حاجة لناس قريتي وما بركب قدام رغم انو بعض الناس لما يشوفوني بينزلوا لي من قدام ويحلفوا لال اركب انا قدام ولكن انا اصر انو اركب ورا واتونس مع الناس لحدي ما اصل الحلة ومن البوكس لحدي بيتنا اسلم على كل زول الاقيه وفي البيت البس العراقي والسروال واتغداء مع ناس البيت بملاح قرع اصفر وكسرة وسلطة خضراء والله كاني اكلتا في افخر مطعم في الخرطوم وبعدها كباية شاي تحبس بيها تمام التمام
غداً نواصل الرحلة الجميلة ......

دة كان اجمل زمن واحل ناس في الدنيا
شكر يا مزمل علي الذكريات الجميلة

[تهانى]

أخي مزمل .. لك التحيه
واشكرك على هذا الطرح الرائع ، ولقد استمتعت كثيرا بهذا الموضوع الذي اثري المنتدى بكل جمالياته واصالته ونحن فعلا في حوجه لمثل هذه المواضيع التي تفتح لنا آفاق للحوار الجاد والابداع ، وكلي اسف على ما هو كل جميل اندثر واصبح حكاوي وصرنا نقف ونبكي على الاطلال .
اننا في انتظار البقيه ، ولي عوده .
مع خالص التقدير والاحترام .

[بورتبيل]

يا اخي واصل القصة وخلينا من نظرياتك دي ..!!

واصل كلام العميد وخلينا نشوف الناس دي قالت شنو .. في الجلسة الرائعة دي.

[مزمل محمد وداعة الله]

نواصل جلسة صالون عمنا علي مسار..
بداء عمنا علي يلعن الغربة الخلتنا نفارق الاهل والاحباب ونجي نكوس الرزق في بلد غريبة عننا في كل الا الدين واللغة وديل زاتم بدوا يتلاشوا في ظل عصر العولمة والنفتاح والمدارس الاجنبية وهلم جرا، ثقافة غير ثقافتنا واخلاق غير اخلاقنا السودانية الجميلة وتربية غير تربية حبوباتنا القديمة الحلوة والله لما كان عمنا علي والوالد بيحكو وانا بتابع لمحتا في عيونم دموع حزينة صورت لي ماضي انا ما عشتو بل عشت آخر فصولو القليلة وغصباً عنهم والله دمعتم جرت لما اذكروا حقبة الستينات بعد الاستقلال وحكم العمد النظار وكيف كانت الايام ديك فيها تسامح وعفوية ورخاء وخير ، وطوالي عمنا علي مسار ربط الموضوع بتاع الحياة في الزمن داك بالحياة العشناها في بلاد الخليج وهنا اخد الموضوع منحى تاني شداني اكتر من الاول وهو المقارنة بما كان موجود عندنا من عشرات السنين وما استحدث حديثاً في هذه البلاد واطلق عليه العولمة والرقي والحضارة والمدنية :
الحديث هنا لعمنا علي مسار
انت عارف يا مزمل ياولدي انا اقول ليك حاجة عجيبة ما حا تصدقا شوفتا صناديق القمامة المختوتة برا الشارع دي ( صناديق بلاستيك خضراء لها عجلتان لجمع القمامة من المنازل تابعة للبلدية ) اها الصناديق دي من زمن الانجليز موجودة عندنا في السودان ومختوتة قدام البيوت في القرى خلي المدن في القري يشهد الله وبيجوا ناس المجلس الريفي بالتركتر كل يومين عشان يشيلوا الوسخ ويحرقوه بعيد تقول لي عولمة وصحة بيئة قاموا فيها جديد يا ولدي نحن كنا سادات العرب والعجم لكن للاسف ودرنا حقنا برانا .
يا اخي خليك من دا كلو الكلام هنا للاخ فوزي
انتا عارف لما دخل التلفون في مشروع الجزيرة كان نص العالم ما سمع بالتلفون ، التلفونات كانت مربوطة بشبكة دقيقة جداً على امتداد المشروع والقناطر والادارات وعندها ناس مسوليين منها الادارة بتاعتم في بركات ويتواصلوا مع كل القري والاقسام في المشروع بالتلفون وحتى المواطنيين كان بيقدموا ليهم خدمة نقل الاخبار بين القرى بالتلفون مثال فلان ساكن في قرية بورتبيل وعندو عمو اتوفى في كاب الجداد يتصلوا على اقرب قنطرة لبورتبيل ( كيلو 12 بورتبيل ) من اقرب قنطرة لكاب الجداد ويقولوا ليهم بلغوا فلان وفي يومو يكون موجود في العزاء الكلام دا حصل ولسة نص العالم ما بيعرف يعني شنو تلفون ،،، الله ياريتا تعوووود الايام دي
الذكريات الجميلة عن انسان السودان متواصلة من داخل صالون عمنا علي مسار ، ودارت دفة النقاش حول الحكمة الكان بيتمتع بيها جدودنا في الزمن داك وهنا حكى لينا عمنا علي مسار قصة حقيقية عاشها هو شخصياً في قريتو
قال لينا انو في الزمن داك كان في حاجة اسمها الكتاب ( بداية المراحل الدراسية للصغار ) بيتعلموا فيها القران والكتابة والتجويد والحديث وبعدها المرحلة التانية ثلاثة سنوات اها المرحلة التانية دي ما كانت موجودة في قريتم فقط في قرية قريبة منهم وكان فيها عمدة المنطقة البتربطوا علاقة صداقة قوية بوالد عمنا علي رحمة الله عليه فوالدو وداهو للعمدة عشان يقعد معاهو للدراسة

[مزمل محمد وداعة الله]

مشى عمنا علي وسكن في بيد العمدة حمد وعاش وسط اولادوا كانه واحد منهم والعمدة حمد كا بيحبو جداً لدرجة انو بمجرد ما يخلص المدرسة يجي يقعد معاهو في الديوان يسمع مشاكل الناس ويشوف طريقة حلها من العمدة حمد ودا كما قال عمنا علي السبب الخلاه يخش الكلية الحربية بعد داك ، العمدة حمد كان عندو ابن اختو اسمو الزبير افندي وافندي لقب كان بيطلقوه على المتعلمين في الزمن داك الزبير افندي كان طالب في كلية علوم الغابات في جامعة الخرطوم واتخرج بدرجة عالية وكان اول الدفعة ، اها قاموا عينوه مسؤول عن الغابات في مشروع الجزيرة لمنطقة شمال ووسط الجزيرة وادوهو عربية فخمة وطبعاً كان بيلبس اجمل لبس خاصة البرنيطة والهي طاقية الانجليز ويشيل عصا خيزران صغيرة حاجة زي الصولجان كدا ويمر على الغابات والمشاريع في المنطقة ، المهم الزبير افندي دا لما فكر اتزوج فكر يتزوج بنت خالو العمدة حمد واسمها ( فاطمة ) وكلم ابوه واعمامو وتلملموا كلهم وجو عند ديوان العمدة حمد الرحب بيهم وكان معاهو اولادو وعمنا علي مسار شاهد الرواية هنا عمنا عرج بينا شوية قال لما شفنا الزبير افندي ونحن الوقت داك لسه طلبة كل واحد مننا بداء يفكر ويتمني يخلص الدراسة عشان يبقي زي الزبير افندي ويلبس البرنيطة والبنطلون اللحدي الوقت داك عمنا علي ما بيعرف بلبسوه كيف ، وكمان يشيك قلم حبر سائل كدا قمت الشياكة والمتعة ( يا خوانا في بساطة اكتر من كدا ) والعربية الفارهة وسرح عمنا علي في حلم بعيد وهو صاحي واولاد العمدة سرحو زيو ، قطع عليهم حلمهم صوت والد الزبير افندي ( والله يا حضرة العمدة حمد ولدك الزبير طبعاً ربنا كرمو واشتغل الحمد لله وفكر اتزوج ويعمل ليه بيت ، اها هو قال ما بيلقى احسن من خالو وبنات خالو يشرفنو ، وفي شان كدي هو بدور فاطمة بتك ياخدا ، اها شن قولك يا حمد اخوي )....
العمدة حمد كان صامت وفي وجه ابتسامة باهتة وراها في كلام كتتتيييييييير
العمدة: والله يا ابراهيم اخوي كلامك سمح بالحيل والزبير ياهو ولدي زي ماهو ولدك وفاطمة بتك زي ماهي بتي
لكن انا شائف الزبير ولدك اعلى من فاطمة ، فاطمة ما بتناسبو في شان الزبير متعلم وداير واحدة متعلمة متلو
الا الزي فاطمة بتي دي زولة مزارعية ساااااكت ، وبعدين اكان انا اديت فاطمة للزبير العندو القرش والوظيفة والعربية والسراية السمممممحة اها اخواتا الباقيات اجيب ليهن زبير تاني من وين ، يعني اكان جيت اعرس واحدة فيهن لمزراع من اولاد الحلة بتقول لي ليشنو فاطمة اخدت الزبير العندو وعندو وانا اخد ليكم السجمان دا ؟
انا في راي الزبير مرتو موجودة ( فلانة بت ( فلان ) وفلان دا واحد من ناس الحلة لكن سكن الخرطوم بدري في منطقة برس اللاماب ، اها انا سمعتا انها قرت الجامعة واتخرجت وهسي شغالة في التلغراف ( مصلحة البريد والبرق )
انا بشوف هي انسب من فاطمة بتي للزبير شان متعلمة وكدي !!!
الديوان كلو سكت وبداء يعاين للعمدة بنظرة دهشة وتقدير يعني معقولة راجل يرفض يزوج بتو لزول زي دا ويختار ليهو بت تانية ويرفس النعمة برجلوا ( ياخواننا والله دي قيم في الايثار وبعد النظر كبيرة جداً ما بتلقاه في الزمن دا درس من انسان ما بيعرف يكتب اسمو لكن قلبو كبير وعقلوا يوزن مليون من حملة الماجستير في الزمن دا .
ما قلتا ليكم نحنا شعب بسيط وجميل وفريد وخصالنا ما موجودة في العالم دا ؟
امتدت السهرة مع عمنا علي مسار الى ساعة متاخرة من الليل وحكاوي جميلة منو ومن الوالد الله يديهم العافية ، والله سرحو بينا في خيال واسع لايام ما عشناها واتمنينا نعيشا ونشوف روعة الزمن داك وجمال نفوس الرجال في الزمن الجميل والقيم الفاضلة الكانت بتميزنا عن شعوب العالم
ودعنا عمنا علي مسار موسوعة الذكريات الجميلة علي وعد ان يرد لنا الزيارة في منزل اخونا فوزي في وقت قريب .
وانا في السيارة في طريق العودة رجعتا شريط الكلام الحكوهو ابوي وعمنا علي مسار واخوي فوزي وهنا بس خطرت في ذاكرتي اغنية الشاعر العملاق الراحل اسماعيل حسن بلادي انا ، اهديها ليكم اقروها يمكن ترجع ليكم ذكريات جميلة وتنسيكم مرارة الزمن الغاشم السرق مننا اجمل لحظات عمرنا غصباً عننا....................... سنواصل في روعة الانسان السوداني

[مزمل محمد وداعة الله]

بلادي يابلادي اهلا يا بلادي

الف تحية ليكي من الفؤادي

بلادي بلادي اهلا يا بلادي

صدورنا حماية ليكي من الاعادي

بلادي انا بلاد ناسا مواريثم في اول شي كتاب الله

وخيل مشدود وسيف مسلول حداهو درع

تقاقيبن تسد الليل مع الحيران وشيخا في الخلاوي ورع

والله كم نخلاتا تهبهب في جروفا الساق

بقرة حلوبة تتضرع وليها ضرع

وساقية تصحي الليل مع الفجراوي

يبكي الليل ويدلق في جداولو دمع

يخدر في بلادي سلام

خدرة شاربة موية النيل

تزغرد في البوادي زرع

بلادي سهول بلادي حقول

بلادي الجنة للشافوها او للبرّة بيها سمع

بلاد ناسا تكرم الضيف

حتى الطير يجيها جعان ومن اطراف تكيها شبع

تشيل الناس وكل الناس وسع بي خيرو لينا يسع

وتدفق مياه النيل على الخيران

بياض الفضة في وهج الهجير بيشع

بلادي الصفقة والطنبور

داراتا تنح باليل

بنوتا تحاكي الخيل

تشابن زي جدي الريل

وشبالا مكنتل في الطريفو ودع

بلادي بلاد من التاريخ

من تيرهاقا لا عن ميسنا

حتى ان جاي خيرو تروع

بلادي امان بلادي حنان وناسا حُنان

يكفكفوا دمعة المفجوع

يحبوا الدار

يموتو عشان حقوق الجار

يخوضو النار عشان فد دمعة

كيف الحال لو شافوها سايلة دموع

ديل اهلي ديل اهلي

يبدو الغير علي زاتم

يقسموا اللقمة بيناتم

يدو الزاد حتى ان كان مصيرم جوع

ديل اهلي البقيف في الدارة وسط الدارة واتنبر كل الدنيا ديل اهلي

عرب ممزوجة بي دم الزنوج الحارة

ديل قبيلتي لمن ادور افصل ديل فصلي

اصحاب روحي والاحساس وسافر في بحار شوقم زمان عقلي

اقول بعضي الاقيهم تسربو في مسارب الروح

يقو كلي

محل قبلت القاهم معاي معاي زي ضلي

وكان ما جيت من زي ديل واسفاي وا ماساتي وا زّلي

تصور كيف يكون الحال لو ماكنت سوداني

واهل الحارة ما أهلي

[محمد السمانى]

كما قال سيف الدين الدسوقى : فى معدنهم اغلى من الذهب
السودانيون بسيطين والكلمة الحلوة بتفرحهم والكلام الجميل بيأسرهم ليس مولعين بحب الدنيا الفانية مثل بقية الشعوب الاخرى التى يمنع فيها الاخ اخيه من زيارته وليس لدينا بيوت مغلقة كما هى فى الخليج الان - حتى الجريمة عندنا بسيطة ليس منظمة لاننا اخذ من الصوفية الزهد والتواضع واصحبت جزء من تكوينا وتربيتنا
شكراً اخى مزمل على عذب الحكاوى

[مزمل محمد وداعة الله]

اها يا اهلنا نرجع لموضوع القيم والبساطة عند الشعب السوداني بعد ما نتوجه بالشكر لجميع الاخوان الاعضاء اللعملوا مداخلات ( اختنا ام ريم ، واختنا تهاني والشقيق الاكبر بورتبيل ، واخونا محمد السماني )
المرة دي انقلكم لتجربة انا عشتها شخصياً مع ناس بسطاء الى ابعد ما تتصور ديل اهلنا ناس الشرفة بركات هذه القرية الكبيرة جداً والراقدة على الضفة الشرقية للنيل الازرق قبالة قرية فداسي الحليماب والواقعة على ارض البطانة حيث توجد معدية ( مراكب ) بينها وقرية القريقريب .
صلتي باهل هذه القرية بداءت في عام 1995 حيث قبلت حينها للدراسة بجامعة امدرمان الاهلية وكنتا ساكن مع شقيقتي الكبيرة في منطقة السجانة بالخرطوم وبدور على سكن مع شباب طلبة في الجامعة ، وكان وكتها عندي شقيقة في الجامعة في السنة الاخيرة وعندها زميل من الشرفة اسمو ( معز الحاج ) الله يطراه بالخير هو الان في الرياض وهو من دلاني على السكن معاهم واللهم مجموعة من ابناء الشرفة مستاجرين منزل من غرفتين في منطقة بانت شرق جوار منزل المرحوم رجل البر والاحسان ابو عبيدة حجوج ، ومشيت معاهو عشان اتعرف على الشباب فتحنا باب الحوش واول زول شفتو اسمو قيصر محمد سعد قال لمعز وين يا ملح ( لقب معز ) ودا شنو العربي الجبتو معاك دا هاهاها ، انا استغربتا الزول دا بيعرفني من وين عشان اهظر معاي كدا ، معز ضحك وقال لي دي المناظر الفيلم لسة قدام دخلتا وسلمتا علي الشباب ( عمار الماحي ، رافع يوسف القمير ، يوسف عبد الله الطاهر ، عبد الإلاه عبد الله الطاهر ، عمار محمد نور ( من ودراوه ) الصادق صديق علي وقيصر محمد سعد ) هولاء كانوا الرفقة بالسكن الجديد اول من تحدث معاي الصادق وكان رجل ضخم ملي الجثة قال لي هوي يا عربي نحنا كلنا عرب ساااي ناس بهايم ما تشوف الجينز والاقمصة دي والله شبعنا في الويكاب والكسرة لمن قربنا نولع
والجماعة يضحكوا قام عمار الماحي قال لقيصر امسك العربي دا انديهو جلدة عشان يفك شوية من كشتو دي ( اخدتا علقة من الشباب عمري ما نساها وكانت ترحيب جميل من اخوان عزاز كسروا بيها حاجز الجمود الكان مسيطر علي وحسيت اني بعرف الناس دي من عشرة سنين شوفوا الناس بتدخل في بعض كيف وترحب بي كل واحد معاها دون اي ضغاين ولا حسد او كره .
من يوما بقيت الساكن رقم 10 في البيت واتضح انو ( رافع وقيصر ويوسف معاي في نفس الدفعة ونفس المدرج )
من هنا بداءت حكاية ارتباطي بالشرفة لانو كان كل اولاد الشرفة بيجوا عندنا في البيت ويقعدوا معانا ونسمع منهم عن حكاوي اهلنا في الشرفة لدرجة اني اتمنيت ازورها واقابل الناس السمعتا عنهم ، المهم دارت الايام والصداقة بينا امتدت الى ابعد مكان
وجاء عيد الاضحي فسافرنا الجزيرة للعيد وقبل السفر وجهوا لي دعوة لزيارة الشرفة في العيد لانو يوسف ( ود الشيخ ) عندو عرس خالو وقلتا ليهم انشاء الله ، كانت عندي رغبة ملحة ازور الشرفة من شدة ما سمعتا عن بساطة ناسا والالفة العايشين فيها
المهم جاء العيد وثالث يوم قررتا السفر الى الشرفة ركبتا من بورتبيل الى مدني ومن موقف الشرفة جنب الملجة ركبتا بص اوستن وانا بركب البص اتذكرتا انو قيصر قال لي البص دا بتاع عمو وصلتا الشرفة ونزلتا في السوق حسب الوصف الانا عارفو وحافظو انو بيت ناس معز جنب السوق والعلامة البارزة العامود رقم 166 ودا المكان البيجتمعوا فيه الاخوان بعد المغرب يتونسوا ومشهور بحجر جعفر العاول انا مابعرفوا لكن سمعتا عنو لانو كان زول نكتة ، اها بديت افتش علي العامود
وما سالتا اي زول لحدي ما لقيتو وفعلاً نفس الوصف بتاع المكان حجر كبير ومجموعة حجار صغيرة جنبه وكان في شاب نحيل قاعد في الضل وانا ماشي عليهو قعد يعاين لي شديد وصلتوا وقبل ما اسلم عليه قلتا ليه والله ياجعفر حجرك دا ما بتخليهو ولاحظ انا ما بعرف جعفر ولا هو بعرفني ، ردا علي وقال والله قوة عينك دي الا كان انتا مزمل بورتبيل ، والله الزول دا خشى فيني حضن اتقول بيعرفني من سنين ودا كلوا بس من الحكاوي السمعا عني من الشباب ، وقال والله الليلة الشرفة خشاها تمساح ، اها عنقريبك العندو عراكين حق الضيوف في بيت بانت قاعد هاهاها ضحكنا وحلف علي لازم اخش اسلم علي ناس البيت وانا مصر خلاص بجيكم بعدين

[مزمل محمد وداعة الله]

بعدين ما فاضيين ليك امي دايرة تعوس وابوي داير يلعب ضمنة هاهاها ، المهم دخلتا وسلمتا علي ناس البيت وعرفني عليهم دا مزمل عربي ساااااي جابوا الدرب من بورتبيل زول بصل ، ومشى معاي لناس معز لقينا معز وقيصر مع بعض واتفاجاوا بي شديد ورحبوا بي وسلمتا علي ناس البيت والغريبة لقيتم كلهم بيعرفوا مزمل بورتبيل قبل ما يشوفوه وكل واحد حافظ لي موقف ونكتة انا عملتها .
في مساء نفس اليوم بداءت رحلة الزيارات للاصدقاء في بيوتم والله دي انا عانيت فيها جنس معاناة اي بيت نخشو لازم اما بيبسي او شاي لبن لمن الواحد حسا انو بقي زي السيرمس وما قادر امشي واذا رفضتا تشرب دي نبزة لناس البيت الاب والام والاخوان والصغار يازول والله تشرب ويمسكووك الكباية غصب والشباب المعاي يضحكوا المهم لحدي الساعة تمانية مساء رجعنا لديوان عمنا ( محمد الشيخ ) خال معز والكنا نازلين فيهو ومعاي الشباب ، ولدو اسمو معاوية بيشتغل ممرض راجل لذيذ جداً انا قابلتو في بيت بانت مرة واحدة ، لما جينا الديوان انا كنتا خلاص حاسي انو بطني حا تطق من الشاي واللقيمات والبسكويت بقيت زي غنماية الحلة واخر شي بفكر فيهو اني انوم ، اها معاوية قال لينا يا جماعة انتو وين انا من قبيل مستنيكم بالشاي واللقيمات ، انا سمعتا الكلام دا وقربتا اجن شاي شنو يازول حرم ولا بقة خلاص واقف تتق ، والله انشاء الله تنقدا تشرب تشرب والله ما تشرب الا امسحك بيهو انت قايلة لعب اسي ارجع الشاي بيغادي امي تكبوا لي فوق راسي ، ومسكوني بالقوة ( قيصر ومعز ورافع وود الشيخ والشيخ اخو معاوية الصغير ومعاوية بشرب فيني الشاي ويدخل اللقيمات في خشمي بالقوة وانا اصرخ وفلتا منهم وقمتا جاري والله الشيخ ومعاوية سكوني باللقيمات لحدي الشارع ، في الباب لاقانا ابوهم ( محمد الشيخ ) وقال يا اولاد الضيف ساكنو خباركم ردا معاوية الضيف ابى ياكل اللقيمات واشرب الشاي ردا ابوهم هي نان انتو زاتكم غلطانين اكان اول حاجة تكتفوه وبعدين تاكلوا امسكوهو انكتفو وجيبو الشاي والله انا من الضحك وقعتا في الارض قرب يغمى علي والغريبة الراجل ما كان بيهظر جااااااادي ، والله كان يوم وكانت ليلة ما انساها حياتي كلها
استمرت المعاناة في اليوم التاني الفطور مع عمار الماحي وتاكل رجالة ، الغداء عن اخونا وزميلنا ازهري جابر حسن وتاكل غصباً عنك وشاي المغرب عند ناس الصادق صديق واحمد صديق علي وهنا انا شربتا كباية واحدة ورفضتا ازيدا والغريبة مافي زول اصرا علي ، قام احمد صديق ختا الكباية وقال عن ازنكم مشا البيت وبعد لحظة رجع ومعاهو اخوه الكبير اسمو الواثق راجل ضخم ولذيذ جداً دخل علينا في الصالون وقبل ما يسلم قال وينو العربي الابا يشرب الشاي دا الصادق قال ليه يا هو دا انا خفتا يا ربي دا شنو دا الراجل جاء جنبي وقال لي اسمع تشرب ولا اقعد فوق ليك اسفلتك علي الطلاق ما تشرب الا اوريك ، اخوك من الخوفة شربتا باقي الصبارة كلها والواثق يكب لي ويضحك والشباب ماتوا من الضحك .
وكذلك في اليوم الثالث وكل يوم اقول انا مسافر يجيبوا لي واحد يحلف طلاق قعدتا معاهم خمسة ايام وحضرتا فيها اربعة مناسبات زواج واتحننتا مع كل العرسان ورقصتا في كل الحفلات رجالة ، وفي اليوم الداير اسافر فيهو قلتا الناس ديل ما بيخلوني اسافر الا افاجم بنفس طريقتم اها عملتا شنو مشيت لواحد اسمو غاندي علي المهدي ود عم قيصر متزوج وقلتا ليه والله يا غاندي مافي طريقة تفكني الا تحلف انتا طلاق اني انا امشي عشان الناس دي تفكني وبعد الحاح وافق الراجل وحلف على الشباب انهم يفكوني قام عندنا صاحبنا اسمو خالد محمد الحسن قال نحنا موافقين نخليهو يمشي لكن بشرط نحننو حنة كاملة ايديهو ورجليهو وخشينا في موضوع تاني وجرجرة المهم انا وافقتا اتحننا لكن في ايديني بس وقد كان عملوا لي حنة ببارتي وعزموا اصحابنا كلهم زيها وزي حنة العريس اها هنا دخل جعفر العاول وحلف الا يحلقوا لي شعري وجابوا قيصر لانو كان حلاق ماهر وحلقوا لي وبعد الفطور اتلملموا كل الاصحاب اكتر من عشرين شاب في وداعي لما وصلنا موقف المواصلات الناس قايلاها مظاهرة لمن انا زاتي اتخلعتا واكتر من عشرة دفعوا لي وبتاع البوكس حلف ما يشيل من واحد ريال طلع معرفة

[osama aldogag]

بسم الله الرحمن الرحيم
التحية موصولة لكل أعضاء المنتدي العملاق ، وانا في غاية الاسف للغيبة الطويلة عن المنتدي بس الظروف والمشاغل الكتيرة ، ودة ما بيمنع انني كنت متابع كل البوستات ، وتحية أخصها للغلي والراقي جدا ( مزمل ) وأنا سعيد جدا انو تكون العودة من خلال البوست الجميل والرائع دة وصراحة انا من المتابعين لكتاباتك والعاجبني جدا بساطة الكلمة والسرد الجميل الممتع للمواضيع أخي الغالي واصل وأرجوك لا تنقطع أبدا والتحية عبرك للاخ والصديق الغالي مدثر ،،
ولك احترامي وتقديري
،،،

[مزمل محمد وداعة الله]

الدقاق وينك يا فنان يارائع يا سمح الطلة ونعمة الصوت المن الله
والله فقدناك ومشكووور علي المداخلة ، اما بالنسبة لموضوع البوست فاوعدك انو اواصل سرد حكايات حقيقية بتروي بساطة الانسان السوداني في كل مكان وكمان استني الجديد عن الفترة الحلوة القضيناها في الاهلية وطبعاً انت كنتا شاهد عيان لاننا نحنا جينا بعدكم ولقيناكم قدامنا في الاهلية
ارجو يا اسامة انك ما تنقطع وتتداخل معانا في البوست بحكاوي عن بساطة الناس القابلتهم في مسيرتك وانت فنان في سنار والقري الغنيت فيها طبعاً عندك ذكريات حلوة ارجو مدنا بيها
ومشكووووووور تاني يا فنان يا رائع ( ومصيري كيف انا يالمسافر )
لك ودي

[مزمل محمد وداعة الله]

دا فصل جديد من فصول البساطة القاعد يعلمنا ليها الشعب السوداني البسيط والمتألف في الافراح والاكراه ، طبعاً المناسبات في السودان سواء كانت سعيدة او حزينة هي حاجة فريدة من نوعها وما عندها شبيه في كل بلاد الدنيا ودا بيمثلوا ترابط هذا الشعب وطيبة انسانو وبساطتو
مثلاً مناسابات الزواج عندنا في القرى بتبداء باعلان العريس لموعد الزفاف ومن اليوم داك كل الاهل والجيران بيكونوا في وضع استعداد كامل لعرس ( مزمل ) مثلاً تلقى اصحاب العريس بيجهزوا في الكروت بتاعت الدعوة بتاعت المرطبات لي ناس الحلة والغداء لناس القرى التانية ويكتبوا ما ينسوا زول ويجي ابو العريس خاشي عليهم في الديوان ( اها هوي عمكم الامين ود الفكي في حليوة ما تكونوا نسيتوه ما تلومونا مع زول ) ( لا ياحاج ما تشيل هم ما نسينا زول )
النسوان بيغادي بيحمرن في البصلة ويعملن في الفطير وام العريس تنادي ليها شافعتين صغار ( تعالن النرسلكن لي ام الحسن بت الامام بتعرفنها ) ( آآآي ) ( خلاص امشن قولن ليها خالتي عشة قالت ليك بعد بكرة عرس ولدا تعالي اتغدي معاها ) ، في صايد تاني من الحوش مجموعة شباب بيجهزوا في مكان للطباخ وبراميل موية لزوم الاكل وكدا !!!
واحدين تانيين سايقين التور والخرفان للزريبة ، والشباب الصغار بيفتشوا للكشافات ( ياخي امشي للبعيو ود شربك عندوكشافة جيبا منو ) واتنين تانيين واقفين مع العريس ( اسمع نحنا ربطنا ليك الفنان اسامة الدقاق يوم الخميس هو شغال في سنار المدينة لحدي الساعة 11 وبعد 11 بيجينا ومعاهو بتاع الساوند قندلا ) اما حنة العريس ربطنا ليك مواهب فرنسا بكرة بس دايرين العربون ) العريس يخش يجيب العربون ويجي اسمعوا انتوا ماشين سنار اغشوا معاكم التلج والرغيف ارفعوها في البوكسي .
اليوم التاني من الصباح البنات يقشن الحوش ويفرشوا رملة حمراء والشباب يربطوا الصيوان العصر تبداء حنة العريس البنات اخر كريمات واخر قشرة والشباب الجنز حدوا البكرياس والزغاريد تجيب الضهبان في نفس الحوش يربطوا ليك الساوند والفنانة تبداء ليك بغنية هادية وبعدا تخش ليك ( عديلة يا بيضاء ويا ملائكة سيري معا ) ( وححنو ححنو وبنات امو جوا الليلة)
الخالات والعمات زغاريد والشباب هجيج صاح وشافع صغير نص الدايرة يفك ليك العاب نارية الجماعة ينطوا ياولد انعل يومك قطعتا قلبنا العب برة
البنات يخشن شايلات صنية الحنة فيها صحن الجرتق وحقيين والحنة في الصحن فوق ليها شموع ملونة وريحة البخور الما خمج ويقعدوا العريس في العنقريب ويحننوا وجنب العريس لازم يكون قاعد اقرب صاحب ليهو من اولاد الحلة دا وزيرو ويحنن يدوا معاهو والشباب يختوا ليهم الحنة برضو والسهرة تستمر لحدي قريب الصباح ، الناس تمشي تنوم عشان بكرة الوقفة طويلة
يوم المناسبة بعد صلاة الصبح طوالي ابو العريس واعمامو والناس الكبار يضبحوا التور ولازم يقعدوا كلهم لحدي الضبيحة ما تتم ويشربوا الشاي بالفطير ، انتهت الضبيحة يشيلوا اللحم بتاع الطباخ في الصواني يودوهوا ليهو ويبداء يجهز طبعاً الطباخ ماعندوا شغلة بالفطور بيعملنوا النسوان عصيدة بملاح تقلية وروب وطاعمية وفول ودمعة وشعيرية ( يا اخوانا في ابسط من كدا ) والله دي حقيقة واتحدى اي زول يقول لي انو فطور العرس عندهم بيطلع من الحاجات دي
الناس فطرت وشربت الشاي الشباب يملوا براميل الموية والحافظات تتملي تلج والكراسي والطرابيز تتختا بعد صلاة الظهر في الجامع يتم العقد ويوزعوا البلح على المصلين والناس تبارك لاهل العروسين وعلى طول على الغداء وهنا بتبداء حركة وجوطة كبيرة ( يا الطيب ياخي قعدوا الناس ديل عشرة عشرة ) ( خت الصينية دي هنا جنب ناس عمك البشير ديل ) ( النسوان ادوهن تلاتة صواني للضيفان ) ( اسمع طلعوا خمسة صواني للرجال وخمسة للنسوان نظموا الشغلانة ) (مافي صحانة فاضية خشو جوة البيوت جيبوا الفاضي يا خوانا ) ( اسمع التلحيقة خليها رجلة وبطاطس ) ( جيب ضلعة هنا ياخي دي صينية ضيفان )، ويستمر البرنامج دا لحدي قريب المغرب والغداء يشطب ، الناس تبداء تفكر في موضوع السيرة والحفلة وعشا الفنانين
الساعة تمانية مساء العريس يجرتقوه ويلبس البدلة السوداء ويختوا ليه الضريرة والهلال ويكحلوه والزغاريد والدلوكة والسيرة تمرق العجاج في السماء والشفع يجاروا والسيرة شاقة الحلة لحدي ناس العروس ، اها هنا السيرة بتقيف برة لحدي ما اهل العروس يمرقوا بي دلوكتم ويردوا علي ناس العريس ويدخلوهم العريس يخش في غرفة قدامية براها معاها حوش صغير زي بيت القبانة دي اسمها بيت العريس ، اجيبوا ليهم العصير وغالباً بيكون اما تاج او كركدي بارد والناس الراقيين شوية بيجيبوا بيبسي ، اها بعدا يجيبوا عشاء العريس ويعشوا السيرة ، غالباً العشاء بيكون باقي غداء بيت العرس ، الفترة من بعد عشاء السيرة لحدي الحفلة ما تبداء الناس بتتفرق البيمشي ينوم والبنات يمشن يجهزن نفسهن للحفلة ( اديني طرحتك البيجية ، الاسيرت الاسود اكويهو لي معاك انا ديرا اكوي شعري ، الفير وين ) اها الشباب بيهناك ( اسمع القاش بتاعي ما لقيتو ، اكوي لي قميصي دا معاك )
اها بعد الساعة 12 الاستاذ اسامة الدقاق وناس قندلا بتاع الساوند وصلوا نزلوهم في ديوان ناس الشيخ وودوا ليهم موية والعشاء بتاع الفنانين سخنوه واعملوا شاي يصحوا ليك مدينة وناهد من النوم اعملن العشاء ويودوهو للفنانين ، قندلا والشباب يربطوا ليكا الساوند ويجربوه ( تست ون يست 1 2 3 تيست ) الحلة كلها تصحى الشفع من السرير يطس ليك موية في وشو وباقي الجسم اغباااااااااش وجري ساحة اللحفلة ، الساعة واحدة اسامة الدقاق يديها ليك ( ما اصلوا ريدا اصبح حياتي من يوم فؤادي لهواك هدى ) العريس هنا بيكون مشا للعروس الخاتنها في بيت ناس مشاعر بت علي بعيد الناس وبالبوكس ولا عربية صغيرة جاي بيها ضيف من مدني ولا الخرطوم يبجبا ويجي خاشي على مكان الحفلة الجماعة يجوا للفنان اسمع العرسان خاشين ( اسامة طوالي يبداء يعزف ليك زفة ( تيتري تتت تي تي تارا ) وبتاع الفيديو يصور من باب العربية لحدي الكوشة ، والناس تتلما ليك في العرسان مبروك يا عريس العرسان يقعدوا بعد نص ساعة والحفلة تدور لحدي الصباح
كدا اليوم انتهي والحلة كلها تقريباً شاركت فيهو
والله دي صورة حقيقية انا عايشتها شخصيأ في بورتبيل عشرات المرات واصبحت روتين ثابت في كلو مناسبة انا حضرتها بعيدة ولا قريبة .

[بورتبيل]

الجميل - مزمل

تحياتي وانا بالجد من المتابعين لجمال كتاباتك واسلوب السرد الذي تتبعه. واجمل ما لفت نظري انك تحكي عن بساطة وطيبة اهلنا في السودان في كل اطرافه .. وتاكد بان كل الذي تتحدث عنه هو سمة من سمات الشعب السوداني الجميل الفريد في طبائعه وخصاله والمتفرد في عاداته وتقاليده .. وحقيقة المتتبع للشعب السوداني يجد انه يندر ان نجد شعوب مشابهة لنا في كل هذا الارث الثقافي والاجتماعي .. الذي يشكل كل تفاعلات الحياة في كيان الشعب السوداني.

اعتقد بان المواصلة في هذا البوست يجب ان تتواصل حتى يتعرف الجميع كل على الاخر .. وحتى نتعلم اشياء عن بساطة اهلنا في السودان .. وكيف انهم يحملون كل ما هو جميل في افراحهم واحزانهم .. وكل تفاعلاتهم.

[مزمل محمد وداعة الله]

خلصنا المناسبة السعيدة ونخش علي مناسبة حزينة حالة وفاة ونشوف بساطة اهلنا وتقاليدم السمحة في الوقوف مع الاسرة المكلومة في فقد عزيز لديها
اول ما يسمعوا الناس بي انو حاج فلان تعبان وودوهو المستشفي يبدو يمشوا لبيتو ويسالوا الموجودين ( اها في خبر من الجماعة ديل ) والله الدكتور قال ملاريا رقدوا في العنبر ، تاني يوم الصباح تلقي الجماعة الساعة سبعة البيعمل ليهو فطور والبشيل معاهو شوربة بتاعت حمام وعلي المستشفي اهل المريض قاعدين في ضل شجرة نيم كبيرة في فرشات والناس تجيهم ( كفارة يا جماعة اها الحاج هسي كيف الدكتور قال شنو ) ، ( والله الليلة احسن شوية ممكن يخرجوهو بكرة ) الناس ترجع الحلة العصر وفي المساء الساعة عشرة يسمعوا صوت عويل وبكاء ، الراجل لزوجتو ( حليمة انتي عارفة دا عمك فلان اتوفى انا من قبيل من ما شفتوا في المستشفي عرفتا حالتو متاخرة ، قومي اديني جلابيتي النمشي نرفع الفاتحة ) اها جارتم بفوق الحيطة ( ياحليمة هوي عمك فلان مات امرقي انلاقي سريع ونجي ) ، الراجل يخش على الديوان مع مجموعة من ناس الحلة ( الفااااتحة ) ويصر انو يشيل الفاتحة مع اهل المتوفي واحد واحد ، هنا مجموعة من الشباب يتحاوروا اسمع سوق ليك اتنين تلاتة وامشوا لي موسى الفلاتي جيبوا منو حاجات الحفر ودوها المقابر ونحنا بنسوق ليكم الجماعة للحفر بعد اقل من نص ساعة علي الوفاة بتكون كل الحلة في بيت العزاء ، ومجموعة كبيرة من الشباب في المقابر لزوم الدفن الشايل بطارية واللابس ملاية من البرد يبدوا الحفر وطبعاً بيكون معاهم واحد او اتنين متخصصيين في القبور ومساحاتا وود الاحد وطريقة تجهيزوا ( اسمع احفر بيجي ، شيل من هنا شوية وامشي علي كراعك اليمين ، اعمل حسابك ما تضرب اخوك دا في راسو ( صلي يازول صلي ) يعن اديني معاك فرصة للحفر ، في الديوان الناس الكبار يبدوا يجهزوا الكفن للمتوفي والحنوط
وبعد حوالي ساعتين يجيهم واحد من المقابر ( الناس ديل جاهزين ) ويحملوا النعش والحلة كلها تتناوب على حملوا ويصلوا عليهو في المقابر وتتم عملية الدفن وصت توجيهات من ذوي الخبرة ( اسند بايدك اليمين ، ما تميل الراس اقلب يدك )
الشباب يكونوا جهزوا الطوب ويبدوا يناولوه للناس داخل القبر ، بعد الفراق من الدفن الناس كلها تتوجه للديوان مرة تانية
والبعض يمشي للنوم ، بكرة الصباح لازم كل واحد من الناس الكبار في البيت يشيل الشاي بتاعو وعلى الديوان ، ناس القري المجاورة ادوهم الخبر بالتلفون يبدوا يتوافدو بالعربات واحد واحد ( ديل ناس المدينة عرب ) البوكس دا ناس وين ( ديل ناس الهجليجة ) والحافلة دي ناس الطلحة ، امشوا جيبوا الفطور سريع ، يفطروا كل الضيوف ويشربوا الشاي اها ناس القري عندهم عادة اسمها الكشف من اولاد الحلة بيكون في واحد عندو كراسة كاتب عليها القري كلها يجو ناس المدينة عرب واحد منهم يشيل الكراس ويجمع القروش من الناس ويكتب اسماهم واحد واحد وهكذا ، ناس الحلة عندهم كراس براااهم
في الغداء في حاجة غريبة وفريدة بتحكي ترابط المجتمع السوداني وهي انو كل واحد من ناس الحلة يجيب الغداء بتاعو في عامود ويحاول انو يزيد على الغداء العادي بتاعو في البيت انشاء الله صحن ارز ولا رغيف ويجي يتغداء في بيت العزاء ودا طوال ايام العزاء برنامج ثابت .
عادة اهلنا في السودان ايام الفراش بتكون من يومين لتلاتة ايام بعدها بيرفعوا الفراش وتبداء الناس تقلل من الحضور لبيت العزاء بس الضيوف البعاد .
هنا اهل العزاء يبدوا يجردوا حساب الخسائر الاندفعت في ايام العزاء اذا طلعت في فروقات يلزموا الناس القراب في الاسرة بتحمل الخسائر والناس تدفع عن تسامح ورضا لانهم بيحسوا انو دا واجبم ويترحموا علي الفقيد
طيلة ايام العزاء الناس بتكون موجودة مع اهل المتوفي ودا البقلل وطاءة الحزن عندهم شوية ويحسوا بلمة الاهل حواليهم بتنسيهم قليل من حزنهم عشان تستمر عجلة الحياة .
هكذا هو الشعب السوداني جميلاً في فرحه ، ونبيلاً ساعة الاحزان ، يضمد جراح المكلومين ويشارك الناس افراحهم في الفة لا توجد في كل شعوب الدنيا ، وتاني اقول ( كان ما جيتا من زيل ديل كان اسفايا واماساتي وا ذلي )

نحنا الساس ونحنا الراس
ونحنا برانا دون الناس
ما بنرضى الشرف ينداس
وارثين عِزة من عَزة

[تهانى]

أخي مزمل .. لك التحيه .
اشكرك مره اخرى على هذا الموضوع ، وحقيقي يعجز لساني عن التعبير والله لقد عشت لحظات جميله مع هذا الطرح الذي اثرى المنتدي بكل ما تحمل هذه الكلمة من معنى ، واثناء قراءتي لهذا السرد الجميل تجدني في قمة الاندماج ولقد عشت كل لحظه وكأني ارى كل ما ورد امامي ، واود أن اعبر لك لكنني عجزت أن أنقل لك كامل احساسي . ولا استطيع الا أن اقول لك ،شكرا ، شكرا ، شكرا ، وأرجو أن تسرد لنا المزيد.

لك عظيم امتناني وتقديري .

[وضاح محمد على السيد]

مشكوووووور أخي مزمل على الموضوع الشيق والمفيد

[osama aldogag]

حبيينا الغالي المبدع دوما مزمل
التحية لك وولجميع الاهل
أولا أحب أعلق علي الموضوع الاول وهو بتاع الفرح ، والله يا مزمل زي ما قالت الاخت تهاني الواحد غلبو التعبير عن ما يجيش بالخاطر وصراحة عشت معاك وانت بتروي في الحالة وانا بقرأ في البوستة وزي الكأنو الحاجات دي بتحصل قدامي وفعلا دة تقريبا التفاصيل القاعدة تحصل بالضبط يعني اتخايلي لو قالو للعريس العرس امبارح وصف عرسك كان كيف ما بقدر يصل للمهارة والدقة والاهتمام بكل التفاصيل الانت قمت بيها وعن جد أمكن أجمل الحفلات والمناسبات العملتها كانت عند أهلنا في القري وأنا أحمد الله كثيرا انوكانت اكثر حفلاتي كانت في القري وعن طريقهم امكن بقيت معروف شوية بالنسبة لباقي الناس في المناطق الاخري ، واوعدك اني طبعا دة بعد اذنك اني ح اكتب شوية في الموضوع دة عشان نلقي الضوء اكثر علي بعض التفاصيل لأني عايشتها تماما وسعدت بيها جدا ،
اما في الموضوع الثاني موضوع الوفاة فوالله اديتو حقو في الوصف وبالراحة شوية عشان ما يسحروك ربنا يوفقك والي الامام دايما
والتحية عبرك لكل الشعب السوداني السمح في كل شئ .
ولك مني كل الود ،،

[مزمل محمد وداعة الله]

أخي مزمل .. لك التحيه .
اشكرك مره اخرى على هذا الموضوع ، وحقيقي يعجز لساني عن التعبير والله لقد عشت لحظات جميله مع هذا الطرح الذي اثرى المنتدي بكل ما تحمل هذه الكلمة من معنى ، واثناء قراءتي لهذا السرد الجميل تجدني في قمة الاندماج ولقد عشت كل لحظه وكأني ارى كل ما ورد امامي ، واود أن اعبر لك لكنني عجزت أن أنقل لك كامل احساسي . ولا استطيع الا أن اقول لك ،شكرا ، شكرا ، شكرا ، وأرجو أن تسرد لنا المزيد.

لك عظيم امتناني وتقديري .

اشكرك اخت تهاني على المداخلة الصادقة واتمنى اكون وصفتا الحاصل بدقة وارجو انك تشاركيني في البوست بسرد قصة عيشتيها شخصياً حسيتي فيها ببساطة اهلنا السودانيين
تقبلي خالص امتناني وشكري

[مزمل محمد وداعة الله]

مشكوووووور أخي مزمل على الموضوع الشيق والمفيد

شكراً جزيلاً وضاح واتمنى انك تكون استمتعتا بالموضوع ، وعايزين نقراء ليك حاجة اطول
لك مني كل الود

[مزمل محمد وداعة الله]

حبيينا الغالي المبدع دوما مزمل
التحية لك وولجميع الاهل
أولا أحب أعلق علي الموضوع الاول وهو بتاع الفرح ، والله يا مزمل زي ما قالت الاخت تهاني الواحد غلبو التعبير عن ما يجيش بالخاطر وصراحة عشت معاك وانت بتروي في الحالة وانا بقرأ في البوستة وزي الكأنو الحاجات دي بتحصل قدامي وفعلا دة تقريبا التفاصيل القاعدة تحصل بالضبط يعني اتخايلي لو قالو للعريس العرس امبارح وصف عرسك كان كيف ما بقدر يصل للمهارة والدقة والاهتمام بكل التفاصيل الانت قمت بيها وعن جد أمكن أجمل الحفلات والمناسبات العملتها كانت عند أهلنا في القري وأنا أحمد الله كثيرا انوكانت اكثر حفلاتي كانت في القري وعن طريقهم امكن بقيت معروف شوية بالنسبة لباقي الناس في المناطق الاخري ، واوعدك اني طبعا دة بعد اذنك اني ح اكتب شوية في الموضوع دة عشان نلقي الضوء اكثر علي بعض التفاصيل لأني عايشتها تماما وسعدت بيها جدا ،
اما في الموضوع الثاني موضوع الوفاة فوالله اديتو حقو في الوصف وبالراحة شوية عشان ما يسحروك ربنا يوفقك والي الامام دايما
والتحية عبرك لكل الشعب السوداني السمح في كل شئ .
ولك مني كل الود ،،

اولاً اخوي اسامة مشكور على المداخلة واتمنى تكون رجعت ليك ذكريات جميلة مع ناس بسطاء حبو اسامة الدقاق وفنو الراقي
ثانياً انت ما تستأذن اعتبر البوست بتاعك ونحنا زوار وياريت يا اسامة تروي لينا قصصك الجميلة عن الزمن الجميل والرحلات الفنية العملتها لقرانا الحلوة الطيبة بي ناسا
ثالثاً ( خمسة وخميسة في عين الما يصلي على النبي ) اطمن انا عامل لي حجاب مافي عين بتقدو هاهاهاهاهاها
لك كل الود اسامة وفي انتظارك

[مزمل محمد وداعة الله]

http://www.up1up2.com/up3/uploads/eb07e6d899.jpg (http://www.up1up2.com/up3/index.php?do=5567)

عد بي الى النيل لا تسال عن التعب
الشوق طي ضلوعي ليس باللعب
لي في الديار ديار كلما طرفت عيني
يرف ضياها في دجى هدبي
وذكريات احبائي اذا خطرت
احس بالموج فوق البحر يلعب بي
شيخ كأن وقار الكون لحيته
واخرون دماهم كونت نسبي
واصدقاء عيون فضلهم مدد
ان حدثوك حسبت الصوت صوت نبي
امي التي وهبت حرفي تالقه
تجئ رحمتها من منبع خصب
وان تغيب في درب الحياة ابي
قامت الى عبئها ايضا بعبء ابي
والناس في وطني شوق يهدهدهم
كما يهز نسيم قامة القصب
والجار يعشق للجيران من سبب
وقد يحبهم جدا بلا سبب
الناس اروع ما فيهم بساطتهم
لكن معدنهم اغلى من الذهب
عد بي الى النيل لا تسأل عن التعب
قلبي يحن حنين الاينق النجب
من كان يحمل يمثلي حب موطنه
يأبى الغياب ولو في الانجم الشهب
ثارت جراحي نيرانا يؤججها
عدو الرياح على قلبي وفي عصبي
كنا سماء تبث الخير منهمرا على البلاد
كقطر الديمة السكب
وكان موطننا عزا ومفتخرا
ما هن في عمره يوما لمغتصب
وقدوة لشعوب لا تماثلنا
في الحلم والعلم والاخلاق والادب
والكنز كان هو الانسان مكتملا
في محفل الجد لم يهرب ولم يغب
والنيل ان فاض اروتنا جداوله
وان تراجع جاد النخل بالرطب
والحب اروع ما في الكون نغزله
خيطا من الشمس او قطرا من السحب
والحنبك الفذ في الاغصان لمعته
ازرت بكل صنوف الكرم والعنب
والناس قااتهم طالت اذا هتفوا
بالشمس جيئي تعالي هاهنا اقتربي
جاءت على خجل حيرى تسائلهم
من ذا على النيل يا احباب يهتف بي
ماذا اصاب ضمير الناس في زمن
صعب كان به داء من الكلب
هذا زمان غريب كيف نعرفه
او كيف يعرفنا من زحمة الحقب
ارجع الي شباب العمر مؤتزرا
بالحب والوصل لا بالوعد في الكتب
وامسح عن القلب ما يلقاه من عنت
واغسل عن الوجه لون الحزن والغضب
فقد اعود كما قد كنت من زمن
فخر الشباب ورب الفن والادب

[مزمل محمد وداعة الله]

اها يا اهلنا نواصل في سرد بساطة ابناء شعبنا السمر ،
الليلة حا نحكي عن مناسبة تانية وهي الزول البيمشي الحج ويجي نشوف تعامل البسطاء مع الموضوع دا وردة الفعل الناتجة من مشاركة الانسان فرحته بالحج الى بيت الله الحرام
البداية طبعاً معروفة وهي النية الحاج او الحاجة بينوى ان يقوم الحج السنة دي ويبداء يلملم في القروش من حق المحاصيل الزراعية ولا ابيع ليه بقرة من بقراتو ويتمتم عليها ، في بعض الناس ربنا كرمهم باولاد مغتربين اها ديل بسهلوا الموضوع شديد لانهم بيتكفلوا بنفقات الحج كاملة ، جاء الميقات بتاع الحج والتسجيل فتح ، اها الحاج بيبداء يسال عن منو الحجي معاهو من القرية عشان الرفقة ويعر ف انو معاهو ( بتول بت الامين ، ومحاسن بت عبد القادر، الفاضل ود الشريف ، وحجازي الجزار ، ونفيسة بت السيد ، والامام ود الزين ) ديل الحاجين من القرية يبدوا يتجمعوا لتكملة اجراءتم مع بعض ويحرصوا انهم يقوموا في باخرة واحدة ، اكتملت الاجراءت وجاء موعد القيام يوم السبت الصباح بعد صلاة الفجر كل الاهل والجيران يصحو عشان يودعوا الحجاج والبكاسي تشيل الحجاج والمودعين لحدي السوق الشعبي مدني او سنار ويودعوا الحجيج بالدموع ، البصات قامت وتوجهت الى بورتسودان والحجيج خلاص بقو بيعرفوا بعض كلهم من كل المناطق وياكلوا ويشربوا مع بعض ، عند وصول الحجاج الى ارض الحجاز في اولاد القرية المقيمين في المملكة ديل عندهم دور بيلعبوه في العملية دي وهو انهم بمجرد ما يعرفوا انو الحجاج وصلوا جدة او مكة وطبعاً هم عارفين كل الحجاج المن القرية ، يمشوا ويفتشوا عليهم في مدينة الحجاج ويشيلوا معاهم الهدايا للحجاج ويكونوا ملازمنهم يومين تلاتة والبعض يكون قاعد مع الحجاج الى اخر يوم
نخلي الحجاج في المملكة ونرجع القرية ونشوف الناس بتعمل شنو لما يقرب موعد وصول الحجيج ، اولاً اهل الحاج في البيت بيبدوا طقوس ثابتة لكل ناس حج ليهم زول في البيت ، الرجال مثلاً بيبدوا يحضروا الذبائح بتاعتم ويصينوا البيت والبوهية للبيبان والشبابيك دي اهم حاجة اهم منهن كلهن بوابة الشارع لازم تتزين باحلى حلى ويكتب عليها من الخارج علي ركايزها دعاء ماثور ( حجاً مبروراً وسعياً مشكوراً وذنباً مغفوراً وعوداً حميداً ) و ( ياداخل هذه الدار صلي علي النبي المختار ) دي لااااااااااااااااازم تتكتب ، اما النسوان بي هناك موضوع الخبيز بيكون الشغل الشاغل ولازم يتم خبز اكبر كمية من البيتي فور والكعك لزوم الناس المهنيين ويجيبوا البلح والعصائر والبيبسي ، اها هنا في ناس الحلة التانيين كل واحد بيجيب حاجة حسب استطاعتو وحسب المجاملة من ناس الحاج يعني في مناسبة ليه جابوا خروف لازم هو يجيب خروف بيبسي يجيب بيبسي وكدا ، الناس كلها مستعدة لعودة الحجاج وكل يوم يسالوا ( الناس ديل بيصلوا متين ) ( قالوا ناس مدني وصل الفوج الاول امبارح ) معناها الناس ديل في البحر ولا وصلوا بورسودان ) ( ما تصلوا ) ويستمر المسلسل وصلوا ما وصلوا لحدي في يوم الساعة عشرة مساء تتدخ البكاسي وتتضرب البوري المميز الحلة كلها تعرف انو الحجاج وصلوا وجري علي بيت الحاج والزغاريد تضرب والنائم يصحى ويقالدو الحاج ( حجة مبروكة ) ( انشاء الله تسبعا ) ( حمد لله على السلامة ياحاج ) ( انشاء الله ما تعبتو ) ويجيبوا خروف ويذبح علي عتبة الباب والحاج لازم يطفر الذبيحة ويلطخوا الدم على الباب والناس تدخل مع الحاج ويوزعوا الخبيز والحلويات والعصائر والبلح والناس تلف على جميع الحجاج بالقرية في الفة وحب نادر جداً في زمن اصبح فيه غيرنا ما بيعرف يعني شنو عمو ود عم ابوه .
ديل نحنا يا اخوانا ودي عاداتنا وتقاليدنا الورثناها كابر عن كابر من زمن الحج بالابل ، دي موروثاتنا ودي ثقافتنا البنتحدى بيها حضارات العالم اجمع ، والله الواحد بيفتخر انو سوداني وبيفتخر انو اتربى في قرية صغيرة في وسط السودان وانو شرب من طيبة اهلوا ومن محنتم وعاداتم الكتير . هكذا نحن بسطاء في تعاملنا ، متسامحين مع انفسنا قبل ان نكون متسامحين مع الاخرين
http://www.up1up2.com/up3/uploads/06e84fc2ad.jpg (http://www.up1up2.com/up3/index.php?do=5567)

http://www.up1up2.com/up3/uploads/64bafed3c7.jpg (http://www.up1up2.com/up3/index.php?do=5567)

http://www.up1up2.com/up3/uploads/efab4d55f2.jpg (http://www.up1up2.com/up3/index.php?do=5567)

[مزمل محمد وداعة الله]

نوع جديد من انواع البساطة البيعلمنا ليها شعبنا السوداني الجميل ، كيف تتعايش مع الآخرين وتقبل بيهم بكل حاجاتم سمحة ولا شينة ، دون الأخذ في الاعتبار الزول دا شنو شمالي جنوبي ادروب غرابي المهم انو سوداني بيجمعك معاهو وطن واحد ودا البفرض طبيعة التعامل بينكم مش لون البشرة ولا اللغة ولا الدين فقط انكم سودانيين وبس
السودان دا بلد كبير جداً وفيهو ثقافات متعددة بحجم ثقافات عالم كامل ، فيهو اكتر من 500 قبيلة وعرق ، فيهو المسلم والمسيحي واللا ديني ، فيهو العربي والزنجي الافريقي ، بلد بكل الحاجات دي صعب جداً يتكون فيه نسيج من التعايش بسلام مع الآخريين ، لكن انسان السودان العظيم قدر يجمع كل هذه المتناقضات ويخلق منها نسيج اجتماعي حقو براااهو ، حاجة ما موجودة في العالم ، مش كده وبس لا حتى الناس الجات من بره السودان وارغمتا ظروف الحياة للعيش في السودان اصبحوا جزء من هذا النسيج واندمجوا في المجتمع السوداني واصبحوا واحد منو رغم تمسكهم بحاجاتم لكنهم اخذوا مننا الكتير
مثال لهولاء الجالية الهندية في السودان ( طبعاً معروف انو الهنود جاءوا الى السودان منذ مئات السنين كتجار بيتاجروا في الحرير والقماش والبهارات البيشتهر بيها الهند ودخلوا عبر سواكن وبورسودان وكسلا واستوطن جزء كبير منهم هناك والبقية نزحت داخل السودان واستقرت في العاصمة خاصة في امدرمان منطقة السوق القديم والمسالمة وحي العرب وحي المظاهر
وبداوا يكونوا نشاط تجاري كبير جداً ، في كسلا استقروا وسيطروا علي التجارة وكونوا حي كامل اسمو حلة الهنود وفي بوسودان برضو ، اها طبعاً بداوا يتكاثروا واعدادم تتزايد وااستقروا واعتبروا انهم سودانيين ودا طبعاً لانهم لقوا ناس طيبين احتوهم وما حسسوهم بغربة البلد لدرجة انو بعضهم قطع علاقتو بالهند واصبح سوداني اتعلم في جامعات السودان واشتغل وعمل شركات ، وبعضهم قدم للجنسية السودانية بجكم انو مولود في السودان وما بيعرف شي عن الهند وقد حصل على الجنسية بالتجنس ، تفتكروا الخلى الناس دي تقعد في السودان وتستقر بمئات السنين وتقطع صلتا ببلدا شنو غير انهم لقوا ناس احسن من ناسم وبلد اجمل من بلدم وعادات اروع من اى عادات عاشوها في اى مكان )
دا نموزج للتعايش مع الناس الجات من بره وكيف انهم استحلو العيش معانا
نشوف التعايش الحصل في السودان بين كل هذه الثقافات والاعراق المختلفة واديكم امثلة انا عشتها شخصياً وانا طالب في امدرمان الاهلية البفتكر انها اكتر الجامعات السودانية الفيها ترابط اجتماعي فريد بين مختلف ابناء المناطق والدليل حا تلقوه في القصص الحارويها ليكم الان
* اولاً انا طبعاً من قبيلة العوامرة من وسط السودان واصولي كلها في منطقة الجزيرة وما عندي اي اصول خارج الجزيرة يعني ود الجزيرة ، لما دخلتا الجامعة الاهلية وبديت اكون علاقاتي الاجتماعية الفرضتا علي ظروف الدراسة ما كنتا بنقي صداقاتي بل الظروف والاقدار هي البتنقي لي ، بعد ما اتعرفتا علي ابناء الشرفة بركات ( قيصر وود الشيخ ورافع ) اللذكرتهم ليكم سابقاً في هذا البوست بداء علاقة صداقة وزمالة بي شخص عزيز علي جداً دا اخونا امير عبد اللطيف الرشيد وهو شايقي مولود ومتربي في بورسودان لدرجة انو اصبح ادروبي يتحدث لغة البجا بطلاقة مش كدا وبس دا حتى لقبو في الجامعة امير ادروب وفيما بعد اصبح رئيس رابطة ابناء الشرق بالجامعة ، اتلما علينا واحد تاني من اقصي غرب السودان اخونا عمار التيجاني من ابناء مدينة نيالا ومن قبيلة الهبانية ، ثم اخونا شاذلي عبد الكريم من ابناء جبال النوبة ومعاهو اخونا القس برنابا وهو ايضاً من ابناء جبال النوبة ومسيحي وقس في الكنيسة الكاثوليكية با مدرمان ، وبعد داك جاءنا اخونا الياس وكمال من ابناء حلفا واخونا صلاج جميل الله من ابناء الجريف بالخرطوم ، واخونا معتز قرشي من ابناء الجموعية ( كرري العجيجة ) شمال امدرمان ، وعمر يوسف من ابناء المحمية ولاية نهر النيل ، والاخوات ناهد من سواكن ، وايمان من بورسودان ، والمرحومة ناريمان والاخت تغريد من الجزيرة قوز كبرو ، وخالد الياس من المناقل وحسين محمد من القضارف
والكتيييييير من الاخوان الاعزاء من مختلف بقاع السودان كانت بتربطني بيهم علاقات حميمة وعلاقات صداقة وصلت لدرجة العلاقة الاسرية والزيارات في مناطقم ، انا هنا عايس اصل بيكم لحاجة مهمة شديد وهي انو طبيعة الانسان السوداني السمحة وتسامحو وعفويتو هي البتفرض كل هذا النسيج وتجعل منو بوتقة بتتلاقى فيها افكار وتقاليد كل هولاء البشر وتشكل مجتمع جديد يضيف للمجتمع السوداني الكبير الق وروح جديدة فيها التسامح والتعايش مع الآخرين تحت مظلة كبيييييييييرة اسمها السودان يعني حكاية دا ودا عرب ودا دينكاوي ودا فوراوي ودا بجاوي دي مسميات ما بتوضع في الاعتبار والمهم هو الانسان دا بيعني ليك شنو .
دا نموزج حي للتعايش الحاصل في السودان بين كافة شرائح المجتمع البيجمعم حاجة واحدة هي انهم سودانيين .

[مزمل محمد وداعة الله]

http://www.up1up2.com/up3/uploads/c1f7551673.gif (http://www.up1up2.com/up3/index.php?do=5567)

[الطيب ادريس]

الأخ المبدع مزمل :

بكل الصدق مازلنا مشدوهين بهذا الواقع المعاش والذي بين يديك يسري كمياه النيل وجريان ترعة الجزيرة ،،، وصف نجيب محفوظ حارات القاهرة ، المدق وبين القصرين وليالي الحلمية
وسيدي الحسين ، وانحصرفي القاهرة ..
مزمل أنت زرت بنا كل البيوت السودانية في فرحها وترحها ولهوها وونستها أنت السودان بكل جغرافيته وطبيعة أهله السجية ...
بوست وتوثيق هائل تفتخر به منتديات سنار ...

الي الأمام ... ولنا عودة بالتفصيل .

[مزمل محمد وداعة الله]

مشكووور اخونا الطيب ادريس على المرور
وفعلاً دا السودان ودي حياتنا ودي حاجاتنا في كل السودان البنعتزا بيها ونفتخر
والقادم اجمل

[مزمل محمد وداعة الله]

الأطفال في السودان حياتم غير كل الاطفال في العالم ودا يمكن يكون لطبيعة البلد والحياة الاجتماعية والظروف المادية المرا بيها السودان وانا هنا حا اتكلم عن فترات سابقة قبل الالفية التالتة وجيل الكمبيوتر والعولمة والانترنت والبلي استيشن
النموزج الحا احيكوه ليكم دا نموزج برضو انا واحد من الناس عشتو في قرية بورتبيل من قبل امكن عشرين سنة وزيادة
كيف الاطفال كانو بيقضوا اوقاتم في الزمن الجميل داك في الثمانينات ، طبعاً الوقت داك كان مشروع الجزيرة في قمة عطاءه والقري عايشة وسط حقول من الخضرة والترع مليانة موية والقطن لوزاتو تبعث التفاول عالم جميل ، نحنا الصغار كنا اكتر الناس استمتاعاً بالحياة خاصة في موسم الاجازات ، آخر يوم في الدراسة بيكون توزيع النتائج وكل التلاميذ بيرجو اليوم دا بفارق الصبر عشان دا اخر يوم وبعدو لعب واستمتاع بالحياة ، نمشي كلنا المدرسة الصباح والجرس يدق والمدرسة كلها في الطابور ويبداء المعلمين في توزيع النتائج اول حاجة سنة اولى واخر حاجة سنة خامسة لانو ناس سادسة ممتحنين للمتوسط
بعد ما نشيل النتائج والاستاذ يقول انصراف جري نتسابق على باب المدرسة وعلي البيوت عدل ، الواحد يقلع هدوم المدرسة ويخش في ردا وفنلة ولا عراقي او جلابية وعلي الصهريج ( صهريج كبير واحد للحلة كلها ) اها الصهريج في بورتبيل قريب من بيتنا وفيه مسطبتيبن بنوها الانجليز انا شخصياً لحدي تاريخ اليوم ما عارف ديل بتاعات شنو المهم كنا بنطلع فيهن ونتسابق والبيقع يطلع برا اللعبة ، وفي الصهريج في المواسير البتاخد الموية من البئر الى الصهريج العلوي الطول بتاعا حوالي 30 متر وماشا في شكل حرف L بنعمل امتحان مشي على المواسير اختبار التوازن مين بيمشي مسافة اكبر دون ان يسقط حاجة ممتعة جداً ، اها في الصهريج اشجار كبيرة بتاعت سنط ظليلة ، وشجرة سدر ( نبق ) مثمرة نقعد نفلق في النبق
مش كدا وبس نحنا كنا بناكل النوى بتاع النبق الجوه نجيب النوى بتاع النبق ونختو علي المسطبة ونضربوا بالحجر ينكسر القشر في حبتين داخلوا طعمها لذيذ جداً ، بعد كدا نتوجه لشجرة السنط الكبيرة ونمشي ننخر الطين ونجيبو ونبداء نعمل منو حيوانات وعربات وبيوت ونلعب بيها زمن طويل لحدي قريب الساعة تلاتة هنا نوقف ونبداء نتفرق عشان مواعيد الغداء جات وناس البيت حا يفقدونا وجري علي البيوت الوالد والاخوان الكبار بيكونا ختوا الغداء قدامم نجي نحن غبببببش يسالونا كنتو وين انتو غبش كدا ؟ بتلعبوا بالطين ؟ امشي غسل ايدينك ديل وتعال اكل ! بعد الغداء نشرب الشاي ونمشي نستنى البهائم لما تجي من السرحة ( الخلاء ) ندخلا ونحلب مع الراعي ونعلق ليها ، بعد دا مواعيد التمرين بتاع الكورة ، كنا في الحلة كل اولاد حي عندهم فريق كورة براهم وميدان خاص بيهم نحنا في حينا عندنا فريق اسمو الوحدة دا خاص باولاد العوامرة بس نجمع من كل واحد جنيه ونشتري كفر ( كورة ) كان تمنا في الوقت داك حوالي 15 جنيه واسمو كفر ابو موزة والميدان بتاعنا قدام بيتنا في فسحة كبيرة نوزع بعض ونلعب اول ما يأذن المغرب المسؤول عن الكفر يشيل الكفر ويقول خلاص التمرين انتهى ، ونمشي البيت نشرب شاي المغرب باللبن ، وبعد المغرب كل المجموعة تتلما تاني في نفس الميدان ونقعد في حلقة دايرية ونفكر نلعب شنو ؟ نلعب شليل اها نقوم نفتش لعضمة مميزة عشان نلعب بيها ( واحد يمسك العضمة ونحنا وارهو هو يقول شليل وينو ونحنا نقول خطفوا الدودو هو : شليل وين راح نحنا : خطفوا التمساح هو :شلا وراح ويرمي العضم في الظلام ونجري كلنا نفتش عليهو ولما واحد مننا يلقاهو يسكت وشييلوا ويجري علي الميس ( مكان الانطلاق ) اما اذا واحد شافك وانت بتشيلوا ينادي باقي الشباب ويبدوا يقرصوك عشان تفكوا ويشيلوا واحد تاني وهكذا لحدي ما واحد يخش بيهو الميس ، وتستمر ليلة السمر لحدي حوالى الساعة ثمانية بالتوقيت القديم ( والله الزمن كان ما بيجري زي الزمن دا ) اها الساعة تمانية دي مواعيد المسلسل اليومي كل الحلة بتكون الساعة تمانية مستعدة للمسلسل وتلقى الشوارع فاضية وكل الناس قدام التلفزيون وطبعاً في الزمن داك التلفزيونات في القرية قليلة اها كل مجموعة من الجيران يتلموا في بيت اقرب واحد عندو تلفزيون وسيد البيت واولادو سعيدين بلمة الناس معاهم ويفرشوا السراير من المغرب والتلفزيون برا في الحوش ونحنا الشفع نقعد في الارض قدام التلفزيون والناس الكبار في السراير اها البنات الكبار شوية مننا عندهن بنابر دا معروف بنبر رجاء ودا البنبر بتاع آمنة مافي حد يقعد فيهو الا تكون ستو ما قاعدة ، وكل واحد يجيب معاهو تسالي لزوم الفرجة والله قال بيقولك ترمي القشر في الارض تاخد دقة من اختك الكبيرة طواالي ، اها المسلسل انتهى ، الشفع علي طول يفكروا في العشاء والنوم عشان يوم بكرة ، العشاء عادة بيكون اما بليلة عدس بزيت سمسم وسكر ، او لقيمات ، او قراصة محمرة بالسكر مع كباية لبن ، والله الواحد كانو اكل افخر اكل لانو في قناعة ورضا بالمقسوم وشكر لنعمة الله سبحانه وتعالي ، النفوس صافية والدنيا حلوة والحياة بسيطة ، حتى احلامن كانت بسيطة ما بتتعدى يوم بكرة يكون كيف واللعب وين والواجبات المنزلية المراسيل وجيب القش من الخلاء للاغنام ونظافة الزريبة ولا الحوش من الحشائش ، ونووووووووم واصوات الحيوانات بس البنسمعا قبل النوم خصوصاً الكلاب والقمر منور والسماء صااااااااااااااااااااااافية والحلم جميل .
دا وصف يوم واحد من حياتنا ونحنا اطفال في تلك البقعة الساحرة من الارض ( بورتبيل ) مهد الذكريات الحالمة والطفولة البريئة والاحلام الوردية ، في زمن كان كل شي جميل والانسان صادق مع نفسو قبل الآخرين ، إلفة ومحنة وطيبة نادرة
ومجتمع مثالي للتعايش .
حا نواصل ذكريات الطفولة وبساطة حياتنا ونحنا اطفال في بورتبيل . انتظرونا

[مزمل محمد وداعة الله]

http://www.up1up2.com/up3/uploads/942d1cfa27.jpg (http://www.up1up2.com/up3/index.php?do=5567)




http://www.up1up2.com/up3/uploads/b503605bf4.jpg (http://www.up1up2.com/up3/index.php?do=5567)


http://www.up1up2.com/up3/uploads/66e0ca5f8e.jpg (http://www.up1up2.com/up3/index.php?do=5567)



http://www.up1up2.com/up3/uploads/25b0f059e8.jpg (http://www.up1up2.com/up3/index.php?do=5567)

[مايرناوية 0/0]

موضوع تستحق عليهو

وسام العطاء

أكثر حاجة جذبتني ولازم كل السودانيين كونوا مؤمنين يها
أنو الدناوي - الفوراوي - ود العرب - الشمالي - الجنوبي- الشرق - والغرب- الفلاتي -

وكل ديل يربطهم اسم ويرجعوا لي انهم سودانيين


وشكرا جزيلا ليك على المبذول الرائع

[مزمل محمد وداعة الله]

الله يديك العافية اختى مايرناوية انتي خشيتي معاي في الموضوع بتاع التعايش بين السودانيين ودي حقيقة اننا لازم ننفي وجود المسميات العرقية من حياتنا عشان نقدر نتعايش مع الآخرين ونفرد اجنحة السلام في بلدنا ونرجع الفاتنا من سنين
مشكورة على مرورك واضافتك وارجو انك تتواصلي وما تقطعي مداخلاتك

[مزمل محمد وداعة الله]

امتدا الحلم بدنيا وردية ومستقبل واعد جميل والنسمة الصيفية تداعب هداءة الاحلام على جبين طفل نائم في حضن الدهشة والسحر الجميل في ارض خضراء وترع مليانة بموية النيل الصافية وفي الحقول ازهار بتتفتح مع شروق شمس يوم جديد
هنا نحنا نصحى مع اصوات الديوك مؤذنة بميلاد يوم جديد يحمل تباشير الفرح على القرية وكل واحد مع همومو ومشاغلوا الوالد بفكر في الزراعة وكيف يمشي الحواشة ويعمل شنو ، والوالدة بتفكر في العواسة والملاح وتوفير احياجات البيت الصغيرة ، اما نحنا بعد الصحيان من النوم والفرائض اليومية الصباحية نقعد جنب الوالدة وكانون الشاي الدافي الصباح ونشرب شاي لبن علي كيف كيفك ، اها الوالد يدينا القروش ويقول لي واحد مننا امشي الجزارة جيب اللحمة والخضار ، بعد ما يرجع من السوق يركب الحمار وعلى الخلاء لزوم اجيب القش للاغنام القاعدة في البيت ، او يمشي مع الوالد عشان يساعدو في عمل اي حاجة في الحواشة ( حش الحشائش ، تنظيف الارض البور ، تشتيت الملاح او السماد ) حوالي الساعة 10 بنرجع من الحواشة جيعانين شديد والفطور بيكون جاهز ( كسرة وملاح تقلية ابيض او احمر ) حاجة عجب
بعد الفطور طوالي على الصهريج لمقابلة الاصدقاء ومن هناك نفكر نمشي وين طبعاً الساعة 12 الناس الكبار بياخدوا قيلولة اها نحنا هنا بننتهز الفرصة دي ونتجمع كلنا ونمشي على الترعة وبيكون عندنا مكان معين ومحددنو كل يوم للسباحة نقعد نسبح لحدي الساعة 2 وبعد دا لازم يكون معانا شوية زيت عشان نتمسح بيهو لاخفاء الغبشة عشان ما يكشفونا في البيت لانك بتاخد دقة والغريبة بعد الدقة تاني يوم برضو بتمشي الترعة ، او اننا نتفق نطلع على الخلاء لي واحدة من المزارع الفيها البطيخ او العجور ( بالله شوف ليك بساطة في الزمن داك عجور؟؟؟؟؟؟ ) اها نمشي كلنا ونلبد فوق الترعة ونتسلل واحد واحد ناس يمشوا يسرقوا بطيختين ويجو ناكلها والدور تاني على مجموعة اخري ولازم تحزر لان اذا شافك الحارس حاتاخد علقة ساخنة ويمشي يكلم ابوك تاخد علقة تانية والغريبة برضو بعد العلقتين تاني يوم برضو بنمشي نسرق البطيخ والعجور
الله يسامحنا غايتو كانت شقاوة اطفال ، والعصر نفس البرنامج بتاع امس البهائم ثم الكورة وفي المساء اللعب مع الاصدقاء والمسلسل والنوم والاحلام الوردية
دي حياتنا ونحنا اطفال في الزمن الجميل داك ، الواحد فينا ما بيفكر في انو يلبس شنو ولا يمشي المدينة ولا يشتري العاب كهرباء ولا ولا ولا ، كل العابنا نحنا البنعملا من الطين ومن الورق ومن النباتات ولا حتى العاب المجموعات زي لعبة ( ام المهندس ) والله كتير من الناس ما عارف دي شنو والغريبة العالم طور اللعبة دي تحت مسمى وقوانين جديدة اللهي لعبة الكريكت المشهورة في اسيا دي نفسها لعبة ( ام المهندس زاتا ) ولعبة كمبلت والرمة والحباس وشليل وشدت و البلي والفل والسيجة وصفرجت دي كلها العاب نحنا لعبناها ما دفعنا فيها جنية واحد واستمتعنا بيها اكتر من الالعاب المستحدثة حديثاً لانها كان فيها روح المرح والتحدي .
الله والله ايام مرت سريعة كلمح البصر وانا بكتب البوست دا والله دموعي نزلت غصباً عني وروحي اشتاقت للايام الخوالي دي وللاصدقاء الكانو معاي في الحقبة الجميلة دي
والغريبة اقول ليكم حاجة في الزمن الجميل داك نحنا رغم شقاوتنا ولعبنا في الشمس والجري والسباحة في الترع ما كنا بنمرض زي الاطفال في الزمن دا وكان جاك صداع ولا حمة في نوعين من الحبوب ديل الانا كنتا بعرفن لوقت قريب ( كافينول اطفال ) حبة بطعم البرتقال ( وحبوب السلفة ) دي للحمة ووجع الراس بس ولا كلوركين حقن للملاريا وعشان يدوك الحقنة الحلة كلها لازم تمسكك وانت بتكورك وترفس
والله في الزمن داك كنا نخش اي بيت في الحلة مع اصحابنا ناكل مافي حد بيطردنا ولو كنتا وسخان اي واحد من ناس البيت امسكك مع صاحبك دا ويحمموك ويغسلوا ليك سفنجتك ويمسحوك بالزيت ترجع بيتكم تمام التمام
دي كانت حياتنا ودي كانت بساطتنا وخصال اهلنا السمحة ونواااااااااااصل :D

[ابوبكر عزالدين]

مشكور اخي مزمل على هذا السرد الجميل حقيقه اتحفتنا بما تناولت واريد ان اقول لك ان الشعب السوداني مازال ببساطه وقيمه مازالت القريه محافظه على ملامحها القرويه مع اختلاف بعض المدن فتلك الاشياء ترجع دائما لسياسة البلد
انا اتبع لشركة اتصالات في السودان ودائما مانجول القري بغرض توسعة الشبكه فاريد ان اضيف شئ بسيط فكنا عندما ندخل القريه الا تخرج القريه بكاملها ينظرون باندهاش ومنهم من يفر هاربا من السياره لاادري لماذا فيستغرق ذلك وقت طويلا ريثما نوضح لهم من نحن ولماذا نحن في قريتهم وبعد ذلك يتم الكرم اللامحدود بطباع اهل القري وطيبه خاطرهم لا اخفى عليك رغم صعوبة الامر لكني كنت اكون مستمتع جدا لاني اري ملامح القريه التي نعرفها.
معليش اني اطلت الحديث اردت اشاركك الحديث اخي مزمل لك كل الود والاحترام

[مزمل محمد وداعة الله]

الرائع الجميل ابو بكر عز الدين
لك التحايا والسلام وانت تتجول في قرى بلادي لتمدها بنعمة الاتصال وتبحث معهم عن سبل الراحة والامان
لك التحايا وانت توقع بصمتك على هذا البوست الذي انتشى فرحاً بحروفك الرائعة وصدقك الجميل
نعم اخي ابو بكر الشعب السوداني ما زال وسيبقي ببساطته وطيبة انسانه معلماً لكل شعوب الدنيا معاني الالفة والحب والبساطة والرضا بقسمة الله سبحانه وتعالى
شكراً اخي ابوبكر وارجو منك ان تسرد لنا عبر هذا البوست بعض القصص والتجارب التي عشتها في القرى
ولك ودي

[مزمل محمد وداعة الله]

WIDTH=450 HEIGHT=355

( سوداني الجوه وجداني بريدو ) حافظ عبد الرحمن

[جلنار]

شكرا اخي مزمل على ماتناولت من موضوع حقيقا شدني ماتناولت من بساطة الشعب السوداني وبالاخص بساطة اهل القرية لك منا الشكر وفي انتظار المزيد
ملحوظة:انا ايضا من بورتبيل

[مزمل محمد وداعة الله]

مرحب بيك اختي جلنار ومشكورة على المرور والمشاركة
بس ياريت تورينا انتى منو من ناس بورتبيل العزاز والله شوقتيني اعرفك اكتر
ياريت توريني اسمك الحقيقي وعلاقتك ببورتبيل

[تهانى]

أخي مزمل .. لك كل التحايا
مشكور اخي على هذه الروعه وهذا السرد الجميل الصادق لقد نقلت لنا صوره حقيقيه ممتعه عن بساطة الشعب السوداني وكلما نرجع للوراء الحياة كانت اجمل وابسط والنفوس نقيه وحلوه ، حقيقي وانا أقرأ كتابتك أغيب عن من حولي تماما ، واهنئك على هذه الملكه في السرد وجذب من يقرأ كتاباتك بصوره غير عاديه لانه يحكي البساطه والحقيقه والصدق وتنقلنا الى عالم حالم وهذه محطه مهمه ورائعه انتظرها بشوق عارم ، والغريب في الامر حتى من لم يعش هذه الحياة ينجذب اليها بالوصف فقط لانها الفطره وهذه ما يولد عليه الانسان ويجبل .
شكري الجزيل لك اخي مزمل وفي انتظار المزيد .

[مزمل محمد وداعة الله]

العزيزة تهاني
البوست منور بمرورك الكريم ونحمد الله على نعمة اننا سودانيين بسطاء والوعد باقي بسرد بساطة ابناء شعبي الطيبون من ينبشون الارض بحثاً عن عبير
مشكورة تهاني وخليك متابعة

[مزمل محمد وداعة الله]

وتتواصل حكاية بساطة اهلنا الغبش والمعاني الجميلة الاندثرت في كل الشعوب وبقت راسخة بس في تربية اهلنا السودانيين دون شعوب العالم ، ، ،
الليلة حا نحكي عن بساطة من نوع آخر ، حا نحكي عن المطرة في السودان وكيف الناس بتستقبل فصل الخريف ونشوف حياة الناس مع الخريف كيف !!
من المعروف انو مناخ السودان مناخ مداري وذلك لوقوع السودان جغرافياً وسط الاقليم المداري البيمتاز بالامطار في فصل الصيف ، وفصل الخريف عندنا في السودان متداخل مع فصل الصيف حيث يبداء الخريف في منصف شهر مايو في الغالب الاعم ، والفترة بتاعت البدايات دي اهلنا في السودان بيسموها ( الرُشاش ) لانها بتمتاز بامطار خفيفة بتعلن بداية فصل الخريف ، اها اول ما تبداء الرشاش هنا الجو بيبداء يتغير لجو لطيف جداً ، والمزارعين بيبداوا التحضير للزراعة فتلقى المناطق بتاعت الزراعة المطرية خاصة فيها حركة كبيرة جداً من التجهيزات للخريف من توفير الديزل والجازولين عصب العملية الزراعية والالات والتقاوي والعمال ودي بنلقاها واضحة عندنا في مدن زي ( سنار ، الدندر ، الدمازين ، سنجة ، الدالي والمزموم ، القضارف ) وكل مناطق الزراعة المطرية ، حتى عندنا في الجزيرة بيكون المزارعين بيجهزوا للزراعة وكل واحد جواهو امل انو الموسم يكون ناجح والامطار معقولة ...
كل السودان بيكون مستعد للفصل الجميل دي وكل واحد عندوا همومو وامالو ومشاريعو في فصل الخريف
الاطفال بيكونوا اسعد الناس بالخريف ، لانو الجو بيكون مغيم والمطر جميل واللعب في موية المطرة متعة ما بعدها متعة
انا اذكر ونحنا صغار في بورتبيل مع هطول اول رشة في الخريف بنطلع كلنا في ساحة كبيرة وعندنا لعبة مميزة لليوم دا امكن تكونوا كلكم لعبتوه ( لعبة عيا عيا ) نمسك بعض في حلقة دائرية ونقعد نلف بسرعة وننشد ( عيا عيا ، يا مطيرة صبي لينا في عينينا ، يا مطيرة كبي لينا في ايدينا ) ....
ومن الالعاب الجميلة عندنا في الفصل دا لعبة اندثرت على ما اظن هي لعبة ( ود امتشة ) وهي عبارة عن حفرة نحفرها في الارض بعمق نصف متر ونجيب الطين وبعض روث الابقار ونرميه داخلها ، ونقوم بخداع واحد من الاصحاب ما بيكون عارف الحفرة ونحاول نجرجروا لحدي ما يقع فيها ونضحك عليهو وهو يرمينا بالطين ويشتم ويلعن آآآآآآآآه والله ما عارف الزمن اتمسخ ولا الناس اتغيرت ، حاجات كتيرة اتمسحت من حياتنا
بعد ما يدخل الخريف في مراحل متقدمة والمياه تغمر القرية بيكون خلفت برك كبيرة دي متعتنا الحقيقية كل واحد يجيب سفنجة ( نعال ) قديم ويركب عليه عود من باقي شجرة القطن وندخل بيهو في عمق البركة ونتسابق زي سباقات اليخوت الان اما اللعب في مياه الامطار نحنا بنسميه ( خواجة ) ، بعدين نمشي الترعة وعلى حافة التراب بتاع الترعة نبداء ندفق الموية بتاعت المطرة ونعمل ( زلقيتة ) يعني مزلقان ونتباري ونشوق مين الما بيوقع ويحافظ على توازنو
واول ما نسمع صوت عربية عالى دا معناه انو العربية دي موحلة في الطين نجري كلنا ونقعد نعاين للسواق كيف بيطلعا من الطين ونبداء نساعد في شيل الطين من تحت العربية ولزها لحدي ما تتطلع كنا بنكون مستمتعين ايما استمتاع ..
بعد شوية نسمع صوت بابور لستر اها دي الشطافة ( وابور لشفط الماء من القرية ) نجري على الشطافة ونشوف كيف بتعمل على رفع الماء من القرية الى الترعة القريبة
في الخريف وفي حواشاتنا في الجزيرة مع كثرة المطر بتنيت نبتة عجيبة وغريبة اسمها ( الموليتة ) نبتة مرة شوية كنا بنمشي جماعات للحواشات ونفتش عليها ونجيبا البيت بالشوالات ونغسلها مرتين تلاتة عشان المرارة بتاعتا تروح بعدين نفرما زي الملوخية ونضيف ليها فول سوداني مطحون ( دكوة ) وطاحنية وشوية سكر وملح الله الله الله الله حاجة لذيذة جداً نستمتع باكلها مع بعض كشلة وكل واحد يخطف من اخوه ويجري ، على فكرة الموليتا دي اثبت الاطباء انها علاج لتخفيف السكر
والضغط
اجمل حاجة كانت بتفرحني في الخريف هو منظر البهائم وهي بتاكل في العشب في الخلاء وبعدين ترجع العصر للبيت شبعاااانة وكانها بتحمد الله سبحانه وتعالى على نعمة الخريف وتنوم في الزرائب هانئة وتحلم ببكرة احاى
حياة بسيطة وفرح جميل بنعمة الله على الارض ، والمطرة كابة والزرع ينمو والارض رويانة والناس نفوسا صافية واحلاما بسيطة جداً
اما الخريف الان والله يجي ويمشي ما في واحد بحس بيهو ، اصبح الشتاء والصيف والخريف واحد ، لا اطفال بتلعب ولا عربات توحل ولا شطافة ولا في مطر اصلاً زي زمان ، يا خي دا حتى الموليتة الكنا بنجيبا بالشولات بقت مافي وكانو بذورها اتلاشت مع السنين ، ولا الطيور المهاجرة من اوربا زي السنبر وحبيب بلاع الدبيب وطير البقر والحبار الكان موجود في الخريف في الجزيرة بقت ما بتجي
الله يعيدا ايام حلوة وصافية وبسيطة بساطة اهلنا السودانين

ونواصل،،

[مزمل محمد وداعة الله]

WIDTH=450 HEIGHT=355

[نور العين]

اخي العزيز مزمل ابداااع فكرة هذا البوست الجميل ..

وعذرا اتيتك متاخرة نسبة لغيابي الفترة المضت .. ولم اتشرف بالمرور عليه عندما بدأت ..

واي بداية ذاك التفرد الجميل لموضوع هذا البوست .. الذي يحمل اصالة وطيبة اهلنا ..

نتابع معك .. وساعود اليك مرة اخرى .. فقط حبيت احيييك واهنئيك على بوست يستحق الاشادة

[الطيب شيقوق]

الاخ مزمل

ما اروعك وانت تمتعنا بهذا السرد الجميل عن حجاجنا وطفولتنا الجميلة

احييك ايها العزيز ولنا عودة لنحكي معك عن طفولاتنا ايام زمان .

[مزمل محمد وداعة الله]

اخي العزيز مزمل ابداااع فكرة هذا البوست الجميل ..

وعذرا اتيتك متاخرة نسبة لغيابي الفترة المضت .. ولم اتشرف بالمرور عليه عندما بدأت ..

واي بداية ذاك التفرد الجميل لموضوع هذا البوست .. الذي يحمل اصالة وطيبة اهلنا ..

نتابع معك .. وساعود اليك مرة اخرى .. فقط حبيت احيييك واهنئيك على بوست يستحق الاشادة

العزيزة نور العين ، لك الشكر وانتي توقعين بصمتك الراقية على هذا البوست الذي يتشرف بمرورك الكريم
واتمنى ان يستمر هذا البوست بجهد واراء وتعليقات الاعضاء

[مزمل محمد وداعة الله]

الاخ مزمل

ما اروعك وانت تمتعنا بهذا السرد الجميل عن حجاجنا وطفولتنا الجميلة

احييك ايها العزيز ولنا عودة لنحكي معك عن طفولاتنا ايام زمان .

اهلاً بسعادة المستشار وينك غايب عننا
والله اتمنا انك تتحفنا بذكريات الطفولة وتحكي لينا عن الزمن الجميل في قريتك وطيبة الناس عندكم وبساطهم
نحن في انتظارك سعادة المستشار الطيب شيقوق

[مزمل محمد وداعة الله]

WIDTH=425 HEIGHT=355

[ابوبكر عزالدين]

المبدع اخي مزمل اعود اليك من جديد واحب ان اشارك معك في ابداعك فاارجوا نا تسمح لي بهذه المداخله فقط هي قصه غريبه قصها لنا بعض من زملائنا وهم يتجولون في بقاع ولاية سنار فحينما سمعت تلك القصة تسللت انت الى مخيلتي ويضا تسلل مخيلتي البوست الجميل بساطة الشعب السوداني .
حكى لي انهم واثناء تجوالهم في الولايه بغرض عمل مسح لتلك المناطق مروا بقريه تدعى ودالفاضل واثناء مرورهم وجدوا في الطريق ثلاثه اشخاص على قارعة الطريق وعندما توقفوا بالعربه ليسالوهم عن الطريق الصحيح فهم كانوا يقصدون قريه تدعى دبركي وذلك كله في منطقة شرق الدندر فاجابوهم انهم ايضا يتجهون الى تلك القريه فاخذوهم معهم فركبوا ثلاثتهم في العربه فطلبوا منهم الرجوع وسلوك الطريق الصحيح واثناء رجوعهم تفاجأ الجميع باهل القريه جميعهم يعترضون طريق العربه ويحملون اسلحتهم البيضاء ويحاولون مهاجمة العربه ومن بداخل العربه وكانوا يرددون عبارت (عائزين تاخدوا ارضنا والله ومافي زول حياخدارضنا نحن نموت فيها ولا زول ياخدها مننا ) فكان الشباب من ابناء القريه الذين اصطحبوهم معهم في طريقهم يرددون ديل ناس تلفونا ديل ماناس اراضي وهم يحمون زملائنا من اندفاع اهل القريه وكان الاشخاص الذين اصطحبوهم معهم في طريقهم بمثابه المنقذين لحياة هؤلاء الشباب وبعد هدوء الاحوال تناقشوا معهم ولماذا هم ارادوا ان يفعلوا بهم هذا فروا لهم ان عمدة القريه قد باع ارضهم بالتنسق مع الحكومه الولائيه وحين مهاجمتهم العربه ذلك لانهم ظنوا انها عربه المساح وانهم لن يسمحوا للحكومه اولاي شخص ان ياخذ منهم ارضهم وحينما عرفوا ان هؤلاء الناس ليس لهم علاقه بموضوع الاراضي وانهم ناس تلفونات ساكت تحولت القصه من حرب الى كرم فائق وترحيب واعتذار غير مسبوق وعون لامحدود يااااااااااااااااااااه يالبساطه هؤلاء الناس.
فكيف ترى اخي مزمل اي ضروب من ضروب البساطه ترى ذلك التحيه لاهل قرية ودالفاضل وهم يخرجون جميعهم نساءاً ورجال واطفال وشيبا وشباب وهم يدافعون عن ارضهم
شكرا اخي مزمل لهذه الفرصه التي منحتها لي لاقدم تلك القصه وارجوا ان تنال اعجابكم

[مزمل محمد وداعة الله]

الرائع ابو بكر لك التحية على هذه الرواية الحقيقية ولك الشكر وانت تتواصل في هذا البوست كما وعدتني وارجو ان لا تتوقف، والتحية عبرك للاهل في قرية ودالفاضل وقرية دبركي والتكنبري ونور الجليل والعزازة وام بقرة وكل قري محافظة شرق الدندر ولاية سنار والتحية لهم وهم يقفون ضد من يريدون سرقة ارضهم عنوة واقتدار، وانا اعرف اهل هذه المنطقة جيداً وقد زرتها مرات كثيرة ولي اهل ومعارف في هذه القرى ولى قصة رائعة عن كرم اهل التكنبري سوف ارويها لكم في هذا البوست
شكراً اخي ابوبكرعز الدين ولك اسمى آيات العرفان ولنتواصل

[مزمل محمد وداعة الله]

كان اخونا ابوبكر عز الدين قد ساقنا الى رواية عن اهلنا في شرق الدندر وبما انني قد وعدتكم برواية قصة قرية التكنبري فاسمحوا لي عبر هذا المنتدى ان اتوجه بالتحية والشكر لاهل هذه القرية على ما اتحفونا به من كرم فياض في رحلتنا
ففي خريف عام 1995 كنت مع اخونا حسن محمد يوسف ( والده ابن عمتي لزم ) وهو للتزكير من خريجي سنار الثانوية وعاش معي في سنار اجمل سنين العمر ، وهو ووالده واسرته يقيمون في قرية نور الجليل بشرق الدندر بحكم ان والدته من نور الجليل ويعملون بالزراعة المطرية ، ذهبنا في زيارة الى هناك ، تحركنا من سنار الى سنجة ثم الى مدينة الدندر التى وصلناها عصراً تناولنا الغداء في سوق الدندر ومن ثما توجهنا الى موقف مواصلات العزازة ابو ناموس ولم نجد البص ووجدنا ( لوري ) وكان به مجموعة من الناس والبضائع والشولات تملاء منتصف اللوري مما جعل الركوب سهل ومريح تحركنا من الدندر في الساعة الخامسة نحو نور الجليل ، المسافة الى هناك تحتاج الى حوالى 3 ساعات باللوري والدنيا بدايات خريف والمناظر بديعة وبعد ساعة من التحرك اذا بمطرة شديدة جدا قد بداءت في الهطول واللوري ماشي وتخيلوا المعاناة ، كل الركاب في الخلف اخدنا مشمع كبير وتغطينا به واللوري مواصل حيث الارض كانت زلقة حبتين وبعد مسافة طويلة وكلما تقدمنا كان المطرة اتقل واللوري يجد صعوبة في التحرك ، حتى وصلنا الى ما قبل قرية التنكبري بقليل واللوري رفض التحرك وغاص في الوحل والمساء قد حل علينا والمطر ينزل علينا وتتواصل المعاناة طبعاً انا الوحيد الغريب عن المنطقة عشان كدا كانت صعبة جداً على اما باقي الركاب بما فيهم حسن كانت عندهم عادية وكانو بيضحكوا علي ، المهم فكرنا انو مجموعة مننا تمشي الى التكنبري وتطلب النجدة وقد وقع علينا الاختيار انا وحسن وثلاثة شبان اخرين ، اخدنا المسافة مشياً على الاقدام لمسافة 2 كيلو متر وصلنا القرية واول بيت قابلنا سلمنا على صاحبو الكان قاعد في خلوة ( قطية وراكوبة جميلة خارج المنزل ) والراجل كان كبير في السن حبتين رحب بينا ( مرحب بالضيوف خشوا لي جوا جاي )
دخلنا الى القطية وكانت المطرة وقفت وسلمنا عليهو وحكينا ليهو الرواية ، الراجل قال عوجة مافي البيت بيتكم والناس في اللوري بنجيبم ليكم ، انا هنا فرحتا شديد ، اها الراجل طلع ومشى البيت بتاعوا وبعد شوية جانا ومعاهو 2 من اولادوا الكبار و2 من الجيران وجابوا معاهم موية وعشاء اكلنا وبعد كدا قام واحد ومشى وجانا سائق التراكتور بتاعو وقال يلا نمشي نجر اللوري ركبنا كلنا في البابور ومشينا اللوري وجريناهو لحدي الحلة ، والراجل حلف انو مافي زول يتحرك لحدي الصباح عشان المطرة ممكن تجي تاني وبالفعل النسوان ساقوهن للبيت والرجال حوالى 15 نفر اتقسموا لي قسمين في قطتين متقاربات والراجل واولادوا جابو العشاء لكل الناس والشاي ورحبوا بينا ترحيب حار والله انا في اللحظة دي قربتا ابكي من الشفتو الراجل الكبير واقف على حيلوا ورفض ياكل وماسك الموية والابريق وبخدم علينا ويمشي البيت يجيب الملايات والموية لمدة ساعتين قائم على خدمتنا لحدى ما نومنا ، وفي الصباح الباكر صحينا لقيناهو قاعد في الراكوبة برا وخاتي الشاي والزلابية ومعاهو كل الجيران ، ودعناهم وركبنا اللوري وواصلنا رحلتنا ، والله الشفتوا في التكنبري اجبرني على تسجيل صوت شكر لكل سوداني مازال يحتفظ بكرم وشهامة اولاد البلد والتحية عبركم لاهلنا في التكنبري وللشيخ المضياف وللاسف انا نسيت اسمو لكن اذا كان عايش فله الشكر واذا كان ربنا قد اخذه عنده فله الرحمة ونواصل ......

[بورتبيل]

الحبيب مزمل .. ولله ذكرياتك جميلة جداً .. والتحية عبرك لكل اهلنا في الدندر .. وفي التكمبري
بعدين تعال هنا ( ليه ما قلتا ليا اختاروك مشرف؟؟) شكلك داسي الكفر مني؟؟ على العموم خليك مواصل في البوست الجميل دا .. وحقيقة الشعب السوداني مازال يحتفظ بالكثير من الخصال التي قد لا تجدها في شعوب الارض.

وبجيك راجع تاني باذن الله

[مزمل محمد وداعة الله]

مشكور يا مدثر على الاطراء وعزراً لاني ما خبرتك باختياري ضمن كوكبة المشرفين ودي قلادة على صدري من ادارة المنتدى وثقة اتمنى ان اكون قدرها لنعمل جميعاً من اجل خدمة المنتدى وخدمة سنار

[سنار انتي دمي]

فعلا الشعب السوداني شعب طيب ، ونيته سليمة . وفيه كثير من صفات الخير ، والتى بدأت تندثر قليلاً ، كما ان الطيبة تتمثل في الجيل القديم من السودانيين ثم الاقدم ثم الاقدم ، ومميزات هذه الطيبة للاسف مع الافنتاح الفضائي (اقول الفضائي) لان كل شئ بقي معلق في الفضاء ، وانت تختار ،،،، فالجيل الحالي لديه مسئولية كبيرة للمحافظة على الطيبة . والطيبة تتجلى في اسمي المشاعر السودانية الحنينة التى تنزع لنصرة الضعيف والوقوف مع الجار والمسافر والتكافل الاجتماعي مابين الاسرة الواحدة وبين اهل الحي ومن ثم المشاركة في المناسبات افراحها واتراحها ..... السوداني دائما بشوش ويصعب ان يقول لك لا ،،،، ابدا ابدا ،،، دائما تجده يجامل ولو كان جاء ذلك على حسابه وحساب صحته وحساب راحته واحيانا عمله واسرته ،،،، والنماذج امامكم كثيرة ، فقط ما عليكم الا ان تنظروا من حولكم ....
الطيبة المقننة جيدة ، والمحافظة على الخصال الطيبة مهم ... واشاعتها ضرورة بين افراد المجتمع كافة ... ولك مني كل احترام وتقدير

[تهانى]

أخي سنار انتي دمي .. لك التحيه .
مشكور أخي السناري ، ولقد التقينا في بوست جديد وحوار مختلف في الموضوعيه لكنه متفق في المبدأ فيما ناقشناه في بوست أسئله منطقيه جدا. وقبل أن أدخل في الموضوع أريد أن أقدم عظيم تقديري واحترامي للمبدعين الرائعين أخواني عبد القادر الجيلاني و مزمل محمد وداعة الله ، هذين العلمين اللذين مهما قلت فيهما لم اوفوهما حقهما وهما أصحاب البوستين المميزين والشكر موصولا لك أخي سنار انتي دمي صاحب القلم الناري ( قلم من رصاص ).
ندخل في الموضوع :
أخي أنا اتفق معك في كل ما كتبت في طيبة الشعب السوداني وفعلا توجد اشياء كثيرة أندثرت في كم جيل بعد اجدادنا وابائنا وملاحظتي أن الطيبه ما زالت موجوده باجمل ثوبها في المناطق النائيه والقرى البعيده عن المدينه وكلما اقتربنا من الحضر صارت هناك متغيرات كثيره وتبدلت اشياء جميله محفوره في الذاكره والواضح في ذلك أن الانسان كلما ترقى في حياته وعاش حياة المدن اندثر كل ما هو جميل وطيب فيه .
ولدى ملاحظه أخرى الا وهى السوداني في بلاد الغربه تبدل وتغير دوره كامله ( 360 درجه ) أصبح الجار لا يعلم عن جاره شيء ايام واسابيع واحيانا كثيره اذا وجده في الطريق لا يسلم عليه ولا يسأل عن صحته وأهله وكأنه لم يرضع ويشبع من طيبة هذا الشعب وكثرت الاحقاد والمشاكل بين المغتربين وكأنهم ليس أبناء بلد واحد وتراب يشهد لما سبقونا بالاصاله والطيبه ،
وعندما أرى الشعوب الاسيويه وتكاتفهم وتكالبهم كالنحل داخل الخليه لمجرد أن وقع فرح أو مكروه لأحدا منهم وفيهم المسلم وفيهم الكافر ، والشيء المؤلم أن هذه الصفات كانت لنا نحن السودانيين وعلامة نحملها فوق صدورنا ورؤسنا واذا توفرت فهى عند البعض وزمان كانت عند الكل .
أسفه للاطاله واعذورني لكن من يحمل الهم السوداني يجد نفسه مكلوم دائما .
لك كل الاحترام والتقدير .

[مزمل محمد وداعة الله]

الله الله الله الله
والله انا سعيد جداً الليلة بالطرح والمداخلة الرائعة والجميلة من الاخ سنار انتي دمي والرد والمداخلة الاكثر من رائعة من العملاقة تهاني واثراء البوست بالنقاش الجاد والموضوعي ودا الهدف الانا قصدتو من طرح بوست بساطة الشعب السوداني عشان اشوف تقييم الاعضاء للموضوع واراءهم الجميلة والراقية حول هذا الموضوع الحساس وحقيقة شد انتباهي كلام الاخ سنار انتي دمي عن ابتعاد الانسان السوداني عن ماضي الاسلاف
وكذلك موضوع المغتربين في مداخلة العملاقة تهاني والتي اتفق معها تماماً لاني معايش الواقع دا هنا في الدوحة ....
اذا نحنا بداءنا مرحلة جديدة في البوست مرحة طرق المشاكل البتعيق بساطة الشعب السوداني وبتحاول تبدل من خصاله والبحث عن طرق معالجة ليها خصوصاً عند المغتربين لذلك دعوني اوجه الدعوة الى كل الاعضاء للمداخلة في الموضوع كل واحد حسب وجة نظرو البيراها ونخلي البوست دا ندوة عن لماذا بداءت تتلاشي بساطة الشعب السوداني وارجو انو كل واحد عندو وجة نظر او راي يمدنا بيهو ونتحاور بموضوعية لنجد الحلول المناسبة للمشاكل ونطلع في الاخر بتوصيات وحلول
اخي سنار انتي دمي ، اختي العملاقة تهاني لكم كل الود والشكر على الطرح والمداخلة وارجو الاستمرار
ولكم مودتي ،،
( نلتفي اخوة ، نتحاور بموضوعية ، ونفترق على الصفاء )

[تهانى]

أخي مزمل .. لك التحيه والاحترام
أشكرك أحي مزمل على هذا الاطراء وهذا البوست الرائع الفضفاض وحقيقي حقيقي لقد فتحت لنا آفاق للنقاش والتحاور وما دام هذا البوست أصبح دار للندوة لمناقشة السلبيات والتغيرات التي طرأت على الانسان السوداني البسيط .
فلي عوده معكم مره أخر لكي أسرد لكم اشياء من واقع الحياة وعايشتها فعلا.
انتظروني .

[مزمل محمد وداعة الله]

العزيزة والعملاقة تهاني ...
لك خالص التحايا ونحنا في انتظارك عشان تطرحي لينا التجارب بتاعتك الخلتك تصري على طرح راى سليم ونقاش هادف وانا كمان حا اديك امثلة حية عشتها في الغربة عن ابتعاد الجيل الحالي من موروثات الشعب السوداني السمحة
ولنا عودة
خالص مودتي واحترامي ،،،

[مزمل محمد وداعة الله]

الاحباب الكرام رجعنا ليكم بعد ما وقفنا عند مداخلة الاخت تهاني عن الغربة واثرها في ابتعادنا عن بساطتنا الجميلة
والليلة خلوني اطرح عليكم قصص حقيقية عايشتها وانا هنا في الدوحة عن ناس سودانيين بالاسم بس اما الخصال والملامح فللاسف اتشوهت واتبدلت بداعي العولمة والنيو لوك ، نيو لوط في الثوابت والاخلاقيات والوطن والدين اعوذ بالله من ديل ناس ناس يفقعوا المرارة ..
الشواهد كتيرة والقلب يدمي والله لناس بدلوا اخلاقم وقيمم الفاضلة وشوهوا صورة الانسان السوداني الامين الكريم المهذب المحتشم النزيه واصبح ينظر للسوداني نظرة تانية فيها نوع من الحسرة على السوداني الزمان ...
عندنا هنا في الدوحة بعض الاخوان والاخوات والله محسوبين علينا سودانيين وهم ابعد ما يكون عن السودان
مرة من المرات كنا في السكن بتاعنا شلة عزابة مجتمعين ونسة وضحك وذكريات جميلة ولمة صحاب بداء النقاش عن السودان والاهل وكيف البلد وكدا .. كان معانا في السكن اتنين مخلوعين بالمدنية والاغتراب وعايشين دور تاني غير الدور الحقيقي بتاعم واحد منهم قال :( سودان شنو هو السودان دا بلد يبكوا عليهو والله انا ما بتشرف اكون سوداني ) الغريبة انو الزول دا كان جادي جداً وقاصد كلو كلمة قالا وبيعنيها الناس كلها صمتت الا انا زعلتا جداً من كلام الراجل دا ودمي فار وقربتا اشتبك معاهو لكن لعنتا ابليس وقلتا في نفسي احسن اناقشو بالحسنى اشوف الراجل دا فهمو شنو ؟؟ وسالتو سؤال واحد يا اخوي انتا بتنبز في السودان كدي جوازك شنو امريكي ولا بريطاني
سكت مسافة وسارعتو بالسؤال ياخي ما ترد كلامي ما عاجبك قال لي لا انا جوازي سوداني
ايواااااااااا جوازك سوداني ؟ ولي ما غيرتو ؟
اغيرو كيف انا لاقي وما غيرتو؟
ايوااااا ما لاقي جواز تاني مش كدا
ااااي ما لاقي ..
اهاااااا طيب ياخي انت بتناقض نفسك بنفسك السودان ما عاجبك ولا هو بالنسبة ليك بلد تحبو طيب ياخي السودان الما عاجبك دا اداك حاجة حرمك منها العالم كلو اداك اسمو الانت بيهو جيت هنا وعملتا ليك حبة قروش وعربية وبيت ولبستا ليك هدوم سمحة وبقيت تنبز فيهو يعني رديت ليه الجميل بتاعوا احسن رد ..
يا اخي اتقي الله يا اخي السودان دا ما امك وابوك واخوانك واهلك واصحابك واولادك وذكرياتك الجميلة واتخيل لي الحاجات دي هي الوحيدة الما ممكن تشتريها بالقروش والدليل حاول انك تلم قروش العالم دا كلو وشيلا وفتش ليك زول يبيع ليك اهلو وناسو ولا ذكريات طفولتو ولا يبيع ليك وطن والله الوطن دا الحاجة الوحيدة الما بتقدر تشتريها بالمال لو لفيت الدنيا دي كلها ..
بالله عليك احترم نفسك واحترم الناس القاعدا معاك هنا واوعك تاني مرة نكون قاعدين تنبز السودان او تسي لينا كسودانين بنحب الانتمقاليدنا وناسنا واذا عملتها مرة تانية انا حا اخسرك لانو خسارة واحد زيك مكسب ..
الراجل سكت ولبس وطلع وبعد يومين حس بانو غلط في حقنا وحق بلدو جاء لملم ملابسو واغراضو وانكشح يفتش ليهو سكن تاني مع ناس تانيين ..
دا نموزج لناس اتنكروا لاصلهم ولبلدم واتغشوا بالمظاهر الخداعة والغربة
الامثلة العشتها كتيرة وحا احكيها ليكم تباعاً
بكرة بحكي ليكم قصة العروس الرسلوها( طرد ) للعريس صديقنا في الدوحة وفي حفلتا قعدت تبكي وقالت لينا كلام بكانا معاها ..

[تهانى]

أخي مزمل .. لك التحيه والتقدير
والله طرحك جميل وعجبتني حرارة دم الرجل السوداني الأصيل الكثير منا طلع من السودان للبحث عن حياة أفضل وهذه سنة الحياة وليست بالشيء المعيب وفي رأي القوميه والوطنيه لا تحتاج لجواز أو ورق يثبت ذلك ومثل ذاك الرجل الذى ذكرته يفتقد للاصاله والما عنده خير في بلده وناسه ما عنده خير في اي مكان تاني ، الرسول صلى الله عليه وسلم عندما طرد من مكه وطردوه أهله ، وعاش في المدينه كانت روحه معلقة بمكة وأهلها وجاهد وحارب للعوده اليها رغم ما وجده من كرم وحفاوة واستقبال في المدينه ، فهل كان مرفه ومنعم في مكه حينما طرد ؟ ابدا لقد حوصر ثلاثه سنوات وجاع وأكل ورق الشجر وعذب كل انواع العذاب ورغم ذلك اراد العوده لبلده وأهله وناسه ، فالمسأله مسألة انتماء واصاله ليس الا .
أخي مزمل.. حكاوي المغتربين خارج السودان كثيره ولا أدري ما هو السبب هل هو خلعة بالنعم المستحدثه أم نكران لبعضنا البعض .
الجار ما بيعرف عن جاره شيء ايام واسابيع واذا تقابلت معه في الشارع يجري منك والنظام نظام مجموعات انت ما من مجموعتي ما عندي علاقه بيك ، انت وقفت معاي في الفرح والكره انا باقيف معاك سبحان الله أين انتم ابناء السودان الحر . وأين انتم يا مسلمين .
لي عوده اخي مزمل وفي انتظار قصة العروس .

[مزمل محمد وداعة الله]

مشكورة اختنا الفاضلة تهاني ودا الواقع النحنا عايشينو في الغربة بدون اي زيادة او مبالغة
وزي ما وعدتكم امس حا احكي ليكم قصة العروس البكت من الحال في الغربة يوم زفافا
بداءت القصة بانو واحد صديقنا مقيم معانا فكر في الزواج من قريبتو بالسودان وحسب ظروف شغلو كان صعب عليهو ينزل السودان عشان يعمل مراسم الزفاف قام فكر في انو يجيب العروس واهلو ويعمل العرس في الدوحة وبالفعل اكتملت المراسم في السودان وسافرت العروس واللكانت انسانة مثقفة وخريجة كلية علم النفس في جامعة سودانية شهيرة وعندها دراسات عليا في المجال دا ...
المهم نحنا هنا حضرنا مراسم الاستقبال للعروس مع العريس وشلة الاصحاب وحجزنا صالة في فندق وسط الدوحة للحفلة وعزمنا كل المعارف والاصدقاء ويوم الخميس وصلت العروس ويوم الجمعة كانت الحفلة والمعازيم اتوافدوا على الصالة وشئ يحيرك ياربي ديل سودانيين والله انا واقف خارج الصالة والناس بتدخل البنات لابسات لبس عجيب ولا بنات ال L B C شئ مفتح وشي محزق وشئ مافي شئ والشعر مفكوك والمكياج يجهرك خليك منهن ديل بنات تعال شوف الشباب بعض الشباب المخلوعين بالغربة لابسين اردية جنز وفنائل كت الواحد عمو 30 سنة وما محترم نفسو والحلاقة والشعر المضفر والسلاسل حاجة تفقع المرارة ، والله العروس اول ما جات من الكوفير ودخلت الصالة حسيت في عيونا نظرة دهشة واستغراب وهي ما مصدقة انو ديل سودانيين ولا دي حفلتا بقت تتلفت وتعاين للناس مع العلم انها على قدر كبير جدا من الجمال وما ابالغ اذا قلتا ليكم اجمل واحدة في الحفلة ولابسة فستان زفاف حشمة وحاجة تسر الناظرين لكن صدمتا كانت في الناس الحواليها ديل ليه الناس اتبدلت واتغيرت ملامحا وطباعا وتقاليدنا وقيمنا اضرب بيها عرض الحائط ودا كلو عشان تقليد اعمي لي ناس ما بيشبهونا لا في تقاليد ولا قيم ولا حتي دين العروس مندهشة بتمد ايدا للناس المباركين وعقلها بعيد جداً والنظرة تكبر وتكبر وفجاءة اتكونت النظرات دموع وادفقت في حشمة خجلانة وتحاول تضاريها وتمسحا بي منديل هزيل الناس كلها في زحمة الجوطة والخمج ما حسو بيها كان جنبي صديقي المهندس عمر سعد كامل والغريبة كان بيفكر في نفس افكاري ويلمح دمعات العروس التفت لي وقال لي ( يا مزمل اسالك سؤال ؟) العروس دي تفتكر بتبكي لي عشان فاقدة اهلا والسودان ولا عشان حاجة تانية ؟؟
انا فهمتا قصدو وابتسمتا لاني حسيت بانو حس بنفس احساسي قلتا ليهو والله انا حاسي انو في حاجة اكبر من كدا خلتا تبكي وانا حالف اني لازم اسالا في يوم من الايام من سبب البكى دا ...
المهم اليوم انتهي بكل حاجاتو الشينة الشفناها دي
وبعد اسبوع قررنا نحنا العزابة كلنا نعمل عزومة للعرسان في احد فنادق الدوحة وقد كان عملنا حفلة عشاء يوم خميس وجاء العرسان وانا عزيت حليفتي وقعدت جنب اختنا العروس الزولة الفاهمة والمثقفة وقلتا ليها ( والله عندي سؤال محيرني من يوم الحفلة وما قادر اكتمو اكتر من كدا يا ريت تجاوبيني عليهو ) ابتسمت ابتسامة عريضة وقالت لي في ادب شديد بس كدا حااااااضر يا مزمل اسال طوالي وما تتردد
السؤال هو سبب الدموع النزلت منك يوم الحفلة يا ترى كانت بكاء علي فراق الاهل والبلد ولا على الحال التعيس الشفتيهو هناك ؟
العروس اتلجمت ونظرة لي نظرة دهشة شديدة جداً وقالت لي ( والله لكن يا مزمل لقيتك زول متابع بطريقة ، عليك الله فكرتا لي كيف ؟ بالجد انا اول ما دخلتا الصالة وشفتا الناس حسيت انو دي لا يمكن تكون حفلتي وفكرت ارجع الناس ما ياهم الناس اشكال عجيبة ولبس غريب وتقاليع في غاية الغرابة ، وسرحتا في سوال ياربي حا يجي يوم وانا اكون واحدة من المجتمع دا ويفرض علي اعيش نفس الواقع المرير دا ، حسيت انو معظم الناس الجوه الصالة ديل ناس سطحيين ما عندهم موضوع هادف ولا هدف في حياتم غير التقليد والمظاهر الخداعة البنات مثلاً طريقة اللبس والرقيص والمكياج لا يمكن تكون سودانية ابداً لو حلفت على المصحف والاولاد اللابسين السلاسل والاردية والفنائل الكت واكتافم برة كانك في شيكاغو ديل ناس شنو ودا مجتمع شنو دا والله يا مزمل انا اتصدمتا وفكرتا اني ما اقعد هنا وارجع السودان وصاحبكم دا يا يرجع معاي يا يقعد ويجي في الاجازات انا ما متصورا انو الناس هنا وصلوا لدرجة من الانحطاط بالشكل دا ..
قلتا ليها والله يا استاذة انتي ما شفتي حاجة لسا وانا ما داير اخوفك لكن انتي حا تشوفي وتعايشي الواقع بنفسك ..
هنا اتعدمت فينا شهامة السودانيين ورقة قلوبم وخوفم على بعض ، حتى الترابط الاجتماعي الجميل انعدم والله امكن يكون جارك سوداني وما تعرف عنو اي حاجة غير اسمو ويمكن اسلم عليك ويمكن لا وينظر ليك نظرة استهجان وسخرية تغيظك
المهم انتي حاولي تكيفي نفسك على وضع معين وتختاري اصدقائك بدقة والمجتمع الحاتعيشي فيهو حاولي تغيري نظرتم السطحية للاشياء ولمفهوم الحياة في الغربة حسب دراستك وابحاثك امكن تقدري تغيري من ملامح الوجه المشوه اللعبت فيهو يد الغربة والمجتمعات الهدامة والعولمة الكذابة ..
انتهى اليوم مع العروس والعريس وبعد فترة دعونا للغداء معاهم في بيتم يوم الجمعة والله اول ما دخلتا الشقة حسيت باني في السودان من رائحة البخور السوداني وطريقة الديكور السودانية البحتة وحتى الاكل كان سوداني الشكل والمذاق والترحاب زكرني بالبلد الحنان اهلا وقالت لي العروس رايك شنو يا استاذ اتزكرتا البلد ولا شنو وضحكنا وراودني احساس انو امثال هذه العروس هم وحدهم القادرون علي اعادة جماليات الحياة السودانية بزرع حب البلد والتقاليد في النفوس الضعيفة والعودة ادراج الزمن الجميل ..الله يديها ويدي زوجها العافية

[مزمل محمد وداعة الله]

بساطة من نوع جديد متميز بيها بس الشعب السوداني ، يعني لو لفيت الدنيا دي كلها ما بتلقى حاجة مماثلة ليها في العالم دي بساطة التعايش وقبول الغرباء المقطوعين من شجرة زي ما بيقولوا ودمجهم في المجتمع ومعاملتهم كافراد من هذا المجتمع ودي واضحة اكتر عندنا نحن ناس القري ، يعني مثلاً يجي واحد من اقصى الشرق او الغرب فرضت عليهو ظروف معينة زي ظروف الحرب او الجفاف والتصحر انو ينزح لوسط السودان قاصد مشروع الجزيرة عشان يشتغل بالزراعة او الرعي حسب المهنة الهوا بيتقنا ويجي داخل القرية واول بيت يطرق بابو ويسلم يرحبوا بيهو يكرموهو ويقعد في الديوان ويبيت الليلة الاولي ويتعشي ومافي زول يسالوا انت منو وجاي من وين وكايس شنو لحدي بكرة الصباح ، يشرب شاي الصباح وبعدين رب الاسرة يسالو ( مرحب الضيف الكريم من وين ؟ ) يرد عليهو ويطلب منو انو يشوف ليهو شغل في مجالو والراجل لو محتاج لواحد يزرع معاهو او واحد يسرح بالبهائم يبقي الضيف مشاكلو اتحلت او ممكن يدلو على زول تاني يشغلو المهم في الاخر الضيف دا خلاص لقى ضالتو واشتغل اشتغل ومن يوما يصبح واحد من ناس الحلة والناس تبداء تتعرف عليهو ويحبوه ويحبهم ويبقى واحد منهم وكتيرين جداً موجودين الان وكونوا اسر هم اصلاً دخلوا الحلة بالطريقة دي واصبحوا يتزوجو من الحلة وينصهروا في مجتمعا ودي بساطة الشعب السوداني ..
اديكم مثال بقصة واقعية حصلت في بورتبيل القرية الانا منها ..
بطل القصة رجل كبير في السن اسمو الانا بعرفو بيهو والناس كلها بتعرفو بيهو حتى الناس العاش معاهم ما بيعرفو غير الاسم دا هو ( السليك ) لكن اسمو الحقيقي منو ولا هو جاء من وين ما معروف والراجل توفى رحمة الله عليه
المهم من ما قمنا صغار في الحلة كان السليك راعي الاغنام موجود وبنشوفوا على طول كان موجود مع عم لينا اسمو ( حماد ود بابكر ) الله يمد في عمرو والسليك دا امكن يكون عاصر عمنا حماد من وقت بعيد جداً وربا معاهو كل اولادو ومافي زول عارف القصة الحقيقية للسليك الا هو والله سبحانه وتعالي المهم السليك جاء الحلة بدري جداً واستمر في العمل بالرعي مع عمنا حماد وعمرو امكن ما جاهو زول قال انو قريبو او من اهلو ولا هو زاتو سافر قال ماشي يشوف اهلو
كان السليك راجل مسكين ولطيف وحبوب وصاحب مداعبات لطيفة لهجتو وسحنة بشرتو بتوحي ليك انو من ابناء غرب السودان ، كان عندو اغنام شهيرة جداً في الحلة وبيضربو بيها المثل لانو كان راعي ( لميمة ) يعني تجمع من اغنام الحلة من هنا وهناك وكان موعد انطلاقو بالاغنام للخلاء بيزبطوا بيهو الساعة في الحلة اقول ليك بنطلع بعد غنم السليك بساعة لانو السليك راجل بتاع مواعيد الساعة ثمانية لازم كل الاغنام تكون اتلمت في الميدان تمانية وخمسة الا تسرح باغنامك براك لانو ما بستلما منك عشان كدا الناس اتعلمت المواعيد من السليك ، والراجل في دوامة الشغل وارتباطو باغنامو عاش في الحلة وعمرو مافي زول سال منو ولا في زول اداهو عوجة بالعكس كان كل الناس في الحلة بيحبوه وبيعطفوا عليهو لانو راجل مسكين جداً ، ومرت سنوات طويلة جداً والسليك اصبح رمز من رموز القرية وفرد فعال في مجتمعا الى ان حان ساعة رحيلو من الدنيا وللامانة اسرة عمنا حماد كلها لم تقصر مع هذا الرجل وشملتوا بعطفها وكانت بتعدو واحد من افراد الاسرة ويمدوهوا بكل احتياجاتو وعوضوا عليهو فقد اهلو وناسو لحدي ما جاءت ساعة الرحيل وتوفى السليك الى رحمة الله تاركاً ورآه فقط ذكريات من سنين قضاها بيننا غريباً ولا أظن ان احد احس برحيله سوي أغنامه التي ارتبط بها بعلاقة صداقة جسدت غربته كما الغرباء جاء وكما الغرباء رحل فطوبى لكل غريب ساقته اقداره الى البعيد وله الرحمة .
هكذا هو الشعب السوداني بسيط في تالفه ورحمته واحتواه للناس في اريحية نادرة
نواصل ،،

[مزمل محمد وداعة الله]

انشد المغني يصفها فقال
عارفك جميلة وزايدة في البنوت حلا
والمال عليك يا غالية ابداً ما غلا
لكن ظروفنا القاسية كيف بنبدلا
وفاضل وحاتك بس نفوسنا نندللا
عايش وحيد بلدي الفيها الحور بنات
عاشق جمال بنوتنا سمحات الصفات
ما تقولوا خير وباركو العرس يالامهات

تغزل في جمال وادب بت البلد الفتاة السودانية المتفردة بصفات معدومة تماماً في كل نساء العالم في كل شئ الفتاة السودانية متميزة من اول حاجة نمسكا اللبس وطريقة اللبس عند السودانيات حالة متفردة مثلاً البنت السودانية بمجرد ما تصل لمرحلة النضوج ( البلوغ ) بداءت ملامح السودنة تبين على زيها وطريقة لبسا ، الاسكيرت والطويل الساتر والبلوزة بالاكمام والطرحة يعني انك تشوف شعرا دا الا يكون صدفة لما الهواء يرمي الطرحة غصباً عنها دا للجامعة او المدرسة او المرقة في مشوار مع الاسرة او زيارة صديقة اها في الحلة البت لو واقول لو لانها ما لازم تعمل الحاجة دي الا في الضرورة وهي ماشا الدكان تجيب ليها حاجة البت لازم وهي طالعة للدكان تلبس التوب السوداني الجميل وعادة بيكون التوب دا حق امها او اختا الكبيرة وتتلفح تمام وتمشي وترجع باسرع ما يمكن ومستحيل تقيف في الشارع عشان تتكلم مع زول الا سلام من بعيد ولو شافت زول غريب عينا تقع في الارض لحدي ما تخش باب الحوش ، وفي البيت بتكون لابسا جلابية البيت المعروفة الحشمة واذا جاهم ضيف تجري تخش جوة الغرفة واذا كان لازم تسلم على الضيف اما تلبس التوب مرة تانية او تلبس ليها طرحة ساترة وتسلم وترجع على طول ، دا في البيت اها في المناسبات الخاصة والعامة البنات اهل المناسبة ديل مسموح ليهن البسن الضيق للحفلة بس في حدود المعقول يعني المفتح واللاصق والمبين للمحارم لا والف لا اخوها الكبير او ابوها بكسر رقبتا من باب الترهيب عشان كدا بتحاول تلبس حاجة جميلة ومعقولة ( مع العلم انو الكلام دا والله بداء يتغير شيئاً فشئيا ) لانو والله البنات في العصر الجديد الغريب دا بدوا يحاكوا الغرب والعرب المنفلتين اخلاقياً ويلبسن العجب العجيب والغريبة الاسرة شايفة وما في كسر رقبة ولا ترهيب والله وصلت لدرجة ( السرة برة ) لا حول ولا قوة الا بالله يعني العريان في الاكتاف والطرحة الشفافة ما كفى الله يستر من البرمودا والرداء ... اما المكياج زمان البنت بتعمل احمر الشفاه بالدس وحاجة خفييييييفة التقول شاحداها والكحل برضو خفيف ، تعال شوف الليلة البنات والله الواحدة وشها زي دكان قدر ظروفك من كل رف جلطة الوش زي علبة الالوان والاحمر شفاه يجهر الفنان والرموش تقد عينك والظلال يرقش التقول كوشة عروس حاجة تسوي المغص ودا كلوا بيخلينا نتحسر على بساطة البنات زمان وادبن وخوفن على سمعتن وسمعة الاسرة
والله الواحدة في الحفلة تقعد بعيد وفي حتة ظلام عشان الناس ما يراقبوها بنظراتم ولو داير ترقص مع واحدة تقعد تحنسا ساعة ونص وتكون دي بت خالك ولا بت عمك اما بنات الحلة اذا قلتا ليها داير ارقص معاك امكن تعضيك او تخلي ليك الحفلة وتمشي تنوم الزمن دا البنات ينادن الاولاد للرقيص زمن عجيب ...
اها البنات زمان من سن ال12 سنة تخش المطبخ مع امها وتتعلم الطبيخ عشان بعد الزواج ما يكون ناقصا حاجة في بيتا وتقدر تمسك بيتا تمام الزمن العلينا دا البنات اتمسخن الواحدة ما بتعرف تقلي بيض في طوة وكان خشت المطبخ مجبورة ما في زول بيخش بعدا لانو المطبخ بيكون زي الانفجرت فيهو قنبلة الملح مع السكر والشطة في صحن التحلية وباقي الخضار مرمي في المسطبة وحالة ما يعلم بيها الا الله احسن منها ما تخش كلو كلو ..
البنت زمان لما تخش الجامعة دا حدث كبير في الاسرة وتمشي الجامعة عشان هدف واحد تقراء وتتفوق عشان تتخرج وتساعد اهلا في البيت بعد الشغل يعني عندها هدف اما الزمن العلينا دا البنات بقن يخشن الجامعة اكتر من الاولاد وهدفا انها تتفك من ربطة الاسرة والعادات والتقاليد وتتعرف علي ناس جديدة طبعاً دا كلو ما مشكلة لكن طريقة اللبس في الجامعة والجلوس مع الاولاد خارج نطاق الدراسة وتكسير الوقت في علاقات عاطفية مع اكتر من واحد هو المصيبة البتعود عليها في الاخر بانها ترسب وتشيل ليها مادتيين وتعيد السنة وتتخرج في ستة سنين ( مين المسئول عن دا ) وكمان ظهرت عادة جديدة لبناتنا ما كانت موجودة وهي ظاهرة شراب السيجار والشيشة اااااى سيجار وشيشة والمكضبني يخش يشوف الفضائح بتاعت بنات الجامعات المصورات بالبلتوث في الانترنت والله شيشة طولا مترين وفي نص الاولاد ولابسا قصير كانها في فلم اجنبي ولا شوفوا فضائح العلاقات الفاضحة مع الشباب في بيوت العزابة الواحدة منهن تقول لناس البيت قاعدة في الداخلية او ماشا ابيت مع صاحبتي وفي الحقيقة هي بايتا مع شباب في بيت عزابة حسبي الله ونعم الوكيل ..
والله دي ما البت السودانية المادبة بادب السودانيين وبساطة اهلنا السمحة
شلليات دخلت على مجتمع الفتيات السودانيات وادخلت ليهن ادب جديد وثقافة هدامة ومميتة ، حاجة ما بتشبه السودانيات الحرات البنعرفن نحنا ونحترمن ونعزهن ونضحي بالغالي والنفيس من اجل كرامتن وشرفن وعزتن
الفتاة السودانية البنعرفا موجودة في كل فتاة بس تنفض عنها غبار الخنوع والجري ورا العولمة وملذات الدنيا والشباب الفاسد وحا ترجع حواء سودانية جميلة ومفخرة نعتز بيها ويرجع التوب السوداني الجميل يرفرف في اكتافا حاجة تسر الناظرين

ونرجع تاني نغني ليها
يا بت بلدي با بت سوداني
انتي جميلة وزيك وين
حشمة في توبك وتملي العين


http://www.anasudani.net/4images/data/media/9/faces_96.jpg?sessionid=8abd922cfa8ebbef4c58b5bda1f 76a24

[ابوبكر عزالدين]

الرائع مزمل حقيقة تحدثت وواوفيت ولكننا نرجع ونقول من المسؤل ومن اين اتت تلك البنت الدخيله على البنت السودانيه انها بالفعل ليست هي نفس البنت السودانيه التي نعرفها انها لاتشبهنا ولا تشبه شئ في بلد المليون ميل مربع ...
حسب رؤيتي المتواضعه ان الاسباب كثيره لتلصص هذه البنت التي لانعرفها ودخولها مجتمعنا البسيط منها الغزو الغربي لثقافتنا الشرقيه عبر الفضائيات قبل تلك الفضائيات كنا لانعرف تلك الاشياء فدائما الاشياء تبداء صغيره ولكن للاسف انها تنتهي كبيره فتبداء حينما يرى الاب او الاخ في المنزل ان بنته تشاهد افلام وبرامج فيها كثير من خدش للحياء ولايكون له دور في التوجيه فهذا يعني قبول الاسره بتلك الاشياء في مجتمعها او شويه شويه حتى وصلت الى ماوصلت اليه شكرا لك اخي مزمل على هذا الموضوع الرائع ولكن لا يظل سؤالي قائم من المسؤل هل هي البنت ام الاسره لك فائق مودتي واحترامي ولنا عوده

[مزمل محمد وداعة الله]

الرائع ابو بكر عز الدين
لك الشكر على المداخلة الجميلة والسؤال الملح والذي يبحث عن اجابة حتى نعرف مكمن الداء لنتفادي المصائب التي تجر بناتنا الى هاوية سحيقة ، اتفق معك ان هذه البنت الدخيلة على المجتمع السوداني هي ظاهرة غريبة وفي راي المتواضع ان الجميع مشترك في ادخال مثل هذه البنت الى مجتمعنا الاسرة والاصدقاء والفضائيات والبنت نفسها شريك اساسي في القضية لانها هي الوحيدة القادرة على طرد مثل هذه البنت ونفيها من المجتمع لانها اذا فعلت ذلك جنبت نفسها واسرتها والمجتمع السوداني باثره هذه الشيطانة والكارثة
ويظل السؤال مطروحاً للنقاش ..
اشكرك ابو بكر وارجو ان تستمر المداخلات في هذا البوست لاننا حولناه الى ورشة عمل لطرح قضايا ومحاولة ايجاد الحلول
لك ودي

[الطيب ادريس]

مزمل بورتبيل أين أنت أيها العملاق ، لقد اشتقنا للبساطة ولعب الحدبة وشقاوة أطفال وكلام حبوبات والزول الجاي من الحواشة ويادوب ما رقد ونادوه في الديوان .. ناس علي منتظرنك بالغدا ..

استمرارك واجب يفرضه علينا قلمك المبدع
واصل يا مزمل نحن في الانتظار .

[Adil Sayed]

مزمل اخوي احسست بين اسطرك تلك الغصه التي تسد حلقك و انت تكتب فعلا هذا امر خطير و الاخطر معرفة ولاة الامر هذه مصيبه .
لكن بنت بلدي ما زالت بخير بس الناس تشوف الخلل وين و كيف تفهم الفتاة معني الثقه و الحريه و كمان مزمل اخوي ما شاهدته في اليو توب امر مخزي و لم انم ليلتها هذا موضوع مهم ارجو من الجميع المشاركه دمت و دامت بنت بلدي تملا العين

[مزمل محمد وداعة الله]

الاستاذ الطيب ادريس والاخ الغالي عادل سيد
شكراً للمداخلة والسؤال واطمنكم باني موجود والتواصل مستمر في حضرة السلطنة الزرقاء سنار العشق والانتماء الصادق والحب بلاحدود
اما بساطة الشعب السوداني الجميل فهي حلقات متواصلة تحتاج الى اكثر من منتدى لتوثق وتكتب ليرجع الناس الى ذلكم الزمن الاخضر الصافي زمن البسطاء ابناء شعبي الطيبون من ينبشون الارض بحثاً عن عبير
واليوم احبت الملتقى نسوح في رحاب البساطة ونلج داخل مجتمع القرية لنصف في قصة واقعية لحياة البسطاء في الريف عبارة عن يوم كامل للحياة منذ طلوع الشمس وحتى يعم سكون الليل اروقة المكان فينام الناس تراودهم ساحرات الاحلام بغدِ جميل
الحياة في القرية جميلة وبسيطة والهدوء يعم ارجاء المكان والنسيم صافي يداعب الاهداب والارض خضراء منظرها يبعث التفاؤل والمياه صافية تنساب في رقة متناهية في الترع والجداول والعصافير الملونة تزقزق باستمرار فيطرب لسماعها القلب وتنتشي الروح
يبداء اليوم في القرية باذآن الفجر ( في قريتنا بورتبيل يشتهر صوت عمنا عبدالله ود عامر الجهور والمجلجل حين ينادي الصلاة خيرٌ من النُوم ) من هنا تبداء رحلة اليوم السعيد في القرية يرفع عبد الله ود عامر صوته منادياً للصلاة فتصحو معه كل القرية حتى الديوك تنادي معه للصلاة وتدعو الناس ان يفيقوا
بعد الصلاة مباشرة دعونا نلج الى احد منازل القرية البسيطة رب المنزل اسمه امحمد ود الامين ود العكر وزوجته ام الحسن بت الفاضل ود السائح والابناء على التوالي عمر وبكري وعثمان وخديجة وفاطمة وطيبة والصغير احمد
اسرة بسيطة الوالد يمتلك حواشة اربعة فدان والوالدة ربة منزل من الدرجة الاولى والابناء في المراحل الدراسية منهم من يدرس بالقرية ومنهم من يدرس خارج القرية
بعد ان اداء الوالدان صلاة الفجر تذهب الام الى ابناءها وتدعوهم ليفيقوا ( يا ولد عمر اصحى بكري قوم الصلاة عثمان يا ولدي ما تقوم المدرسة ، خديجة يا بت اصحي وصحي اخواتك ديل يلا قوموا يا اولاد )
يصحى الابناء في تثاقل وتثاب ويقومون بالواجبات المعتادة ( السواك ، الصلاة ، تجهيز احيجات المدارس ) الام تذهب لتوقد ( الكانون ) تضع الفحم مع شوية حطب قطن وورقة وتشعل النار بعد خمس دقائق النار تشتعل تضع اللبن في النار وتنتظر عشرة الى خمسة عشر دقيقة حتى يفور اللبن تصب عليه الشاي والوالد لا يزال في مصلايته يسبح بحمد الله والاطفال مجتمعون حول الكانون يمدون ايديهم للنار بحثاً عن الدفء وهم ينتظرون الشاي
يشرب الجميع شاي الصبح المقنن ويتاهبون للذهاب الى مدارسهم الابن الاكبر عمر يدرس في المتوسطة في القرية الكبيرة المجاورة لقريتهم اما البقية فيدرسون بمدارس القرية الابتدائية يذهب عمر لوالده ويطلب منه اتنين جنيه حق الفطور يخرج الاب جزلانه ويعطي عمر الاتنين جنيه ثم ياتي اليه البقية ويبداءون بالمطالب ( بكري يقول : ابوي دليرين مننا جنيه حق درس العصر
عثمان يقول : ابوي وانا دايرين جنيه لسقف الفصل وقع علينا ، فاطمة وانا ابوي قالوا لينا جيبوا جنيه عشان الموجهين جايين
الوالد يخرج القروش وهو يتمتم ( والله المدارس دي بقت مشكلة نجيب ليهم من وين الفصل وقع نحنا نرقعوا والله دي شغلانة ) ياخذ الجميع قروشم ويتوجهوا نحو المدارس
الوالد يتوجه نحو حماره المربوط في الزريبة ويضع سرجه عليه ويتوكل على الله قاصداً الحواشة ، الوالد ام الحسن تتجه صوب قدر العجين وتبداء تجهز ( للعواسة ) وهي اعداد الكسرة تعجن عجينها وتتوجه الى منزل جارتها ( البتول بت الامام) عشان هي ما عندها ( صاج في البيت ) شفتوا البساطة يا جماعة ، اها اول ما تصل تكورك من بعيد البتول كيف اصبحتو ، البتول تنادي حباب ام الحسن ادخلي جاي اشربي ليك كباية شاي ، ام الحسن بري والله لي هسي ما برد في خشمي
البتول : سمح هاك شيلي لي معاك عجيني دا انجيب لي نار واحصلك علي ( التكل ) .........
تبداء ام الحسن العواسة لانو من الادب السائد ست الصاج ما بتبداء العواسة قبل جارتا ( شفتوا الادب والاخلاق العالية والبسيطة دي ) اها وام الحسن كان شافت جارتا البتول مشغولة شوية بعد ما تخلص عجينا بتخش علي عجين البتول ، البتول تجي خاشة اجي ليه يعني يا ام الحسن انا ما بعوسوا ، ترد عليها ام الحسن في تواضع ليه ما خلاص طرقات وبجرهن ليك الحالة واحدة ، البتول تقعد جنبها وتبداء تحكي ليها عن احوال الحلة ، عارفة محاسن بت الهبوب راجلا في المستشفي حق مدني السكري تاورو رقدوهو من امس ، ترد ام الحسن بري والله اطرشني ما سمعتا بيهو اها والناس ماشين ليهو الليلة
ترد البتول ما بعرفم امكن يقوموا ليهم عربية بعد الفطور ، ام الحسن النبي فوقك يا البتول كان سمعتي بيهم توريني انمش معاكم ما نتلوم مع محاسن دي ، البتول سمح بكلمك .............انتهت العواسة ترجع ام الحسن الى بيتا وتبداء تجهز ملاح الفطور وعادة هو ملاح ( شرموط ابيض ) وعند الساعة العاشرة خلاص الملاح جاهز والكسرة جاهزة الاولاد فكوهم للفطور والوالد رجع من الحواشة ويقعدوا يفطروا كلهم بملاح الشمروط الابيض والكسرة الحمراء ومعاها سلطة جابا الوالد من الحواشة لمة اسرية جميلة ونادرة والبركة تعم الرزق والملائكة حارساهم من كل جانب لانهم ناس طاهرين ونيتم بيضاء وابسط ما يكون الانسان السراير صافية والنفوس طيبة الشفع راضين بنعمة الله وفضله ما في واحد يضجر ولا يقول لي الفطور دا كدا عشان كدا ربنا طارح البركة في رزقهم
نقيف عند الفطور وبكرة نواصل اليوم الجميل في حياة الاسرة القروية البسيطة

[مزمل محمد وداعة الله]

انتهت الاسرة البسيطة من الفطور ، الاطفال رجعوا المدرسة لمواصلة يومم الدراسي الوالدة جابت الكانون وعدة الجبنة والبنبر وقعدت قريب من الوالد عشان يعملوا جبنة الضحي وممارسة طقوسا المقدسة وتجي جارتم البتول وزوجها الصديق ود رحمة الله عشان يشربوا القهوة كلهم مع بعض ويتونسوا ونسة جميلة وعادة الجبنة بيحبوا يشربوها تحت ضل شجرة النيم الكبيرة في نص الحوش ويجي خاشي عليهم الطاهر ود عجبنا سواق البابور عشان داير ليهو قروش حقت حرات من عمنا امحمد ويعزموا عليهو حباب الطاهر خش لي جاي اشرب ليك فنجان جبنة ، يرد الطاهر والله انا نسيبتي بتريدني عشان اشرب جبنة ام الحسن الما خمج ويجر ليهو عنقريب هباب موسر بسعف وقصير ويا اخد ليهو تكية ويتناول الفنجان ويبداء يسولف مع الجماعة ويضحكوا لحدي ما اخونا الطاهر ينسى هو زاتو جاء لي شنو ، في الاخر يتزكر موضوع القروش ، اها احاج امحمد قروش الحرات عندك ولا لي بعدين ، حاج امحمد يقول ليهو والله ما كلهن امسك ديل وبكرة بمشي السوق ابيع لي شوال عيش واديك الباقي ، الطاهر يرد لا مافي عوجة يا حاج علي راحتك الدنيا طائرة ؟ وبعد شوية ينفض المجلس وام الحسن تلملم العدة وتقبل علي ملاح الغداء وحاج امحمد ياخد ليهو قيلولة تحت الضل الباااااااااارد داك لحدي اذان الظهر ما ياذن يقوم يتوضاء ويمشي الجامع الفي نص الحلة عشان يصلي الظهر حاضر ويلاقي اصحابو عبدالله ود البخيت وسالم ود العمدة ويمشوا كلهم لي دكان صاحبم الجاك ود النعيم القريب من المسجد ويقعدوا يتونسوا في برندة الدكان ويتشاروا في اوضاع الزراعة ومشاكل المشروع والموية والسماد والعيشة البقت صعبة والاسعار الزائدة ويستمروا لحدي الساعة واحدة ونص وبعد كدا يتفرقوا وكل واحد يمشي علي بيتو ، في الوقت دا الاولاد بيكونوا رجعوا من المدرسة بعد نهاية اليوم الدراسي وارتاحو شوية ، الساعة اتنين ونص عمنا امحمد متابع الراديو والاخبار يفتح الراديو بتاعو ويسمع وام الحسن تجهز الغداء الساعة اتنين ونص في برنامج عالم الرياضة المشهور في الاذاعة السودانية مع بداية البرنامج دا البيت كلو مظبط مواعيد الغداء عليهو اول ما دقت موسيقى البرنامج الغداء يكون جاهز واللمة تبداء حول صينية الغداء من جديد والغداء برضو بسيط ولو حاولوا يدخلوا عليهو شوية تحسينات بيكون اما شوية رغيف او صحن ارز وكدا دا بيكون غداء فااااهم ( في بساطة اكتر من كدا ) والله نحنا بسيطين وشعب نادر وشعب طيب صحن الارز عندنا بيساوي حاجة كبيرة ونعمة نحمد عليها ربنا وامكن نكون نحنا الشعب الوحيد في العالم بياكل الارز بالسكر صاح يا اخونا ولا لا؟
بعد الغداء الحاجة ام الحسن تجهز شاي سادة بالنعناع او القرفة والهبهان حاجة تضبط الراس وترجع الحيوية للجسم
بعد الشاي كل واحد من الاطفال عندو مهمة مؤكلة ليهو عمر الكبير يمشي يعلق للبقرة ويحلب مع الراعي ويجيب اللبن ، بكري وعثمان مكلفين بالاغنام ، اما البنات فعليهن يغسلن العدة ويقشن البيت والحوش
كدا كل حاجة تمام الاطفال بعد اداء المهام بتاعتم يجروا لملعب الكورة عشان يلعبوا والبنات يمشن لبنات الجيران يلعبن برضوا لحدي اذان المغرب
نقيف عند صلاة المغرب وبعدين نواصل اليوم الطويل لهذه الاسرة البسيطة من اسرنا السودانية الريفية الجميلة

[Adil Sayed]

ما هذه الروعه والله اثرت شجوني واترورغت عيوني نعم مزمل هذه هي بساطة الشعب السوداني و دائما يسعد القنوع .
واصل مع هذه الاسره و نترقب الحلقه القادمه. مشكور دمت و دامت ابداعاتك يا ود بلدي.

[مزمل محمد وداعة الله]

( ود بلدي ) الراقي عادل سيد مرحباً بك في حوش اسرة عمنا امحمد وانت تلج لتتعرف علي مظاهر الحياة البسيطة عند انسان القرية السودانية
اليك بقية اليوم............

بعد سماع آذان المغرب ينفض سامر اللعب والاولاد والبنات يرجعوا البيت عشان يصلوا المغرب ، هنا عمنا امحمد اتوضاء قبل الاذان وتوجه للمسجد ، خالتنا ام الحسن ولعت الكانون وختت اللبن عشان تفورو ومشت تصلي ، الحاج بعد الصلاة رجع البيت طوالي والحاجة صلت والاولاد كمان ، اها كل البيت بيتلما مرة تانية عشان يشربوا شاي المغرب باللبن بتاع بقرتم او اغنامم يعني كل من الطبيعة مافي بسترة ولا في مواد كيمائية ولا غيرو دا الكلام الصاح من خير ارضنا ونعيم ربنا نحنا ناكل والبهائم تاكل والدنيا جميلة بدون تعقيدات التكنلوجيا الهدامة
شاي لبن مقنن ريحتو تجيب الضهبان ، الاطفال شربوا بعد كدا كلهم يخشوا الاوضة عشان يزاكروا الواجبات المدرسية بتاعتم
وفجاءة طق الكهرباء قطعت والظلام عما المكان ، الاطفال يلعنوا في ناس الكهرباء ( الله يقطع راسم دا هسي دا وقتو) الحاجة من برة تنادي يا اولاد خديجة تعالوا ولعوا اللمبة حقت الجاز وزاكرو ، خديجة لاخوها عثمان ( عثمان ورحكا معاي انا بخاف من الضلام ) عثمان يا بت تخافي من شنو مافي حاجة امشي ساي ) بكري عليك الله يا عثمان امشي معاها خلينا نقراء
يمشي عثمان وخديجة للمطبخ ويجيبو لمبة الجاز ويكتشفوا انها فاضية ما فيها جاز خديجة لابوها ابوي اللمبة ما فيها جاز رسل عمر وبكري يجيبوا لينا جاز من دكان ود ابشعوب ، الوالد ينادي عمر تعال يا ولد شيل بطاريتي دي امشي انت واخوك جيبوا ليكم جاز وسكر وشاي من ود ابشعوب وقولوا ليهو ابوي بجيك بكرة بالقروش ، يمشي الاولاد لعمهم ود ابشعوب بتاع الدكان والراجل مشكور يديهم الاغراض ويقول ليهم اعمل حسابكم الجاز ما يدفق منكم وسلموا علي ابوكم ، شوف الراجل ما رفض يديهم عشان ما عندهم قروش لانو واثق انو بكرة ابوهم بيجيب ليه حقو ودا مجتمع القرية فيهو ثقة نادرة امكن يكون نص القرية بتدين من بتاع الدكان وتجر بالشهر وتسدد ليهو اخر الشهر وسيد الدكان متسامح لانو عارف ظروف الناس وعارف انو حقو بيجيهو ..
الاولاد وصلوا البيت وختو الحاجات وخديجة ولعت اللمبة وخشوا يقروا ، الساعة تمانية الا عشرة الكهرباء بق ولعت في اللمبات كل الحلة تصرخ وووووووووووووووووووووويييييييييييييييييييييييييييي ييييييي الكهرباء جات ، احمد الولد الصغير نعس لكن لما شاف النور قعد يغني الكهرباء جات عبوا الباقات هسي بتقطع وي وي وي ، اها الساعة تمانية مواعيد المسلسل العربي اليومي كل الحلة متابعة المسلسل رغم انو التلفزيونات مش كتيرة لكن كل مجموعة بتتلما في بيت فيهو تلفزيون ، اها جماعتنا اقرب تلفزيون ليهم عند ناس العاجبة بت شرف الدين عشان راجلا مغترب في السعودية عندهم تلفزيون ملون ، الاطفال كلهم يمشوا يحضروا المسلسل من الساعة 8 الى الساعة 9 ، اخوهم الصغير احمد ينوم في نص المسلسل وخديجة اختو تشيلو في كرعينا لحدي ما ينتهي المسلسل ويرجعوا البيت ، الساعة تسعة وربع العشاء جاهز وعادة بيكون اما فطير باللبن والسكر او لقيمات او بليلة ، الاطفال يحبوها جداً يضربوا العشاء وجري يصلوا العشاء ويالسرير جاك زول الساعة عشرة ثلاثة ارباع الحلة بتكون نامت والانوار اطفاءت والسماء مليانة نجوم تلمع حارسة الناس البسطاء ديل الراضين بنعمة ربهم وعايشين حياتم بالطول والعرض اقصي احلامم ان ربنا يديهم العافية ويحفظ اولادم ويعلمم ويكبروا عشان ينفعوا انفسهم
والقمر نص بدر مبتسم علي المنظر الهادي والسكون السرمدي والنسيم عليل يداعب هداءت المرقد ويذهب اذي الباعوض المزعج ، الاولاد ناموا والاحلام تداعب خيالم بانو بكرة حا يكون احلي من الليلة والوالدين صلوا وسبحوا ربهم وشكروا فضلو وناموا بعد يوم طويل لكنهم راضين علي انفسهم لانو في دواخلهم يقين بان هذا ما كتبه الله عليهم
القرية عماها السكون والزرع في الحقول برضو نام وهو بيحلم بشمس الصباح تديهو الحياة
السكون خيم علي ارجاء المكان وما في صوت غير اصوات الكلاب وبعض اصوات الحمير ...
ومع اشراقة شمس يوم جديد غداً تتواصل مسيرة الحياة لهذه الاسرة الصغيرة البسيطة الحالمة والراضية بما قسمه لها الله

دي حياتنا ودي قرانا وديل نحنا ، شعب بسيط حتى في احلامو بسيط ، بسيط مع نفسو ومع الاخرين ياخذ من الدنيا ما تعطيه على استحياء ولا يطلب المستحيل ولكن في دواخله ارادة لو انه تعلق بالثريا لنالها لانه الانسان السوداني الطموح.

اتمنى صادقاً ان اكون قد عسكت لكم بكل امانة وصدق ملامح الحياة اليومية عند الاسرة السودانية البسيطة في القرية
كما ارجو ان تعيد هذه القصة لكل من يقراءها ذكريات اعلم تماماً ان كل منا قد عاشها ، فما احلى ان يتزكر الانسان ماضيه وذكريات طفولته حتى لا تنسيه الايام كيف كان فيتعالى على الاخرين..

الى الملتقي مع بساطة من نوع اخر
دمتم سالمين

[ابوبكر عزالدين]

الرائع مزمل لك التحيه والله فقدناك وليك وحشه عودا محمود مع بساطة شعبنا الحبيب لك فائق مودتي واحترامي

[Adil Sayed]

مزمل يا ود بلدي يا رهيب تحياتي صدقني قضيت يوم امس في ضيافة هذه الاسره من شراب الشاي وحتي النوم.
اعجبني في هذه الاسره ادب اولادها و حنية امحمد و ام الحسن وطيبة الجيران يا للسعاده مزمل ما تقول لي خلاص لسه الناس ديل مره عليهم رمضان وعيده و داخل عليهم الضحيه واصل نحن في الانتظار .دمت

[مزمل محمد وداعة الله]

الرائع مزمل لك التحيه والله فقدناك وليك وحشه عودا محمود مع بساطة شعبنا الحبيب لك فائق مودتي واحترامي

صديقي العزيز والذي اكن له مودة خاصة ابوبكر عز الدين
لك كل الشكر وانت تفتقدني وتسال عني باستمرار ولك الشكر وانت تثني على هذا الموضوع الذي اصبح يجذب الكثيرين ويتمنوا ان اواصل فيه وانا على الوعد
شكراً ابو بكر وارجو ان توصل سلامي لكل من بسنار وان تُقرئ خزانها العظيم من ايات السلام والشوق وان ترنو بيسراك على ذلك الحي الوادع ( حي الجنينة ) وتبلغه تحايا انسان يعشق انسانه
خليك قريب يا ابوبكر
تحياتي :D

[مزمل محمد وداعة الله]

مزمل يا ود بلدي يا رهيب تحياتي صدقني قضيت يوم امس في ضيافة هذه الاسره من شراب الشاي وحتي النوم.
اعجبني في هذه الاسره ادب اولادها و حنية امحمد و ام الحسن وطيبة الجيران يا للسعاده مزمل ما تقول لي خلاص لسه الناس ديل مره عليهم رمضان وعيده و داخل عليهم الضحيه واصل نحن في الانتظار .دمت

الغالي ابداً عادل سيد اكثر ما اعجبني فيك انك متابع بشقف ولوعة نادرة انت تقراء وتعيش اللحظة كانها حقيقة ماثلة امامك وهذا الاسلوب يزكرني بالاخت العزيزة الغالية ( تهاني ) والتي افتقدها وافتقد مداخلاتها الجميلة
شكراً عادل ومرحب بيك في اسرة امحمد وزوجتو ام الحسن والوعد باقي ان يتواصل نبض الحكاوى البسيطة لشعبنا البسيط واهلنا الطيبين
دمت اخاً عزيز ومتابع جيد واراءك على العين والراس
لك حبي وتقديري

[محمد أحمد عثمان الحاج]

الاخ مزمل
تحية طيبة
نشكر المنتدي الذي عرفنا بكم
نحن هنا في الدوحة مجموعة من ابناء سنار
والحقيقه لم نتشرف بمعرفتك الا من خلال المنتدي
وياريت نعرف نشوفك
تلفوني 5622891

بساطة الشعب السوداني
اليوم سألني واحد من الشوام عن شارع معين في الدوحة
الحقيقة كنت لا اعرف الشارع , وقلت له ذلك , ولكن يمكن ان أسال واحد من الذين يعملون معي وهو له فترة طويلة من الزمن في الدوحة . وعند اتصالي بذلك الشخص عرفنا منه وصف الشارع . فقال لي جملة ( والله انت فعلا سوداني , اذا سألنا اي واحد عن شئ وهو لايعرفه , يقول لا اعرف , وانت تتصل وتعمل الموضوع موضعك ,وتتصل وووو والله غير سوداني لايعمل ما عملته ).

[مزمل محمد وداعة الله]

العزيز محمد احمد عثمان
لا عجب ان تكون كل صفات الانسان السوداني متمثلة في شخصك الراقي المهذب وانت تمد يد العون لبني الانسان اينما كانوا لا انك تحمل اسم الرمز للرجل السوداني في الادبي العامي ( محمد احمد ) هذا الاسم الذي يكن عن شخصية ابن البلد البسيط الاصيل والكريم
انا سعيد اخي محمد احمد بان تكون مقيماً معي هنا في دوحة الجميع وشاكر لك وسوف اتصل عليك اليوم انشاء الله
لك مني الود

[معتصم قاسم السليني]

الاخ الفاضل
مزمل
اتمني من الله ان يعد هذه الايام الطيبة زي طيب اهلي
والى الامام

[ابوبكر عزالدين]

العزيز جدا مزمل محمد وداعة الله شكرا كتير على المكانه التي تضعها لي والله انا نفس الشعور اكن لك موده خاصه جدا واكون في غاية السعادة حينما اقراء كتاباتك التي دائما ماتحملنا الى العالم السيعد شكرا لك مزمل لك فائق مودتي واحترامي

[مزمل محمد وداعة الله]

شعبنا البسيط الجميل عندو مناسبات سعيدة واعياد بمزاق خااااااص يعني مش موجود الا عندنا نحنا بسطاء الشعب السوداني
اهلنا في القرى والحضر بيستقبلوا مواسم الاعياد بطريقتم الجميلة والاستعداد بيكون مبكر للعيد ، في عيد الاضحى التجهيزات غير ، اولاً يستعدوا لشراء الخروف وطبعاً لازم يكون خروف سمين لزوم الشية وكدا ، بعدين الامهات والاخوات في البيت يفرشوا البيت باجمل ملايات موجودة ولو في شوية رملة حمراء تترشا علي الحوش والبيت يكون تمام التمام ، قدام الحوش لازم قبل العيد بيوم يعني يوم الوقفة لازم يقشوه ويحرقوا الوسخ الحلة كلها بتقش قدام بيوتا ، يوم العيد الصباح تلقا الحلة نظييييييييييييييفة والشوارع تشرح القلب ، صباح يوم العيد الاسرة كلها تتلما في شراب الشاي باللبن مع اللقيمات ، اها الوالد والاولاد بيلبسوا الجلاليب الجديدة والطواقي الجميلة ويتريحوا بالعطور الحلوة لزوم الصلاة ، كلهم يمشوا على الفسحة بتاعت الحلة للصلاة ، بعد الفراغ من صلاة العيد الناس تطايب بعد ويهنوا بعض بالعيد في منظر فيهو كتير من الآلفة والمحبة ، وكلو واحد يتوجه لبيتو عشان الضبيحة ، بعد الضبيحة اشيلوا اللحمة للنسوان ويبداءن يقطعن الشية الماخمج والليمون التوم والبصل الابيض والشطة الخضراء ، والشفع البيجوا من الكنابي المجاورة للحلة ومعظم من الفقراء يدخلوا يعيدوا وكلو واحد منهم شايل ليهو كيس في ايدو والوالدة تفتح كيس كلو واحد وتخت ليهو فيهو شوية لحمة ، يطلعوا للبيت التانية وهكذا ، اخر اليوم الواحد منهم يكون عمل ليهو نص خروف ، ودي متعة العيد ودي بركة العيد المن اجلها فرض ربنا صدقة عيد الاضحى عشان الغني يطعم الفقير وتزول الفوارق والضغائن ، دا موجود عندنا نحن بس في السودان عشان كدا قلتا ليكم نحن شعب فينا خصال اندثرت في جميع شعوب الارض الا عندنا نحنا ...
ارجع ليكم للشية لانها بتكون خلاص استوت ، ينزلوها ويجيبوا صحن السيرويس المعروف بتاع الشية ومع صحن سلة وبصل ابيض والشطة بالدكوة حاجة لذيذة جداً ، الجماعة يضربوا الشية والمرارة والبطن تتنفخ اها البيفك النفخة دي شنو اهههههههههههاااااااااااااااااااااااا ، في جماعة كدا بتاعين شربوت اليهو بيعملوه من البلح ويخمروه لمدة يوم او يومين الجماعة ديل معروفين في الحلة يقول ليك اسمع ماشين نشرب لينا شربوت مع جعران شربوتو كارب ، وبيني وبينكم الشربوت دا انا ما بحبو لاني بحس بيهو عرقي الا ربع وغايتو كل شاة معلقة من عصبتا هاهاهاها ...في جماعة تانية زي كدا الما بيحبوا الشربوت ديل بيفكوا النفخة بالبيبسي تشرب ليك كباية كبيرة ولا قزازة بيبسي خلاص كدا مية المية وتاخد ليك نومة لحدي الساعة اتنين تقوم تصلي الظهر والغداء جاااااااااااهز تضرب اللحمة المحمرة مع الفتة بتاعت الشوربة حاجة تمام وعلى ميدان الكورة عدل ....................
دا العيد ببساطة في القرية في السودان
وكل عام والجميع بالف خير

[Adil Sayed]

اخي مزمل خليتنا نطمطك نحن صايمين يا راجل جوعتنا.
و الله كلامك صاح نحن شعب متفرد و نحاول نحن حتي في اوروبا ان
نحافظ علي هذه الموروثات لكن شويه صعب بس صلاة العيد هي
تكون في الاول في مسجد كبير جدا وبعد الصلاة ترجع بطريق آخر
غير الذي اتيت منه وفي طريق عودتك تمر علي كم بيت من بيوت
السودانيين ونعود الي المنزل عشان نبدا الاتصالات. اما الخروف
حكايتو طويله الذبح في البيوت ممنوع فتقوم بحجز الخروف من
بدري و تدفع تمنو و يوزنوهو ليك حي و غالي طبعا و بعدين يحددوا
ليك زمن الاستلام ما معروف علي حسب الاسبقيه مرات امكن تستلموا
المغرب.
الاعياد كأنها خلقت للسودان لا تحس بطعم العيد الا في السودان
دمت مزمل يا ود بلدي.

[مزمل محمد وداعة الله]

طائر الشفق الغريب المهاجر ود بلدي عادل سيد
كل عام وانت واسرتك الكريمة بالف خير
وهذا اخي عادل قدرنا الذي لا نملك ان نبدله بايدينا ولو استطعنا لبدلناه لان ساعة زمن بين الاهل والاحباب في السودان تساوي دهر من الغربة
هذه هي بساطة الشعب السوداني الفريد وما ذكرته انا وانت هو شرح لواقع عشناه ونعيشه في كل عيد في السودان ونقارن بين ما عشناه بين الاهل وما عانيناه في بلاد الغربة وشتان بين هذا وذاك ، العيد في السودان لمة احباب والفة ناس قراب وونسة اصحاب ، اما العيد في بلاد الغربة ، ساعة عذاب ، ووحشة احباب ، واحلام سراب
اخي عادل ساظل اكتب عن بساطة شعبنا السوداني ابداً في كل المواسم لنحكي للدنيا بساطة وموروثات هذا الشعب النادر الخصال
عزانا اننا اغتربنا عنه بحثاً عن الرزق مرغمين ولو كان بايدينا ما رحلنا ولو انطبقت السماء على الارض ولكن هي الاقدار
اسال الله اخي عادل ان يرد غربتنا جميعاً الى الوطن وان يحفظ كل مغترب في غربته ويوفقه لما يحب ويرضى والى ما فيه خير الجميع
تقبل الله منك اخي عادل صالح الاعمال ولما شملك بعد الشتات
دمت اخي عادل سالماً وكل عام والجميع بالف خير

[بورتبيل]

وانا اتابع هذا الذخم الجميل
والحديث عن عيد الاضحى والذكريات الجميلة في السودان الا انني تنتابي بين الحين والاخر لواعج الذكريات والشوق لاماكن عز علي ان افارقها كثيراً.. الا انني ورغم السنوات الطويلة والاعياد المتراصة التي قضيتها في الغربة الا ان عيد الاضحى له طعم خاص في مكان خاص وفي زمن خاص.
انه عيد الاضحى في معسكر الحجاج السودانيين بمنى حيث تجد كل السودان تقريباً وتشاهد كل العالم بسحناته ولغاته كافة شعوب الارض بملابسهم وعاداتهم .. وهذا ان دل انما يدل على عظمة الاسلام وانتشاره .. ورغم ان الحج فيه من المشقة ما فيه الا ان الروحانيات التي تجدها كبيرة جداً واشد ما يلفت انتباهك في الحج ان الناس كلها تفترش الارض .. لا تعرف من فيهم الامير ومن فيهم الاجير ومن الغني ومن الفقير .. كل الناس في هم واحد وهو هم اداء المناسك بصورة صحيحة ومقبولة لدى رب العالمين .
اذاً الاضحى بعيداً عن الاهل والسودان صعب وتفقد فيه الكثير .. ولكن صدقني ان الحج يعادل او يفوق الاضحى في السودان او في اي مكان اخرى .. ولو منتظر ان تقارن هذا ما عليك الا التقديم للحج في الموسم القادم باذن الله.

وايضاً من بساطة الشعب السوداني هو ما تجده في عيون كثير من الحجيج السودانيين من الرجال والنساء وتحس بان كل واحد هو ابوك وان كل امرة هي امك .. لبساطة ملابسهم وبراءة نظراتهم وتعاملاتهم مع الاشياء من حولهم.
نسال الله ان يتقبل حج كل المسلمين هذا العام ويردهم الى اهلهم سالمين غانمين

[مزمل محمد وداعة الله]

هنيئاً لكم اخي مدثر وانتم تستظلون بظلال عرفات الطاهرة في موسم الحج وتستقبلون الحجيج السوداني وتنعمون معهم بعيد الاضحي في اريحية والفة والملائكة تظلكم من كل حدب وصوب وهل هناك اطهر من تلك البقاع ليقضي عليها الانسان ليلة العيد
اسال الله تعالى ان يكتب لنا الحج المبرور في مقبل الاعوام وان يتقبل من كل الحجيج في بقاع الارض حجهم ويتقبل منكم يا مدثر ما تقدموه لاهلكم في السودان من الذين يحجون البيت وحين يعودون الى الديار يعودون والسنتهم تلهج بالشكر لكم ابناء الجالية السودانية بالمملكة

تخريمة : والله ناويين الحج بس ادوها لينا زقة شوية هاهاها ..

[فاطمة عبدالرازق محمد]

فعلا الشعب السوداني كان بسيط وعفوي وتلقاي وولكن هل هو كذلك الان ؟

لك الشكر أخي مزمل على هذا السرد الرائع بروعة ما زكرته عن زكريات علي مسار وزكريات

الجامعة . وكل سنة وأنته طيب .

[مزمل محمد وداعة الله]

شكراً العزيزة فاطمة عبد الرازق واري اليوم صفحات البوست قد تزينت بمرورك الكريم ومداخلتك الجميلة
ارجو ان تتواصلي مع هذه البساطة فما زال في الجعبة الكثير الخفي عن بساطة هذا الشعب ولماذا اندثرت هذه البساطة
شكراً فاطمة عبد الرازق مرة اخري واهلاً بك في البوست

[ياسر ود الشيخ]

اخى مزمل وانا استمتع بهذا البوست كانى اقرا روايات نجيب محفوظ وادور مع ابطاله فى شوارع القاهرة القديمة ,عندما قرات العنوان والصفحات التسعة فكرت ادخل واخرج لمواصلة التصفح فى باقى المنتديات ولكن بدون ما اشعر وجدت نفسى قرات كل الصفحات وفى جلسة واحدة وفى النهاية كأنى غفوت من حلم رائع وذلك للسرد الرائع والحبكة و.....و....الكلام الكبار كبار البقولوه النقاد .......اخى انت مشروع اديب كبير .......هذا السرد يجب ان يقرأه كل ابناء السودان ...........و لا غرابة ان يكون بيينا اديب فانت سليل العظماء من رابطة سنار الادبية ........اتمنى ان اقرا هذا الموضوع فى كتاب من تأليفك ......حرام ان يظل مثل هذه الكتابات حبيسة المنتديات فقط فكر وابدا فى مشروع الكتاب وفقك الله دوما.

[مزمل محمد وداعة الله]

والله الليلة البلد جابت ليها تمساح كبير
مرحب بيك اخونا وحبيبنا ياسر ود الشيخ وانت تزين صفحات هذا البوست البسيط ومشكور على الاطراء الذي اراني اتضال امامه فهو اكبر مما استحق فلك الشكر وعظيم الامتنان
اما بساطتنا كشعب سوداني والتي حاولت توثيقها هنا فيجب ان يقراءها الجميع كما قلت لانها محاولة استرجاع ذكريات جميلة لاخذ العبر والدروس للاستفادة منها للعودة الى الجزور العميقة والاصل النجيب ارجو ان يظل هذا البوست منبراً للحوار ودوحة يستريح عليها كل من اراد ان يعود الى الزمن الجميل والى بساطة الشعب السوداني
اما موضوع الكتاب دا والله يا اخوي يا ياسر الموضوع سمح بالحيل والفكرة جميلة بس دايرة ليها قعدة خلينا نقعد مع بعض ونشوف واكيد حارد عليك
انا شاكر لك اخي ياسر تواصلك الجميل وارجو ان لا ينقطع سيل حروفك على الصفحات ولك مني كل الحب والود
ودمت في امان الله

[ياسر ود الشيخ]

والله الليلة البلد جابت ليها تمساح كبير
مرحب بيك اخونا وحبيبنا ياسر ود الشيخ وانت تزين صفحات هذا البوست البسيط ومشكور على الاطراء الذي اراني اتضال امامه فهو اكبر مما استحق فلك الشكر وعظيم الامتنان
اما بساطتنا كشعب سوداني والتي حاولت توثيقها هنا فيجب ان يقراءها الجميع كما قلت لانها محاولة استرجاع ذكريات جميلة لاخذ العبر والدروس للاستفادة منها للعودة الى الجزور العميقة والاصل النجيب ارجو ان يظل هذا البوست منبراً للحوار ودوحة يستريح عليها كل من اراد ان يعود الى الزمن الجميل والى بساطة الشعب السوداني
اما موضوع الكتاب دا والله يا اخوي يا ياسر الموضوع سمح بالحيل والفكرة جميلة بس دايرة ليها قعدة خلينا نقعد مع بعض ونشوف واكيد حارد عليك
انا شاكر لك اخي ياسر تواصلك الجميل وارجو ان لا ينقطع سيل حروفك على الصفحات ولك مني كل الحب والود
ودمت في امان الله


اشكرك استاذى مزمل على هذه الكلمات الرائعة , تمساح شنو يا عمك اخوك لسع ورل صغير , بس لازم تشوفوا لينا ناس رابطة سنار الادبية , اتصلوا عليهم بالتنسيق مع بورداب سنار عشان نعرف اخبارهم ونحاول ننشر ابداعاتهم ليطلع عليها الجميع , لانهم كتاب كبار بقامة السودان فقط مظلومين اعلاميا , ونحن فى المنتدى يشرفنا ان نكون لسان حال الرابطة.

يلا يا مزمل واصل لينا الابداع فى موضوع بساطتنا , طلع لينا حاجة من المخلاية او حكاية حبوباتية كدة من سحارة الحبوبة.

[احمد الدقاق]

والله مابدلت فينا السنين
ونحنا يانا نحنا

[مزمل محمد وداعة الله]

والله مابدلت فينا السنين
ونحنا يانا نحنا


فعلاً والله يا دقاق ما بدلت فينا السنين ونحنا يانا نحنا
بس تقول شنو في الناس النسوا طيبة وبساطة شعبنا وسماحة اهلنا الطيبين
شكراً احمد الدقاق على المداخلة البسيطة والكبيرة في معناها

[مزمل محمد وداعة الله]

الموظفين في السودان في الدوواوين الحكومية بالذات ناس تعبانين وبسيطين جداً ، حياتم مع صعوبتا فيها جوانب كتيرة مشرقة وجميلة مثال الرباط الاجتماعي الفريد بين الموظفين مع بعض تلقاهم يقيفوا مع بعض في الفرح والكره ، حياة الاشتراكية البيعيشوها داخل المؤسسة والمتمثلة في الصناديق والجمعيات والبيع بالتقسيط المريح وهلم جرا ، كل الحاجات دي حاجات ايجابية بتكثر حاجز الملل في حياة الموظفين وما بتنفي انهم شريحة مظلومة في المجتمع لان العائد المادي للموظف في الحكومة يا دوب بيكفي الاكل والشراب ومستلزمات الاسرة يعني مافي وفر قدرو قدرو ...
كدي تعالوا الليلة نخش في حياة واحد من الموظفين ديل ونختار واحد عزابي عشان نشوف كيف بيقضي يوموا من الصباح لحدي ما يرجع وينوم
المثال اليوم حا يكون اخونا مصطفي ود محجوب الطائع الملقب بالريشة وللقب دا اخدوا لانو زول بيحب الكورة وهلالابي علي السكين هو اصلاً من قرية في الجزيرة وشغال في الادارة العامة للكهرباء في الخرطوم بعد ما نقلوه من الحصاحيصا لقسم خدمة المشتركين في منطقة الخرطوم وسط ، اها اخونا مصطفي اول ما جاء للخرطوم مشى سكن مع العزابة اولاد حلتم ماجرين ليهم بيت في السلمة بيت طوب اخضر اوطين وكلهم شغالين في السوق الشغال في محل بتاع خضار والشغال في محطة بترول والشغال في شركة مواصلات المهم الجماعة كلهم كدا حوالى عشرة انفار بي مصطفي البيت يادوب شايلم
بيصحوا كلهم الصباح طبعاً فتيل المعجون ابو صفقة معلق في الشباك والفرش معلقة شي اخضر وشئ احمر بس التقول لمبات زينة ، كل واحد عارف فرشتو وين اتسوكو وصلوا الفجر واتشنطوا ومرقوا على المواصلات عشان الصباح الزحمة شديدة
اخونا مصطفي البس البنطلون عبد الواحد بتاع الجنز لونو كاااان كحلي لكن بمرور الازمنة عليهو تحول لخاطف لونين ازرق وابيض وفيه شرطة صغيرة في الركبة معالجة مباكينة الخياط الترزي سبعة تمانية يعني ما ظاهرة شديد اما القميص ابيض مخطط باللون الازرق لكن الغسيل الكتير والمكوة خلنو بااااااااهت ورهيييييييييف تكاد خطوطو تنعدم لكن مصطفي لانو زول انيق كاوي البنطلون والقميص تمام ومسرح وراشي ريحة ون مان شو والجزمة ملمعة من امس واللقم البك في الجيب وعلى الموقف قبل ما تجي الحافلة اخونا مصطفي ما مجنون كورة بيعرج على بتاع الجرايد ويشتري جريدة قوون مرتب ثابت كل يوم حتى بتاع الجرايد بقي صاحبو ولو ما عندو قروش برضو بيديهو لاخر الشهر لانو بتاع الجرائد هلالابي موت ومصطفي بيلخمو ليك بي لعيبة الهلال والقون والتمرين ، اها شال الجريدة الحافلة جات الناس تتكابس علي الحافلة غايتو بي يا لطيف مصطفي لقى ليهو مقعد نص والمقعد زاتو مكسور وخاتين ليهو خشبة تكالة ، مصطفى قعد ما مرتاح في القعدة في تلاتة مشمعين جنبو مضايق بس مجبور استحمل ، الحافلة سواقا شاب شايقي ظريف بتاع طرب شغل ليهم مسجل شريط عبد الرحيم ارقي واغنية باكر بجيك قاطع مسافات العشم ، شائل معايا هوى العيون ولسان فيو اجمل نغم ، انشرح اخونا مصطفي مع الكلمات الجميلة اصلو زول شاعري وحساس ، بعد كم محطة الحافلة وقفت وركبت فيها حاجة شايلة ليها كفة ولانو مافي مقعد فاضي اخونا مصطفي وقف للحلجة وقال ليها ( اتفضلي يا خالة اقعدي هنا ) الحاجة ( هي ليشنو يا ولدي اعفي لي
مصطفي : مافي عوجة يا والدة انتي زي امي ، الحاجة كتر خيرك وبارك الله فيك ياني زي امك الله يديك العافية ، يعني انا كنتا كايس لي حاجة اجمل من دعوتك دي الكلام دا قالوا مصطفي في سرو وهو فرحان بدعوة الحاجة ليهو والله يا اخوانا في ناس كتيرين ماشين وعايشين بس بدعوات البسطاء ديل لانهم طاهرين ودعوتم مستجابة ،
الساعة سبعة ونص الحافلة وصلت اخونا مصطفي للمحطة بتاعتو ونزل واخد ليهو مشية بسيطة لحدي مكان الشغل

[مزمل محمد وداعة الله]

اول ما خشا مصطفي من باب الحوش قابلو عمك الامين فراش المصلحة مريخابي احمر تمام ، مصطفي خش ليك عليهو اصلو المريخ كان مغلوب من الوحدات الاردني سبعة /اربعة ،
مصطفي : وينك يا رشاشات سبعة اصلوا كورة ولا رمي جمرات هاهاهاها
عمك الامين : اسكت يا زول اخير السبعة من الجري واااي ما دايرين ما كان تلعبوا
مصطفي : نلعب انت قايلنا نحنا عورا ؟ نحنا فهمنا الموضوع واتخارجنا بدري كعب الكعب سبعة هاااااااااااااااي
عمك الامين : والله نحنا ما جبنا اربعة قينان كما المطرة والبرد كان درنا
مصطفي : مطرة وناس الوحدات ديل كانوا سمك هاي يكا
عمك الامين شال ليهو طوبا صغيرة الكلام حرقوا يزول امشي من قدامي انت الهلالب ديل ما بتتغالطوا امش امش
محاسن زميلة مصطفي مارة في الحوش : والله يا الريشة انت الا كان داير عمك الامين دا اكسر ليك راسك دا اصلك ما بتتتوب منو هاهاهاها
مصطفي : هه والله المريخاب ديل بس فصاحة سااااااااي
عمك الامين : سمح خلي الكلام الكتير الجريدة دي بعد تقراها خليها لي ما تديها لي صاحبك ابكرشة دا
مصطفي منو دا ، حاج الطاهر هاهاهاهاهاهاها
حاج الطاهر سمعو من ورا وقال ليهو
احي احي لكن السبعة ما حارة خليهم يقولوا الدايرنو يا الريشة مش كدا ، بعدين الجريدة دي قوون يعني هلالاب امش شوف ليك صدى بلا مزمل ابو القاسم بلا بطيخ هاهاهاه
دخل الجماعة للمكتب وسلموا على بعض اخونا مصطفي في مكتبوا بيقراء في الجريدة باستمتاع وينادي لحاجة نفيسة بتاعت الشاي خالتي نفيسة القهوة السمحة وين ، نفيسة اصبر لي شوية يا الريشة جاياك
شرب القهوة وقراء الجريدة وقبل على الشغل دفاتر كببببيييييييييييييييييييرة والمروحة القديمة شغالا كركركركركركركر وكل واحد في دفاترو ، جات خاشا زميلتم اخلاص وقالت يا الريشة عليك الله اطلب منك طلب بس ما تكسفني ، الريشة افو عليك يا اخلاص دا كلام انتي كمان بيكسفوك عيونا ليك
اخلاص والله يا مصطفي عندي جارتي ولدت في مستشفى الدايات في امدرمان ولازم امشي ليها واجي وعندي شغل ما قفلتو يعني ممكن لو فيها سقالة تقفلوا لي
مصطفي : بس كدا اقفل ليك ليك ابوه بس انخلص شغلي دا وبعد الفطور بقفل ليك شغلك
اخلاص : انشاء الله يا الريشة يوم شكرك ما يجي
محاسن خشت في الموضوع : اجش عاد لكن ما زينة ساااااااي يا الريشة دعوت اخلاص دي مستجابة عشان هي كوزة هاهاها
حاج الطاهر برضو خشي سمح ما تدينا دعوة يرفعوا لينا الرواتب ولا يرقونا هاهاهاها
تستمر وتيرة الشغل لحدي الساعة عشرة ونص خلاص مواعيد الفطور ، الجماعة يمرقوا كلهم للكافتريا بتاعت المؤسسة
مصطفي وحاج الطاهر ومحاسن والرضية وبلال وامنة بيفطروا مع بعض فول مصلح بالجبنة وزيت السمسم مع بيض مسلوق او فتة عدس حاجة مية المية وكباية موية باااااااااااااااااااردة وارجعو للشغل تاني وكباية شاي بانعناع من عمتك نفيسة تزبط الدماغ ، مصطفي خلص شغلوا وشغل اخلاص كمان وما عندو حاجة يعملا ، يمشي علي الخزنة واشاغل الصراف اخونا الزاكي الخمجان ، شنو با ابو الزيك ما فيها ريحة
الزاكي فيها ريحة بصلة محرقة هاهاهاها
مصطفي الشئ ولا علاوة خمسين الف ساي مافي
الزاكي علاوة هسي دا وقت علاوات خلي المدير يسمعك عشان ينط ليك في رقبتك الطويلة دي هاهاها
مصطفي هاهاهاها كان كدي انسكت
اليوم انتهى والموظفين طلعوا على الترحيل طبعاً اخونا مصطفى ما عندو ترحيل لانو ساكن في السلمة والسلمة مافي ليها ترحيل عشان كدا بياخد بدل ترحيل لكن مرة مرة بيملح مع ترحيل الصحافات او اركويت وبعدين من المركزي يركب مواصلات السلمة لحدي البيت الساعة تلاتة مواعيد الغداء عندو صاحابو في السكن اسمو ابراهيم ود الهبوب دا شغال في بقالة جنب البيت اها الغداء عاملنو ميز مع بعض هم شلة من اربعة اشخاص كل يوم بيشد الحلة واحد منهم ، اتغداء اخونا مصطفي وجري على السرير ياخد ليهو رقدة لحدي قريب صلاة المغرب يصحا يصلي العصر وبعدين المغرب ويمشي النادي القريب من البيت عندو شلة هناك مكونة من استاذ الفاضل بتاع الرياضيات وحسن شلبي موظف في الضرائب وبخيت الاعرج اعمال حرة وزكي الصلباط عاطل وابراهيم موظف في البريد بيلعبوا كوتشينة عندهم اشهر طربيزة حريق في السلمة كلها طبعاً اخونا مصطفي حريف جداً في الكوتشينة ، يقعدوا يلعبوا لحدي الساعة عشرة ونص ويتفرقوا ، مصطفي يرجع البيت ويغشي الدكان يشيل ليهو لبن ولا كورة زبادي وعيش ويمشي البيت يلقا الجماعة عاملين العشاء يتعشا ويصلي العشاء ويقراء ليهو قرآن وينوم ....
ويحلم احلامو البسيطة بساطة نفسو انو الدنيا تسترو ويكمل نص دينو ويساعد اسرتو واخوانو ويتوسع رزقو شوية وبس
ما بيحلم بالبيت الكبير والعربية الفخمة ولا المراءة السمحة لا احلام بسيطة جداً دا الموظف السوداني البسيط ودي حاجاتو البسيطة
ديل نحنا يا اهلنا ودا واقعنا ودي حياتنا بكل بساطتا وبكل جمالا وتعبا وتصور كيف يكون الحال لو ما كنتا سوداني واهل الحارة ما اهلي ....

[خالد وهبة]

يا مزمل أنت لقيت الوقت ده وين وكتبت الكلام ده كلو وين بس قول لي ؟ وبصراحهما في أبسط منك

[مزمل محمد وداعة الله]

هاهاهاهاااااااااااااااااا
مرحب خالد وهبة ومشكور على المرور والاطلاع على البوست
اما موضوع الوقت لقيتو وين والله انا لدرجة حبي لبساطة اهلنا وشعبنا بلاقي نفسي ببداء الموضوع والباقي بتكملوا اصابعي براها هاهاهاهاهاهاهاها
وزي ما قلتا ليك يا خالد نحنا ابسط مما يتصور العقل البشري شعب بسيط ومسالم وجميل وعندنا حاجات اندثرت في العالم كلوا ، لو داير تعرف دا خليك قريب من دراسة التراث السوداني وعادات القبائل السودانية والله راسك يشيب وتعرف جد يعني شنو انك سوداني
دمت اخي خالد سالماً

[مزمل محمد وداعة الله]

عبارة امكن نكون بنسمعا كتير او يومياً في كل مكان في المواصلات تكون قاعد وجنبك واحد معرفة اجي الكمساري يطقطق تمد ايدك في جيبك الزول الجنبك ينط في يدك ويقول ليك ( داير تعمل شنو ؟ حرم ما تدفع ) ترد عليهو يا اخي خليها علي المرة دي !!! يرد عليك : يازول انت جنيت انا حلفتا حرام اها اطلقا ولا شنو ؟
وانت بعد كدا خلاص ما عندك حجة تبلع لسانك وتسكت ...
بنسمعا كتير برضو في المطاعم والكفتريات لما تخشوا مجموعة وتاكلوا مع بعض عند الكاشير كل واحد بيطلع القروش حتى لو كنتو 10 انفار برضو كل واحد داير يدفع الحساب حتى لو يفضل ما عندو ولا حق المواصلات بتاع الكاشير زاتو يتحير !!!! يشيل من منو ويخلي منو .....
الخلاني اسوق الكلمات دي حادثة جميلة حصلت لي امس الجمعة في مطعم النيلين السوداني لصاحبه عمنا ميرغني بالريان بالدوحة قطر ، مشيت عشان اشتري فتة فول لانو ناس البيت قالوا مشتهينها ، طلبتا من الطباخ الفتة ووقتا منتظرو ، في كان تلاتة اشخاص بياكلوا وخلصوا اكل وجاءوا للحساب ، وفي اللحظة دي دخل للمطعم صديق لي اسمو السر قدم الخير من ابناء الجرافة راجل اخو اخوان وكريم وراجل بتاع واجب ملقبنوا ( ابو شنب ) لانو كان عندو شنب كبير وكان سواق تاكسي مشهور في الخرطوم ، السر دخل وسلم علي وبقي واقف معاي ، الجماعة كل واحد دخل يدو في جيبوا وطلع قروشو ومدوها للكاشير الكاشير قعد يضحك واتحير يشيل من منو ويخلي منو والجماعة بيجوطا يازول حرم خلاص ، يازول برا حرم برا انا بدفع ، ولا انت ولا هو خلاص انا الكبير خلاص انا بدفع ، ليه تدفع انا بدفع ، انا والسر قعدنا نضحك السر قال ليهم خلاص ولا واحد فيكم يدفع انا بدفع ليكم عشان احلكم من الحليفة ؟ هاهاهاها الجماعة قعدوا يضحكوا والمهم الكاشير شال من اول يد قريبة ليه والجماعة مرقوا ..
بعد ما انتهينا انا والسر طبعاً السر قعد يتعاور وحلف بالطلاق ما ادفع حق الفتة لدرجة انو لوا لي يدي وقال لي حرم اكسرا ليك كرك انت قايلني زي الجماعة الفاتو ديل هاهاها
مرقنا ووقفنا في العربية برا وانا مستغرب من الموقف دا وقلتا للسر بالله عليك الله شوف السودانيين ديل رجال كيف وبيحبوا بعض وعندهم نخوة وكريمين كيف ؟؟؟؟
السر قال لي ها والله انت ما بتعرف الكرم ، انا عندي خالي اسمو حمد الزين في السودان في شندي دا كعب خلاص في الكرم والشهامة دي والله بيضارب عديل ، يازول الكلام دا كيف ؟
والله حمد الزين دا مرة مع ود خالو في مطعم في شندي كسروا المطعم عشان بس البدفع منو ، كيف كيف؟؟؟
اصلهم دخلوا ليهم مطعم واكلوا والراجل المع حمد الزين غسل بدري ومشا دفع اها حمد الزين قال لبتاع المطعم حسابك كم الراجل قال ليهو الحساب مدفوع ، حمد الزين قال ليهو افو الدفع منو قال ليهو الزول المعاك ، حمد الزين قال ليهو رجع ليهو قروشو الراجل حلف طلق ما اشيل القروش حمد الزين حلف طلق تشيلن ما بشيلن تشيلن وقالوا كدي الضرب بدا والكاشير يكورك ها ناس هوي شيلوا قروشكم ماني دايرن انعل ابو عوارة الجعليين ، ها ناس قولوا بسم الله كسرتوا لي المطعم والناس دي تتدرق من الخبت .... بالله شوف الناس ديل وكرمم وشهامتهم ..
السر قال لي نحنا هنا في الشركة معانا موظفين من جنسية عربية ساكنين كل تلاتة في غرفة لما يمشوا يشتروا عيش من الفرن كل واحد بيشتري بي ريال لنفسو وفي الغرفة كل واحد صحنو براه لما يشوفونا نحن السودانيين كلنا بناكل في صحن واحد وبيدفع زول واحد بيستغربوا انو في ناس في الدنيا لسا عندهم الحاجات دي
والله دي حقيقة ونا عشتها مع اخوان معانا من جنسيات عربية كتيرة مشينا كم مرة اكلنا في مطعم ولما مشينا الكاشير كل واحد دفع حسابو واتخارجنا ...
مش قلتا ليكم الخصال الموجودة عندنا نحنا خصال اندثرت من الوجود الا عندنا نحنا بس
ديل نحنا
نحنا الساس .. ونحنا الراس ..
ونحنا برانا دون الناس
ما بنرضى الشرف ينداس
وارثين عزة من عزة

[Adil Sayed]

والله ود بلدي يا مزمل اتخيلت الصراع و درديق الواطه
و سيد المطعم المسكين يحجز و الحجاز ادو عكاز و طبعا
الملاحات ادفقت و الشطه ملت الواطه.
حصلت لي مع واحد صديقي جاني زياره من بروكسل و صادف
انو اولادي ماشين فيلم اطفال فدعيناهم معنا و عندما وصلنا السينما
و في داخل الصاله و الناس كتيرين خاصه الاطفال ذبت للشباك
الفاضي و ادخلت يدي عشان ادفع ما اشوف ليك الا صاحبي جا
جاري من هناك و مسك يدي و بصوت عالي علي الطلاق ما
تدفع طبعا الناس اتخلعوا و البنت بتاعة التذاكر نططت عيونها
المهم انا انسحبت براحه و بعد شويه جاني بتاع الامن و سألني
المشكله شنو فشرحت له استغرب الرجل.
هكذا السودانيون في اي مكان هم هم اصيلين.

[مزمل محمد وداعة الله]

هاهاهاها هاهاهاهاهاهاهاهاهاهاهاهاهاهاهاهاهاه
والله يا عادل قطعتا مصاريني بالضحك ، طبعاً اتيخلتا ليك الموقف وصاحبك بيكورك علي الطلاق ما تدفع بصوت عاااااااالي والصالة كلها صنت والناس مندهشة هاهاهاها
والله يا عادل ديل نحنا ودي خصالنا ودي طباعنا ودا كرمنا الورثناه كابر عن كابر والحاجة دي موجودة وعمرنا ما حا نخليها لو في بركسل او الدوحة او في بلاد الاسكيمو لانها اصبحت جزء من تكوين الشخصية السودانية ويوم ما تتلاشي الحاجات دي من نفوسنا اعرف انو الهوية السودانية اتلاشت من الوجود وطبعاً طال ما في الناس البعزو الهوية السودانية وبيتمسكوا بيها عمرها ما حا تتلاشا صدقني يا عادل يا ود بلدي
كل التحايا ليك ولاولادك واسرتك ولي صديقك بتاع الطلاق هاهاهاها

[الطيب ادريس]

والله ود بلدي يا مزمل اتخيلت الصراع و درديق الواطه
و سيد المطعم المسكين يحجز و الحجاز ادو عكاز و طبعا
الملاحات ادفقت و الشطه ملت الواطه.
حصلت لي مع واحد صديقي جاني زياره من بروكسل و صادف
انو اولادي ماشين فيلم اطفال فدعيناهم معنا و عندما وصلنا السينما
و في داخل الصاله و الناس كتيرين خاصه الاطفال ذبت للشباك
الفاضي و ادخلت يدي عشان ادفع ما اشوف ليك الا صاحبي جا
جاري من هناك و مسك يدي و بصوت عالي علي الطلاق ما
تدفع طبعا الناس اتخلعوا و البنت بتاعة التذاكر نططت عيونها
المهم انا انسحبت براحه و بعد شويه جاني بتاع الامن و سألني
المشكله شنو فشرحت له استغرب الرجل.
هكذا السودانيون في اي مكان هم هم اصيلين.

ههههههههههههههههه

والله ياعادل ناس البيت كلهم ضحكوا وجيت جاري الحاصل شنو ؟
قالوا لي اقرا كلام عادل السيد ده !
وين ؟
في بساطة الشعب السوداني ههههههههه

لكن بالجد مبالغة ودي السودانية ولا بلاش

[مزمل محمد وداعة الله]

ههههههههههههههههه

والله ياعادل ناس البيت كلهم ضحكوا وجيت جاري الحاصل شنو ؟
قالوا لي اقرا كلام عادل السيد ده !
وين ؟
في بساطة الشعب السوداني ههههههههه

لكن بالجد مبالغة ودي السودانية ولا بلاش

والله ياريئس ما عارف لكن انتابني احساس من تقاسيم وشك انك من نوعية الناس البيحلفوا ( طلق ما تدفع ) وتصر على الدفع هاهاهاها
اما النموزج بتاع حمد الزين خال السر دا شكلوا زي عبد القادر جيلاني شدة ما كريم بيضارب ضرب مش كدا
والله الواحد سعيد بمرورك ومرور الاسرة الكريمة والاخ عادل سيد المتابع بشقف لهذا البوست المستمر انشاء الله بمداخلاتكم وبمقترحاتكم وتوجيهكم الكريم
كل التحايا لك استاذي الطيب ادريس ولاسرتك بسلطنة عمان
ودمتم سالمين

[مزمل محمد وداعة الله]

عبارة جميلة بنسمعا طوالي في السودان من الناس البيكونوا واقفين منتظرين المواصلات او منتظرين اي حاجة تقدمم لي قدام في مشوارم ، وارتبطت اكتر حاجة بالطلاب في السودان وادوها مصطلح دارجي ما عارف ليه سموها كدا ( مِلِح ) الواحد يقول ليك والله ملحتا لي في بكسي من الحصاحيصا للخرطوم ، طبعاً انت بتستغرب شديد معقولة الزول دا يكون محظوظ كدا
ما تستغرب كتير لاني حا احكي ليكم قصة اطول ملح انا سمعتا بيه في حياتي كلها لدرجة اني ما مصدق لحدي هسي ، ملح كان سبب في رباط بين اسرتين امتد طويل جداً واصبح تزاوج وانصهار بس بسبب ملح ..
الملح دا حكاه لي صديقي الكلمتكم عنو في مكان سابق في البوست دا ( قيصر محمد سعد ) ود الشرفة بركات زميلي في الجامعة والداخلية ، كنا مرة انا وهو طالعين من الجامعة الاهلية وماشين نشاهد المبارة النهائية في بطولة الجامعات لكرة القدم في ساتاد الخرطوم الكانت بين جامعة امدرمان الاسلامية وجامعة الجزيرة وكان عندنا اصدقاء بيلعبوا في منتخب الجزيرة
المهم طلعنا حوالي الساعة 3 عصراً من الجامعة وما كان معانا قروش كفاية قلنا خلاص نحاول نوفر نمشي ملح من هنا لحدي الخرطوم واتحركنا وشقينا مقابر حمد النيل واتوجهنا لطرمبة حمد النيل المهم في الطريق الاسفلتي كان واقف بتاع بوكس بتاع موز وعندو مشكلة في الاطار الامامي وما معاهو زول المهم انا وقيصر مشينا عليهو وصلحنا معاهو العربية وكل حاجة تمام ما كنا بنفكر انو ياخدنا معاهو لاننا ما متخيلين انو ماشي الخرطوم بس كنا ماملين لينا في 2 كيلو موز لزوم الطريق والجوعة وكدا ، قيصر قال لي والله يامزمل الليلة الزول دا ما يدينا موز الا افلقوا ليك فليق ، انا كنتا متفائل وقلتا ليهو لا بيدينا الزول دا شكلو من ناس الجزيرة بيكون عرف الدم ، المفاجاة الراجل قلينا اها اخوانا ماشين وين ؟ قلنا ليهو ماشين استاد الخرطوم الراجل قعد يضحك ويهز في راسو قال والله ربنا دا كريم كرم بالله شوف انا والله من دربي دا ماشي الاستاد عندي جماعة اخواني مستنيني هناك اركبوا ، طبعاً اندهشنا شديد المهم بالكبري الجديد بالفتيحاب ربع ساعة نحنا في الاستاذ اها نزلنا ولسا مالمين في الموز وكل واحد يعاين للتاني عمك حسا بينا وخجل قال لينا اقيفو اناس ها الشي الموز دا ما عجبكم ؟ قلنا ليهو لا والله عجبنا موز تمام لكن الفلس حاصل اخوانك طلبة ، الراجل عاين كدا وقال لينا ها اناس الكلام دا ما عيب عليكم حرم اكان تشيلو دا ، الراجل مدا لينا نص صبيطة يعني اكتر من خمسة كيلو موز ، والله نحنا من الضحك انشقينا ، وقيصر يقول لي ( كان ما يدينا عشان الليلة يشوف الطوب دا والله اردمو ليك ردم ) هاهاها ونحنا ناكل ونضحك واي واحد يلاقينا في البوابة ولا في المساطب نديهو موز والناس تضحك واحد قال لينا انتو الموز دا حق اللعيبة سرقتوه ولا شنو ؟
مشينا قعدنا في مدرج فاااااااااااااااااااضي ما فيه الا نحنا بس واستمتعنا بالموز جداً ، قلتا لي قيصر بالله شوف ربك دا كريم كيف والله دي ملحة 100% انا عمري ما ملحتا كدا ، قيصر قال لي ها والله انا احكي ليك الكملحة دي تستغرب
مرة في واحد من قرية اسمها ام شانق جنب رفاعة مقيم في السعودية في حتى جنوب السعودية اسمها خميس مشيط وكان نازل السودان اجازة وداير يمشي من خميس مشيط دي لحدي جدة عشان يقطع تزكرة الباخرة ويجي السودان ، المهم السكن بتاعو برا المدين بشوية ، الصباح اخونا شال شنطتو وعفشو وقف في الطريق ياشر ليهو لعربية ياجرا لحدي الموقف ، من بعيد جاء بكس مربط ليهو شنط بي ورا وسائقو سوداني براهو بس في السيارة المهم الرجل شاف السوداني دا وقف ليهو ، سلم عليهو كيف حالك طيب الله يسلمك ، الراجل السائق سالو ماشي وين اخوي داك قال ليهو والله بس وصلني لي جوا البلد داير الحق النقل الجماعي ماشي جدة ، السائق قال ليهو الحمد لله اللقيت لي رفقة والله انا ماشي جدة وخايف امشي براي وكايس لي لي زول يوازرني اتري ربك رسلك لي ، صاحبنا ما صدق وضحك لي اخر ضرس وربط عفشو وركب مع الراجل ، اها الاخو من وين في السودان ، والله انا من الشرق ، وين في الشرق ؟ من حتا بيقولوا ليها ام شانق ، افو ام شانق البطانة ؟ ايوه ، والله نحنا قريبين كان كدي ، بالله انت من وين ، انا من تمبول ، والله مكانا واحد اخوي ، اها واسي انت ماش السودان اي والله ، كويس خلاص كان كدي خليك معاي سااااي نتوازر للسودان ، وصلوا جدة وقعدو يومين مع بعض قطعوا البحر وبيتو في سواكن مع بعض ومن سواكن مع بعض لحدي ما وصلوا ام شانق حلة الراجل الاول ونزلوا اهلو حلفوا علي الراجل بتاع تمبول الا يضبحوا ليهو ويبيت معاهم وبالفعل بيت وضبحوا ليه ، المهم بتاع تمبول دا كان نازل السودان يعرس وشايل شيلتو في العربية قام حكى لبتاع ام شانق ، بتاع ام شانق قال ليهو تعال نديك مرة من عندنا داك ما صدق ، طبعاً ما شاف اهلو وكرمم ورجالتم وناس اولاد عرب تمام اسرة ما قيها كلام وافق طوالي ، تاني يوم الصباح ساقو لي عمو عندو بت سمحة وصغيرة خطبا ليهو وعملوا ليه خطوبة وصاحبنا مشى معاهو تمبول اتعرف بالاهل وبعد عشرة ايام اتزوج ولما الاسرتين مع بعض ، ودا كلو بسبب ملحة من خميس مشيط الى ام شانق وبالعكس ، تقول لي ملحة من الاهلية لاستاد الخرطوم ، هي لكن ملحتنا معاها خمسة كيلو موز !!! وملحتم معاها عروس هاهاهاهاهاهاهاهاها
شوفتو الملح ، وقدام يا عم بتعمل شنو ، دا مثال بسيط جداً ولاامثلة كتيرة والسودانيين بطبيعتم ما بيكسفو ليهم زول لو مدا ليهم ايدو وشاور ليهم طوالي بيقيفوا كم مرة ملحتا ليك مع واحد في السودان ملحة داخل الخرطوم ولا ملحة من ولاية لولاية او مدين لمدينة ؟ كتير جداً وعمرو ما في واحد بعد ما تنزل اقول ليك جيب حق المشوار ، تعال شوف في بلاد الغربة السجم دي والله تقيف من الصباح للمغرب والشمس تقد راسك لو ما عندك حق المشوار والتاكسي الا تموت ولا واحد بيهبب ليك ساي غايتو الا ربنا يوقف ليك سوداني بالصدفة يشيلك معاهو لكن جنسية تانية انسى ............
دي واحدة من مظاهر الترابط الاجتماعي المتمثلة في بساطة انسانا السوداني الجميل البيتعامل بعفوية ومتمسك بتعاليم دينو الاسلامي الحنيف وبيطبق في سنة نبيه محمد صلى الله عليه وسلم القائل ( من كان له فضل زادٍ فليعد به على من لا زاد له ، ومن كان له فضلُ ظهرٍ فليعد به على من لا ظهر له )اتمنى من الله صادقاً لا تمحى مثل هذه العادات الجميلة التي تحكي عن ترابط الانسان السوداني البسيط باخلاقه وتربيته
وقدام ياااااااااااااااااااااااااااااااااااااااعم :bye1:

[بورتبيل]

تصور كيف يكون الحال .!!!

عبارة جميلة مغناة نسمعها كثيراً ولكن هل يوم ما اخذت هذه العبارة وتخيلتها او تصورتها - بالله كيف يكون شكلك وتعاملك وانت مثلاً تكون اي جنس تاني غير سوداني ..!!

انا احياناً كثيرة بحاول ان اطلع من السودانية المغموس فيها دي .. الا انني لا استطيع فعل ذلك لاكثر من ربع ساعة واعود سوداني تاني

هذا هو التصور وعندما اعود من التصور اجد ان المسالة في غاية الصعوبة ومخجلة جداً وتجعلني اكره نفسي واحتقر الفعل الذي فعلته اذا كان قول او فعل.

ونحمد الله كثيراً باننا ما زالت فينا خصالاً انعدمت بين الكثير من الشعوب

[ابوبكر عزالدين]

ياسلااااااام يامزمل والله كل مره تتراوح حكايتك مابين الجمال والدهشه شكرا لك على امتاعنا بكتاباتك المميزه ياراجل يادهشه لك فائق مودتي واحترامي

[مزمل محمد وداعة الله]

الفتي الاسمر ساحر السلطنة الزرقاء ابو بكر ود عز الدين
لك اللاف التحايا من على البعد والشكر على المرور
والله وحشتنا مداخلاتك الجميلة
بالله بلغ التحايا لكل وجه اسمر يصادفك في سنار وبلغهم اشواقنا

[الشفيع سنين]

مزمل محمد وداعة الله ..
أقرأ أشعارك .. فأصرخ ملء فمي هذا الرجل مسكون بالشعر الجميل والقافية الجزلى , ثم أتوه في دهاليز قصائدك , وأتسكع في أروقة خيالك الشعرية الخصبة , لكني تفاجأت كثيراً بهذا الجمال الأدبي , والنثر البلاغي , الذي نجحت في أن تحوله من متصفح مزين بالذكريات والمشاعر والمواقف , إلى واحة مخضرة يؤوب إليها كل من أحس بالتعب , أو ظمئ لجرعة من الأدب الزلال , حق لك أن تفخر بما حباك الله به من ملكة وموهبة , وحق لنا أن ننتظر جديدك بشغف

[مزمل محمد وداعة الله]

مزمل محمد وداعة الله ..
أقرأ أشعارك .. فأصرخ ملء فمي هذا الرجل مسكون بالشعر الجميل والقافية الجزلى , ثم أتوه في دهاليز قصائدك , وأتسكع في أروقة خيالك الشعرية الخصبة , لكني تفاجأت كثيراً بهذا الجمال الأدبي , والنثر البلاغي , الذي نجحت في أن تحوله من متصفح مزين بالذكريات والمشاعر والمواقف , إلى واحة مخضرة يؤوب إليها كل من أحس بالتعب , أو ظمئ لجرعة من الأدب الزلال , حق لك أن تفخر بما حباك الله به من ملكة وموهبة , وحق لنا أن ننتظر جديدك بشغف

صاحب المفردة الجميلة والكلمة الصادقة الاخ الشفيع سنين متعك الله بالصحة والعافية ولك الف شكر على كلماتك الرائعة في حقي والتي تجدها تهز دواخلي لانني احس بانها اكبر مني ولا استحقها
ارجو من الله صادقاً ان اكون عند حسن ظنك النبيل بشخصي الضعيف وان يتواصل هذا السرد القصصي الواقعي عن بساطة هذا الشعب الامة لنعكس للقاري ملامح الحياة السودانية البسيطة بكل معانيها الجميلة والرائعة والتي بداءت تتلاشي بمرور الزمن ودخول العولمة في محاولة لاعادة صياغة تركيبة الاجيال الجديدة في المجتمع السوداني ولفت انتباهها الى ماضي جميل يستحق منا التوثيق والوقوف
دمت اخي الشفيع ودامت محاولاتك الجميلة لحثنا على الابداع ولك كل الشكر والعرفان وحتماً سنلتقي ..

[Adil Sayed]

مزمل يا ود بلدي طبعا انت عارف التلفونات دخلت في اي حته الليله اتصلت علي ناس امحمد ود الامين ود العكر و زوجته ام الحسن بت الفاضل ود السائح و بسلموا عليك كتير و قالوا لي لو بتشوفوا في المنتدا قول ليه الناس ديل مشتاقين ليك و زمن ما سمعوا منك حاجه و كمان اولادهم عمر و بكري وعثمان و خديجه و فاطمه و طيبه و الصغير احمد و كمان جارتهم بتول بنت الامام. قلت ليهم و الله كمان انا مشتاق ليهو و ساوصل له تحياتكم و ما علي الرسول الا البلاغ.

[مزمل محمد وداعة الله]

شمزمل يا ود بلدي طبعا انت عارف التلفونات دخلت في اي حته الليله اتصلت علي ناس امحمد ود الامين ود العكر و زوجته ام الحسن بت الفاضل ود السائح و بسلموا عليك كتير و قالوا لي لو بتشوفوا في المنتدا قول ليه الناس ديل مشتاقين ليك و زمن ما سمعوا منك حاجه و كمان اولادهم عمر و بكري وعثمان و خديجه و فاطمه و طيبه و الصغير احمد و كمان جارتهم بتول بنت الامام. قلت ليهم و الله كمان انا مشتاق ليهو و ساوصل له تحياتكم و ما علي الرسول الا البلاغ.


الرائع ابداً المسكون بحب هذه البساطة والباحث ابداً عن ما يثير اشجان الأغتراب ليحنو الى اناسِ طاهرون احبهم واحبوه
عادل سيد ود بلدي
لك التحايا والشكر على السؤال وعبرك التحايا والسلام الى الى اسرة عمنا امحمد ود الامين ود العكر وزوجته وابنائه الى بساطة تلك الاسرة الجميلة التي عشنا معها اجمل واحلى الذكريات عن الزمن الجميل وابلغهم انني والله ما تثاقلت خطاي نحوهم ونحو بساطة ابناء شعبي الطيبون من ينبشون الارض بحثاً عن عبير ولكن هي زحمة الحياة تنتزعنا قسراً عن من نحبهم ولكن في دواخلنا تظل الروح تهفو اليهم ابداً لانهم رائعون والروعة والبساطة هي من شكلت ملامح الوجه واعطت اللسان مخارج الحروف اذا لابد ان نعود الى كل هولاء البسطاء الرائعون وحتماً سنعود
انا شاكرٌ لك اخي عادل هذه المداخلة والسؤال في صيغة جميلة تعطي المضمون الذي من اجله كان هذا البوست المتحرك بجهدكم وعبرك تحياتي لاسرتك الكريمة في بلاد الصقيع وارجو ان يديم الله عليكم نعمة الصحة ويجمعنا بكم في لقاء قريب على ارض سنار و، واوعدك بان اقوم بزيارة في اليومين القادمين الى اسرة ود العكر واخبرك بتفاصيل الحياة الجميلة معهم
اتمني ان نلتقي على الحب دوماً اخي عادل ولك مني الود

[مزمل محمد وداعة الله]

احباب البساطة البسطاء رجعنا ليكم بعد غيبة طويلة عن الكتابة في هذا البوست لنواصل سرد حاوي البسطاء ومعرفة الشخصيات السودانية العامة والبسيطة في كل شارع وكل حلة وكل بيت
الليلة نمشي مع بعض ونخش الحلة ونتعرف علي شخصية موجودة في كل حلة وكل حي شخصية الطاهر ود نفيسة ود البلد الاصلي شاب في العقد الثالث من العمر ملامحو بسيطة وجسمو هزيل ولنو اسمر من حر الشمس وعيونو هادئة هدوء شخصيتو وصوتو خافت من الادب والحياء المفطوم عليهم انسان بسيط بمعني الكلمة لكن الطاهر ود نفيسة اخو اخوان وزول حارة ، انسان محبوب من كل ناس الحلة وبحترموه كلهم لانو واقف لخدمتهم في كل شئ ، الطاهر ما كمل دراستو بعد الثانوية فضل يشتغل في الزراعة لانو اسرتو بسيطة وعلي قدر حالها المهم بقي يعمل في الحواشة ويساعد والدو واخواتو ، ومع دا كلو ما نسى الطاهر ناس الحلة ومجتمعو الصغير ، الطاهر مشهود ليهو بمساعدة كل ناس الحلة في جميع مناسباتهم السعيدة والحزينة ، وعشان امانو واخلاصو ناس الحلة رشحوه ليكون سكرتير اللجنة الشعبية في الحلة لانو بحب المساعدة وعمل الخير ، الطتهر في الفريق ركازة لناس الفريق ، جارتم بالحيطة حليمة بت جاه النبي زوجها مغترب في السعودية واولادا صغار اها الطاهر زي ولدا مسؤول عنهم مسؤولية مباشرة يمشي يجيب ليهم اغراضم من الجزارة واجهز ليهم كل احتياجتم لدرجة انو زوجها الصديق ود التوم المغترب لما يرسل المصاريف لاولادو بصرافة في مدني برسلا باسم الطاهر ود نفيسة ، يمشي يستلما ويجيبا ليهم كاملة ويرعاهم زي اخوانو ليه؟ لانو الطاهر ود نفيسة الانسان البسيط والجميل صاحب الخصال النادرة ، الطاهر يكون ماشي في نص الحلة يشوف ليهو مرا كبيرة في السن اسما كلتوم الشايقية شايلة ليها قمح مودياه الطاحونة والقمح تقيل عليها يجري الطاهر ود نفيسة جري علي خالتك كلتوم ويقول ليها عنك ياحاجة نحنا قاعدين نسوى في شنو الشئ دا ما تقيل عليك جيبهو انا بدققو ليك وبجيبو ليك البيت ارجعي انت ، خالتك كلتوم ترجع وهي تردد ( الله يابركك يا الطاهر ياود نفيسة ويحفظك لشبابك ويديك الفي مراضك ) اها الطاهر يمشي يقعد في الطاحونة ساعة لحدي ما يدقق لحاجة كلتوم ويرجع يودي ليها الدقيق وهي فرحانة ( الله يباركك واسعد ايامك يا جنى حشاي انشاء يوم شكرك ما يجي يا الطاهر يا وليدي ويديك الفي مراضك ) وطبعاً الطاهر اكتر حاجة بيفتش ليها في الدنيا دعوة زي دي وانو يشوف ابتسامة اهلو الطيبين ، يرجع الطاهر وفي الطريق يشوف عمك ابراهيم الحمري ساقي حمارتو البيضاء عارت منو وشقت الحلة الطاهر يحلق علي الحمارة ويجري وراها لحدي الترعة ويمسك بيها ويرجعا لعمك ابراهيم الكان بيلهث وتعبان ويشكر في الطاهر الله يباركك يا الطاهر بارك الله فيك والله حمارة منعولة خلاص قطعت نفسي الله يقطع نفسا ما قصرتا الله يباركك يا الطاهر يا ولدي ويركب حمارتو ويرجع والطاهر يرجع علي البيت ومستعد لو لاقى اي واحد محتاج مساعدة يقدما دون مقابل ، وقبل ما يصل البيت يمر علي ناس خالو الشريف ود الحنان عندهم حيطة وقعتا المطرة والشباب شغالين يبنوا فيها ، الطاهر يكفكف بنطلونو ويشمر قميصو ويخش مع الشباب ويشيل قدح المونة ويكورك زحوا هوي الطاهر جاكم ، مونة وطوب لحدي العصر مع الشباب وبعد دا يستاذن عشان يمشي الخلا ، يوم حافل للطاهر ود نفيسة ساعد فيهو كل ناس الحلة بنفس طيبة وطيب خاطر ودي رسالتو المؤمن بيها في الحياة ...
الطاهر مشهور في مجتمع الحلة بالامانة والنخوة عشان كدا في مناسبات الافراح بيكون هو المسئول عن كل شئ فيهو دفع قروش تلاقا الطاهر ود نفيسة مسؤول عن المخزن بتاع العرس البختو فيهو العيش والبيبسي وكل لوازم العرس والمفتاح مع الطاهر ود نفيسة ، وفي الديوان بتاع العرس الطاهر بيكون ماسك الكشف وكل القروش البيختوها الناس مع الطاهر ود نفيسة ، وفي مناسبات العزاء برضو بيكون مسؤول عنها الطاهر ود نفيسة ، هو البيجيب الصيوان ويدفع لبتاع الفرن وبتاع التلج والبيجيب البهائم للضبيحة ، الطاهر ود نفيسة اصبح رمز من رموز القرية لا يمكن تجاوزه ، الناس كلها بتحب الطاهر ومستنين يردوا ليهو الواجب في عرسو وطبعاً عشان الطاهر فقير تاخر موضوع العرس شوية لحدي ما وصل 40 سنة من عمرو ولما فكر في الزواج اختار آمنة بت خالو البشير لانها انسانة ابسط منو وما عندها طلبات كتيرة ودايرة سترة الحال وفوق كل دا بتحب الطاهر ود نفيسة من زمان ، اها الدور جا علي ناس الحلة عشان يردو الجميل للطاهر الكان بيخدمم لسنين طويلة بدون مقابل اول حاجة الايام ديك كان عادل سيد جاء من فلندا في اجازة وهو بيحب الطاهر ود جيرانمم جداً عشان هو زول اخو اخوان وما مقصر مع ناس بيتم ، عادل فكر يجامل الطاهر ود نفيسة ومشى ليهو في البيت وحلف على الطاهر يقبل منو المبلغ الاداهو ليهو الطاهر رفض لكن عادل سيد ما زول كلس حلف طلاق وقال ليهو علي الطلاق يا الطاهر ما تشيل القروش ديل لا بيني ولا بينك وحرم احرقن قدامك ياخي الناس اهل وانت زي اخوي الصغير ود واجب علي يا اخي ، المهم الطاهر قبل المبلغ من عادل ، اها الطاهر عندو ود عمو الطيب ادريس في سلطنة عمان لما سمع بالطاهر داير يعرس اتصل عليهو بارك ليهو وقال ليهو خلاص الريحة حقت العرس كلها علي انا وبالفعل رسلا ليهو كاملة ريحة ما خمج تلاتة تلاتة ، اها تهاني دي ما بت الحلة وبت جيران ناس الطاهر ود نفيسة وعندهم قرابة شديدة مع بعض وهي برضها مغتربة مع زوجها لما سمعت قالت لزوجها والله الطاهر ود خالتي نفيسة عرسو الشهر الجاي وياريت لو نرسل ليهو اي حاجة انت عارف وقفتو مع ناس ابوي والله ما مقصر معاهم ، زوجها يقول ليها كيف يا اخ والله الطاهر دا لو اديناهو عيونا ديل ما يكفنو حقو اسمعي امسكي دي 1000 ريال امشي اشتري ليهو كم توب سوداني كدا النرسلا ليهو للشنطة ,,,,,,,
المهم الطاهر في عرسو ما خسر جنية احمر لانو كل شئ في العرس جاهو من برة لدرجة انو بتاع الفرن البلدي في الحلة حلف ما يشيل حق رغيفة واحدة واعتبر الرغيف مجاملة منو للطاهر وبتاع الكراسي والصيوانات حلف وبتاع البوكسي حلف والطباخ حلف الحلة كلها حلفت ما تشيل قرش من الطاهر ود نفيسة والفنان زاتو حلف وبتاع الساوند حلف الوحيد الما حلف بتاع الاورغن لانو الاورغن ما حقو ماجرو ههههههههههههه ادوهو قروشو من حق النقطة طبعاً الكشف بتاع الطاهر جاب قروش اكتر من كشف ود شيخ الحلة زاتو لانو الطاهر مجامل المحلية كلها ...
دا الطاهر ود نفيسة الانسان السوداني البسيط البحب الناس والناس بتبادلو حب بحب انسان جميل وشهم بيقيف ويسهر علي خدمة الناس في نكران للذات فريد من نوعه عشان كدا لما جاء واجب الطاهر ود نفيسة الحلة كلها وقفت ليهو وردت الجميل للطاهر ود نفيسة المثال الجميل للشاب السوداني المحبوب ...
نواصل ،،،،،،،،،،،،،،،،،،،،،

[أبومهند]

الرائع أبداً مزمل لك كل الحب والود على هذا السرد

الجميل ووفيت وماخليتنا حاجة نقولها بس استحضرت

بعض كلمات لشاعرنا الراحل صلاح أحمد ابراهيم له الرحمه

بيقول :

سلام على موطني في البلاد

على أهله الخيرة الطيبين

ملاذ الغريب، سياج الضعيف

الحماة الأباة ليوث العرين

ذوي الأنفس الرائعات العزاب

عليها من الحق نور مبين

لك مودتي

[مزمل محمد وداعة الله]

الرائع ابو مهند لا شك ان الصفحات البسيطة قد ازدانت بمرورك الكريم وانت توقع بصمة البسطاء على البوست
ولا شك ان قصة الطاهر ود نفيسة قد استهوتك لانك قد رايت فيها شخصاً تعرفه لانك انسان بسيط وتعشق البساطة
شكراً اخي ابو مهند على الاضافة والابيات الرائعة لواحد من اعظم شعراء بلادي من تغنوا للبسطاء من ابناء شعبي الاحرار
الاستاذ صلاح احمد ابراهيم صاحب الروائع والدرر الجميلة ....
اخي ابو مهند دمت كما العهد بك رائعاً حد الدهشة وارجو ان تستمتع بقصص البسطاء
ودمت سالماً ،،،،،،،
خالص مودتي ،،،

[تهانى]

أخي مزمل .. السلام عليكم

كما عهدناك دائما مبدع تغيب وتأتينا بالجمال،، والله العظيم عندما قرأت البوست كنت في غاية المتعه مع روعة السرد وشخصية الطاهر السودانيه الاصيله البسيطه لقد رجعت بنا الى الزمن النقي زمن المروءه والشهامه ،،

والله الطاهر يستحق عيونا مش الريحه والتياب ،، لقد نحت لنا هذه الشخصية وصورتها اجمل تصوير ..


لك جزيل الشكر أخي مزمل .. وفي انتظار المزيد من بساطة وجمال اهلنا الحلوين ..


لك تقديري واحترامي ..

[Adil Sayed]

ود بلدي الحبيب مزمل انا كنت اعلم ان عودتك ستأتي بالجميل و يا راجل الطاهر ود نفيسه يستاهل اكثر و اكثر و بالمناسبه سألتو قلت ليهو اخبارك شنو بعد العرس قال لي اخباري كلها بتلقاها عند مزمل ود محمد وداعة الله دحين يا ود بلدي عليك الله ما تقطع اخبار الطاهر و يا لك من رائع مزمل.

[مزمل محمد وداعة الله]

عملاقة الحروف الآثرة المراءة البسيطة التي تتمدد قامتها في المنتدى بقامة وطن من البساطة والروعة العزيزة تهاني
سعادتي لا توصف برجوع هذه البساطة والسرد الجميل لواقع اهلنا الطيبين البسطاء والتي تزداد القاً بمداخلاتكم انتم اهل البساطة والجمال ، وبالجد يا تهاني الطاهر ود نفيسة شخصية موجودة في حياتنا كلنا وتهاني وعادل سيد والطيب ادريس موجودين ايضاً في حياتنا وبيقدموا هذه المساعدات في كل يوم وديل نحن يا تهاني ودي بساطة اهلنا الطيبين
اولاً شكراً على التياب الرسلتيها للطاهر ود نفيسة والشكر عبرك لزوجك ايضاً والشكر لك ثانياً وانت توقعين في دفتر الحضور على هذا البوست المستمر بتفاعلكم انتم
لك اختي تهاني كل الود والاحترام ،،،،

[مزمل محمد وداعة الله]

ود بلدي الحبيب مزمل انا كنت اعلم ان عودتك ستأتي بالجميل و يا راجل الطاهر ود نفيسه يستاهل اكثر و اكثر و بالمناسبه سألتو قلت ليهو اخبارك شنو بعد العرس قال لي اخباري كلها بتلقاها عند مزمل ود محمد وداعة الله دحين يا ود بلدي عليك الله ما تقطع اخبار الطاهر و يا لك من رائع مزمل.

ود بلدي عنوان البساطة في كل الازمنة والفراغات الممتدة عادل ود سيد
اولاً مشكور علي القريشات العصرتها لاخوك ود جيرانكم الطاهر ود نفيسة واللي اكيد ساعدت كتير في مشروع زواجو الميمون
وشكراً ود بلدي عادل سيد لانك بالجد في كل مرة بتشجعني وتبث فيني روح المواصلة للسرد الجميل لحياة البسطاء ابناء شعبنا الرائعون وانت متابع جيد ومشارك اصيل لهذه البساطة وبكم يستمر نبض الابداع في شريان الالق المتواصل وصولاً الى المرتجى
تخريمة : يا ود بلدي الطاهر ود نفيسة ما فاضي لينا اليومين ديل ضارب شهر العسل وعامل نائم اصلوا اخونا خالد كشول ما كان دفعتو في الثانوي ورسل ليهو مبلغ معتبر لشهر العسل صاحبك مشى كسلا وضرب نسيم القاش وآمنة بت البشير مالية عليهو الدنيا خليهو شوية وورحكا نشوف عمتك (قلد اليمن بت مساعد ) ....

[مزمل محمد وداعة الله]

طبعاً اي مجتمع واي قرية صغيرة كانت او كبيرة او اي حي من احياء مدنا السودانية الجميلة بيكون فيهو شخصيات رمزية موجودة متاصلة في المجتمع وشخصيات ليها كيان ووجود في عمق المجتمع والناس كلها بتحترمها وتقدرا وتتعاطف معاها وعادة بتكون الششخصيات دي محبوبة او كلمتا مسموعة اها من الشخصيات دي شخصية خالتنا ( قلد اليمن بت مساعد البشاري ) مراءة مالية مركزها تمام والحلة كلها بتحترم قلد اليمن بت مساعد لانها مراءة شخصية وعارفة بواطن الامور وحكيمة وبتعرف الاصول السودانية تمام ، خالتك قلد اليمن مرة حباها الله بصفات نادرة وجمال طبيعي فريد ملامحها جميلة وشها ابيض وشفاهها خضراء ( مدقوقة ) علي عادات اهلنا زمان وخدودها مشلخة تلاتة خطوط علامة جميلة وعيونها سوداء وجميلة وصافية واسنانها بيضاء ناصعة وشعرها خليط بين الابيض والاسود مديها هيبة وتجارب سنوات كتيرة ، قلد اليمن ابوها الحاج مساعد ود حمد البشاري شيخ الحلة القديمة وامها زينب بت الامام علي والمشهورة ببت السرتي اسرة من اعرق اسر المنطقة على الاطلاق ودا خلى قلد اليمن تتمتع بالمكانة المرموقة بين حريم الحلة والكلمة المسموعة ، قلد اليمن متزوجة من ود عمها العمدة التجاني ود حمد واسمو عوض الكريم ولقبو الشريف واحد من اعيان المنطقة واسرتم بتتكون من مجموعة من الاولاد والبنات اتربوا علي الخصال الجميلة لهذه الاسرة ،
شخصيتنا الجميلة قلد اليمن بت مساعد عندها حكاية طويلة في القرية ، قلد اليمن الحلة كلها بتحبها وتحترم رايا وتاخد مشورتا في كل شئ لانها انسانة حكيمة جداً وبتوزن الامور بالعقل ، قلد اليمن عندها صندوق هي المسئولة عنه نسوان الفريق كلهن بيختن فيهو لانو قروشو مبروكة ومواعيدو 100% عشان المسئولة عنه قلد اليمن بعدين قلد اليمن عاملة لنسوان الفريق جمعية بتاعت عدة كل واحدة تتدفع مبلغ من المال واشترن بيها عدة خاتاها قلد اليمن عندها في مخزنها للمناسبات السعيدة والحزينة وتقريباً كل نسوان الفريق مشتركات فيها يعني حلت ليهن مشكلة جيبوا حلل فاطمة بت النسيو لا جيبوا صواني الرضية بت الامام ودي فكرة جميلة من افكار خالتك قلد اليمن بت مساعد ، قلد اليمن بت مساعد مشهورة بين الناس بانها بصيرة وبصيرة دي يعني متخصصة في اصبات المفاصل والكسور والفكك وما شابه وايدا زي ما بيقولا فيها الشفاء ولوقت قريب جداً مافي زول في الحلة اذا اتكسرت ايدو او رجلو بيمشي يجبصا في مستشفي لانو جبيرة خالتك قلد اليمن اقوي وانفع من اي جبص لدرجة انو ناس القرى المجاورة كلهم بيجوا لقلد اليمن عشان يجبروا كسورم لسمعتها الطيبة بين الناس ،
قلد اليمن مراءة صلاية جداً وعلامة الصلاة مطبوعة في جبينا الابيض الناعم من زمن وسبحتها الخضراء الجميلة ملفوفة في ايدها اليمين منذ سنوات وحجت بيت الله العتيق ثلاثة مرات في عمرها ،
طبعاً في الجزيرة عندنا بعض الناس الدخلاء الفرضت عليهم ظروف الحياة من كوارث طبيعية ومجاعات انهم ينزحوا من غرب السودان ويخشوا مشروع الجزيرة بحثاً عن العمل وما يسدون به رمق العيش وديل كتيرين جداً في كل قري الجزيرة وبعضهم استوطن القري واصبح من اهل القرية وامتلك ارض وبيت وبعضهم توفى وترك اطفال صغار يتامى ما عندهم حق اليوم اها واحد منهم اسمو ادم البرقاوي كان بيشتغل في الخلاء مع عمك عوض الكريم الشريف زوج قلد اليمن وتوفى وترك ليهو ولد وبت مع امهم وكانوا ساكنين في بيت مهجور قريب من بيت قلد اليمن ومن يوم وفات ادم البرقاوي خالتك قلد اليمن تكفلت بتربية الاولاد ديل وشغلت امهم معاها في البيت وبقت تديها كل شهر مبلغ معتبر يعينها هي واولادا على الحياة واصبحت مسؤولة عن تعليم الاولاد وصرفت عليهم زي اولادا لانها انسانة مؤمنة بالله وبتعاليم الرسول الكريم صلى الله عليه وسلم عشان كدا ربنا كان بيفتح عليها في كل شئ حتى في بيع اللبن بتاع بقرات قلد اليمن فرق كبير بينا وبين ناس الحلة ودا كلو لانو قلد اليمن مرة مرة بتربى ايتام وتعولم ،،
قلد اليمن بت مساعد زي ما قلتا ليكم مرة نظيفة جداً ومرتبة في حياتا وكل شئ عنده بميزان دقيق جداً عشان كدا اشهر حاجة بتميز قلد اليمن في مناسبات الحلة في الاعراس لما يجيبوا الطباخ بيقول لناس العرس انا ماعندي شغلة بالكسرة وملاح ام رقيقة شوفو ليكم مرة تمسك الشغلانة دي اها احسن زولة تمسك الشغلانة دي قلد اليمن بت مساعد وصاحبتا خديجة الرويشا ، الطباخ بعد يسلق الضلع بيدهن الشوربة بتاعت الضلع قلد اليمن تلايق ليك الشوربة بالويكة وتعمل ليك منها ام رقيقة ما خمج وتجيب الكسرة والصحانة والكور لزوم القرف مع كل صينية طالعة لازم يكون في صحن كسرة كبير وكورة ملاح ام رقيقة الجماعة يهبشوا باقي الحاجات ولما يجيو لام رقيقة يتخاتفوها خطف من لزتها وطعمها الفريد الحاجة الوحيدة البيطلوب زيادة فيها هي ام رقيقة قلد اليمن بت مساعد بقت اشهر ام رقيقة في الجزيرة
الجماعة من المداعبة اطلقوا علي صحن الكسرة وام رقيقة صحن قلد اليمن ، الواحد يكورك للشفع بتاعين الزيادة ( ياولد هاك اجر لحقنا زيادة قلد اليمن سريع ) ، مش كدا وبس قلد اليمن مشهورة بي حاجة تانية مشهورة بي حلة الكمونية في المناسبات والله قال ليك كمونية قلد اليمن بت مساعد بتكمل قبل الضلع كمونية ماسسة صاح بالهبهان والعرق الاحمر ومغسلة بالموية الحارة تقول لي ضلع ، لدرجة انو العرس الما بتجي فيهو قلد اليمن تشد ليها حلة بيكون مسيييييييييييخ ما فاضل ليهم الا يقولو العروس ما بتخش الا قلد اليمن تشد كمونيتا ههههههههه ،،،،،،،
قلد اليمن بت مساعد اصبحت رمز من رموز القرية وشهرتها طبقت الافاق وسمعتها سبقتها لاماكن ابعد من القرية بخدماتها الجميلة البتقدما لمجتمعها وبانسانيتها الفريدة فاصبحت مثال جميل لكل امراءة سودانية بسيطة وجميلة بخصالها وعفتها وجمال نفسها البسيطة
التحية عبر خالتنا قلد اليمن بت مساعد لكل ام وكل امراءة سودانية تحمل هذه الملامح السودانية البسيطة وتعكس الوجه الجميل لحواء السودان ،واتمنى ان تتاصل شخصية قلد اليمن بت مساعد البشاري في نفس كل امراءة سودانية تحمل هم مجتمعها الصغير والكبير
ونواصل ،،،،،،،،،،،،

[مزمل محمد وداعة الله]

احبة البساطة والالق الجميل عبر حكايات البسطاء المتجددة ابداً اهلاً بكم من جديد عبر هذه السلسلة المتواصلة للنبش في بساطة الشعب السوداني الاصيل والبحث عن روعة الانسان السوداني وبساطته وطيبته التي اخذت تتلاشي بفعل فاعل في محاولة للعودة الى الجذور بالتذكير بكل ما هو جميل في شخصيات متاصلة في عمق المجتمع ونشاهدها كل يوم نعيش معها حلو اللحظات ونقاسمها الحزن والفرح ..
اليوم احبتي اخترت لكم نموزج جديد لشخصية متناقضة فيها الخير والشر يتصارعان ابداً هي شخصية البشير الصلباط ، ودا لقب اطلقو عليهو ناس الحلة لانو زي ما هم شايفين انو زول صلباط ومعني صلباط انو اي حاجة بيحشر فيها انفو واي حاجة يشوفا بتصلبط فيها ويقول انها حقتو او هو العملا او هو المساهم الاكبر فيها
اسمو الكامل هو البشير ود دفع الله ود الصاوي رجل في الخمسنات من عمرو ، لم يحظي بقدر كافي من التعليم وتوقف عن الدراسة في السنة السادسة فقط واتجه للعمل في الزراعة ، ثم سافر الى السعودية واشتغل 10 سنوات هناك وعاد ، اشترى ليهو ارض وبناء بيتوا واتزوج من بنت خالو ورزق باولاد وبنات وبقى يشتغل في الزراعة والتجارة واحوالو المادية كويسة جداً
جارو من اليمين الحاج ود الفحيل راجل عربجي عندو كارو بحصان ورجل مكافح رغم فقرو وجارو عن اليمين استاذ الامين الصادق ناظر المدرسة الابتدائية في الحلة وود عم البشير
حياتم عادية جداً زي اي اسرة في مجتمع القرية ..
اها لقب الصلباط دا جاء للبشير من وين ، قال ليك البشير دا مع طيبتو لكن عندو خصال شينة جداً بيحب الفتن شديد وبيحب الصلبطة في كل شي ، مرة مع عمك الحاج ود الفحيل الراجل المسكين دا دخل معاهو في شمطة كبيرة جداً في موضوع تافه جداً قال انو الحاج ددا داير يبني ليهو زريبة للحصان بتاعو جنب حيطة البشير اها البشير اتصلبط في متر بينم قال للحاج انت خشيت علي بمتر وانا المتر دا دايرو بس تكسر لي الحيطة دي وترجع لي ورا وتديني المتر بتاعي وال والله انا يشتكيك في المحكمة
الحاج قال ليهو يا البشير يا اخوي انت ما واعي انا بنيت قبل ما انت تجي هنا الخشا علي اخوه منو علي الحرام انت الشلتا مني متر بس انا سكتا سا ي عشان نحنا اهل ... البشير مصر قال انو الحاج هو الشال المتر والكلام كتر وقربوا يضاربوا والكواريك الناس اتلموا عمك عبد الرحمن الاسيد كبير الفريق خشى معاهم ( يا ناس انتو جنيتو البشير انت ما عاقل والحاج دا الانت البنقول عليك عاقل وواعي الكلام دا عيب عليكم ، حاجة سالمة بت المك جارتم ونسيبة الحاج مرة كبيرة وحكيمة وصلاية ( يا اولادي الكلام دا عيب عليكم البتسووا فوقو دا شنو متر الواطة طائر في السماء المتر بيسوي شنو استهدو بالله انتو اهل والبشير بي هناك يكورك علي الحرام المتر حقي والحاج يصرخ حقك بي وين والشمطة حدها الركب هنا ادخل الاستاذ الامين ود الصادق وقال ليهم خلاص نحن نجيب ليكم المساح من مدني ويقيس مربوع كل واحد ويشوف المتر دا حق منو الناس كلها قالت ايوا دا الكلام البشير بطبط وقال انا ما بجيب مساح الداير يجيبوا يجيبوا ، استاذ الامين عارف ود عمو صلباط وكذاب قال ليهو ما عندك مشكلة انا بجيب المساح الجماعة سكتوا وكلو واحد اتخارج يشوف مصالحو ، بكرة الصباح استاذ الامين جاب المساح وبداء يخطط ويرسم والحاج والبشير وناس الفريق معاهو وبعد ساعة زمن عمك المساح قال ليهم والله شوفو البشير دا خاشي علي بيت الحاج دا بنص متر يعني الحيطة دي تتكسر والبشير يرجع ورا استاذ الامين ما عارف زولو صلباط ضحك ضحكة كبيرة وقال ليهو اها دا الدايرو ، عمك البشير ما عرف يخش وين قعد يضاير ، وعرف انو غلطان بس سكت سااي وخش بيتو عمك الحاج ما زول ضكر حلف حرام البشير ما يهد الحيطة ونص المتر بتاعو ما دايرو خجل ليك البشير خجل شديد والموضوع انتهى علي كدا ..
دا واحد من مشاهد الصلبطة بتاعت عمك البشير والمواقف كتيرة واحد من المواقف دي مرة عمك البشير العصر كدا مرق يتفرج علي التمرين بتاع اولاد الحلة في الميدان الكبير الناس ملمومة في الميدان بتتفرج وتشجع وعمك البشير قعد في طرف الميدان جنب شلة من الشباب وقعد ينظر ليهم ( انتو قايلين دي كورة دي والله انا طبعاً اول زول اسس فريق الحلة زمان ولميت اولاد الحلة واشتريت الكفر بقروشي والعراضات ديل انا عملتهن في سوق الحدادين في مدني ب20 جنية زمن الجنية بيساوي 10000 وكنتا كبتن الفريق والله القوون بجيبو من النص والحراس كلهم بيخافو مني والله الشوتة بفكها ومعاها خمسة حجار الحارس لو مسك الكروة بياخد ليهو فلقتين ومافي حلة جنبنا ما غلبناها المحلية كلها غلبناها كان معاي ناس عمكم الساوي ود الاسيد ومنصور اب فكة والدريش وعثمان الاعور وبخيت الجزار وود الطرشا وابكر الفلاتي زمن جميل ولدرجة انو ناس اهلي مدني سمعوا بي دايرين يسجلوني لكن ابوي رفض وقال لي الكورة بتعلمك الصياعة عشان كدا سافرتا السعودية وخليت الكورة ... مع العلم انو عمك البشير دا في حياتو ملمس ليهو كورة لكن تقول شنو صلبطة ساي .
نواصل حكاية الصلبطة مع عمك البشير ،،،،،،،

[تهانى]

أخي مزمل .. لك التحيه والسلام ..


دائما تأتي لنا بكل ما هو رائع وعندما أقرأ سطورك دائما أخرج منها بحكم ،، والله ود البشير اتلوم عديل لكن تعرف أكتر حاجه عجبتني موقف الحاج ود الفحيل زول قلبه كبير وكبر مخه وعمل باصله واتنازل عن هدم الحيطه لرأب الصدع بينه وبين جاره ودي قمة الاخلاق والفهم لانه ما أراد أن يخسر جاره في الوقت الفيه ود البشير ما اتستر مع جاره وقدر العيش والملح وحق الجيره ..


في انتظار المزيد من الروائع ودائما الواقع عندما يسرد جميل ..

لك كل الشكر والتقدير ..

[مزمل محمد وداعة الله]

عملاقة الحروف سيدة كل العصور الرائعة تهاني
لك التحايا من عمق البسطاء وانت توقعين في دفتر الحضور في ذاكرة هذا البوست المستمر بمداخلاتكم ابداً
وهذا هو واقع الحياة السودانية البسيطة ابداً قد يختلف الناس ولكن المعدن اصيل والنفوس صافية وطيبة طيبة الانسان السوداني الجميل ، ولعلي اليوم قد قصدت وانا اطرح هذه القصة الخيالية ان اصف حال الكثيرين منا وهم يدعون امجاداً ليست لهم ويتطاولون على حقوق اناس بذلوا لاجلها الغالي والنفيس وكان جزاءهم النسيان ونسب اخرون الجهد لهم امثال البشير الصلباط وهم كثر تضج بهم الحياة السودانية والمجتمعات الصغيرة في القري والاحياء
شكراً سيدتي بقدر كل حرف خطه يراعك الراقي المحترم
ولك الف تحية اجلال ونواصل هذا السرد باذن الله لبسطاء الحياة السودانية
ودمتي سالمة اخت تهاني

[نور الصباح]

صاحب الروائع والقلم الانيق دومــــــــــا مزمل
البشير هو صوره مكرره للعديد من السودانيين وغيرهم اللذين يحبون ان يتميزوا بمجهود الاخرين
بس عجبتني حتة عمك ود الفحيل لما قال ليهو نص المتر بتاعي عفيتو ليك ، لانه هكذا حال السوداني الاصيل ود البلد حتي لو غيروا غلط فيهو برضك بيخجلك ببساطه واصالتوا .
يلا يا مزمل ..... كمل لينا باقي سيناريو البساطه الجميل .:clap:

[مزمل محمد وداعة الله]

صاحب الروائع والقلم الانيق دومــــــــــا مزمل
البشير هو صوره مكرره للعديد من السودانيين وغيرهم اللذين يحبون ان يتميزوا بمجهود الاخرين
بس عجبتني حتة عمك ود الفحيل لما قال ليهو نص المتر بتاعي عفيتو ليك ، لانه هكذا حال السوداني الاصيل ود البلد حتي لو غيروا غلط فيهو برضك بيخجلك ببساطه واصالتوا .
يلا يا مزمل ..... كمل لينا باقي سيناريو البساطه الجميل .:clap:

الكاتبة المتالقة صاحبة القلم الجميل وامبراطورة القصة القصيرة نور الصباح
شاكر لك هذه المداخلة الانيقة والاضافة الجميلة وارجو ان تكون هذه السلسلة قد نالت اعجابك ليتواصل هذا الالق بحضوركم جميعاً اثراءً لهذه البساطة الضاربة في القدم للانسان السوداني الجميل
شكراً نور الصباح وبكم يتواصل النبض

[مزمل محمد وداعة الله]

احبت التلاقي عشاق البساطة يتواصل الحديث عن صلبطة عمك البشير الصلباط ومواقفو الحياتية
وندخل على عمك البشير وهو في صيوان عزاء المرحومة الحاجة كلتوم بت الضو سراج النور والناس في اليوم التاني للعزاء الساعة 12 قبل صلاة الظهر الجماعة قاعدين في ديوان الفراش مجموعات صغيرة وفي مجموعة خارج الديوان في صيوان العزاء ودا المكان المحبب لعمك البشير عشان يفتح نضمي ونقة مع الجماعة ، الشلة فيها بابكر ود الحمري والنور الترزي ومعاوية ود الفكي الارباب وحسين عوض الكريم الاستاذ وصلاح البنا والنعيم ود المكي والصديق العشا وعمك البشير في نصهم يقطع ساااااااااي اسمع والله صاحبك الطريفي ود المامون طلع اي كلام امس ركب معانا في البوكسي ماشي مدني ومعاهو مرتو خديجة الحمراء والله هرشتو ليك هرشة ودفعت القروش هي من شنطتا وهو ماشي وراها دلدول ساااي اتلفت ويلولح في راسو متل مروحة الطربيزة ههه ، يتدخل معاهو الاستاذ حسين عوض الكريم ياالبشير يا اخي مافي داعي للكلام دا عيب عليك تخش في اعراض الناس الطريفي دا ما اخونا يا اخي ، البشير باصرار يا زول اعراض شنو والله انا بحكي في الحصل قدامي هسي في زول بيرضى مرتو تحكمو كدي ، يتدخل النعيم ود المكي ، والله البشير ما فيها حاجة يعني شنو القروش عند المرا دي حاجات يمكن متفقين عليها مع بعض ، لكن الكلام دا لي منو البشير ما بيوقفوا شئ اصلو زول بيحب الفتن والقطيعة اعوذ بالله شغال دقدقدقدقدقدقدقدقدقدق ما خلى للطريفي صفحة ينوم عليها والجماعة منهم الخبيث الزي البشير متكيفين ومنهم الما بيحبوا الكلام دا زي استاذ حسين ويستمر في الدراب والكلام الكتير ويخلي الطريفي يقبل علي عبد الملك الاحوص ويخليهو ويقبل على الطاهر الجزار في ساعة يكون قطع في عشرة رجال من الحلة ما خلى ليهم حاجة وبعد ينفض المجلس ويرجع البيت في الشارع يقابل ليك الطريفي الزول الكان بيقطع فيهو وبدون خجل يقول ليهو الطريفي وينك يا زول والله الليلة الجماعة في بيت الفراش اشتغلوك شغل هههههه ،،،،، الطريفي يسالو منو دا الاشتغلني وقال شنو ، البشير يغشها في الجماعة التانين والله ناس فلان وفلان وفلان قالوا الطريفي بيخاف من مرتو وبسمع كلاما وممسكا قروشو ودقنو ههههههههه
الطريفي دمو يفور ويحلف علي الطلاق ما اسيبم الا اسالم ، البشير يهرش ويحلف عليهو يايايايازول انت ما واعي اوعك تمش تعمل لي معاهم مشكلة يقومو يقولوا انا الكلمتك وداير افتن بينكم لالالاللا اعمل حسابك انسى الموضوع دا ( شوفتو الخباثة دي كيف ) وطوااااااااااااااااالي هو في الحالة دي فتن شديدة وينقل الكلام من دا لي دا وعامل شمطة في الحلة ..
البشير دا قال ليك مرة قبل كم سنة كدا ماشي في الخلاء بحمارو جاي من حواشتو وعندو سخلة صغيرة راحت ليها كم يوم كدا ما لاقيها ومجنناهو جن اها اثناء ما هو راجع علي الحلة شاف ليهو شافع من اولاد البرقو الصغار ديل سايق ليهو بهائم وراجع على البيت البشير لمح ليهو سخلة تشبه سخلتو ، تترب طرف ليك من الحمار وجرى على السخلة ومسكا وكورك ليك في الشافع يا ولد انت ود منو الود خاف وقال ليهو انا ولد عبد الله البرقاوي ، عمك كورك ليك فيهو يا حرامي السخلة دي لقيتا وين سرقتها مني ااااا ، والله اليلة ما اخليك الولد من الخوف خلى بهايمو جري على البيت وكورك لابوه وكلمو ، هنا البشير رفع السخلة في الحمار ومشى علي البيت وكورك لمرتو السارة بت الفكي السارة هوي الحقي السخلة الرايحة لقتا ، السارة سخلت شنو يا راجل ، يا مرا انت جنيتي السخلة الراحت مننا قبل يومين ، السارة اتزكرت ااااااااااااااااي لقيتا وين ، لقيتا عند ولد البرقاوي دا الحرامي سرقا الليلة ما بخليهو هسي بمش افتح فيهو بلاغ في النقطة والله ما اريحوا الحرامي الكلب ، السارة يا راجل مافي داعي سخلتك لقيتا خلاص المسامح كريم ، مسامح والله ما اسامحو الا اشتكيهو اسجنو عشان يتعلم الكلب ...............
عبد الله البرقاوي دمو فار وجاء لبيت الحاج عبد الرحمن شقيق البشير الكبير راجل في مقام شيخ الحلة وسلم عليهو الحاج استقبلو وعبد الله زعلان جداً الحاج سالو مالك زعلان يا عبد الله يا اخوي انشاء الله خير ، خير كيف يا حاج مع اخوك المجنون الاسمو البشير دا ، الله يقطع سيرتو عمل شنو تاني ؟ والله الزول دا داير اجننا عديل كدا، اخوك شال البهيمة بتاعتي وسكا ولدي وقال ليهو حرامي قال عندو سخلة رايحة ودي حقتو نحنا سرقناها الكلام دا عاجبك ، الحاج لا والله تب ما ليهو حق ارح عليهو النشوف الحاصل شنو .
في باب الشارع قابلم البشير اهلاً عبد الرحمن اخوي خش اتفضل ، هوي الحرامي دا الجابو معاك شنو والله الليلة ما اسيبو انا من دربي دا ماشي البوليس سرق السخلة والليلة بفتح فيهو بلاغ اسجنو ما داير اي مفاهمة ، الحاج يا البشير اسكت يا اخي النفهم الحاصل شنو انت عرفتها كيف دي سخلتك امكن شبه ساي ، الغريبة طيلة الكلام دا البرقاوي يضحك ومبتسم ما شاكل ولا دافع عن نفسو ولا قال اي شئ الموضوع دا استفزا البشير شديد واستغرب ليهو جداً قام سالو اها ما تتكلم ما تقول حاجة يا حرامي ، البرقاوي قال ليهو الله يسامحك يالبشير يا اخوي انا والله بعاين للحاج عبد الرحمن اخوك دا وقبل ما ارد عليك قدام حاج عبد الرحمن دا عليك الله جيب السخلة القلتا انها حقت دي ، البشير بي فورة وثقة شديدة ااي بجيبا ليك قايلن بدسها منك يا ولد جيب السخلة النشوفو داير يقول شنو الولد جرا السخلة وجابا البرقاوي قال لحاج عبد الرحمن اسمع يا احاج اسالو اول شئ دي هي السخلة بتاعتو الرايحة والانا سرقتها ولا لا البشير قال ليهو ياهااااااااااا زااتا البرقاوي قال للحاج يا حاج عليك الله امسكا واتاكد منها دي شنو الحاج فهم قصد البرقاو ي ورفع رجل السخلة عشان يتاكد منها المفاجاة الكبيرة انها طلعت عتود يعني ( ذكر ) ومش سخلة ( انثى ) ودا السبب الخلا البرقاوي يضحك وما يدافع عن نفسو والله البشير دا بعاين للعتود دا قرب يجن لا حول ولا قوة الا بالله عتود ؟؟؟؟؟؟؟؟؟ الله يكسفك يالبشير حاج عبد الرحمن لكز ليك البشير بعصاتو اها امشي البوليس انشوف البشير دا بقى اصغر من سمسمة وسكت ساي والبرقاوي مسك عتودو من اضانو وقال لحاج عبد الرحمن المرة دي انا البمشي البوليس ، يا زول بوليس شنو الناس اهل عمك البشير ضرب الجرسة وقعد يتاسف ويعتزر والبرقاوي مصر امشي البوليس لحدي ما اقنعوا حاج عبد الرحمن اتنازل وقبل ومشى بيتو وحاج عبد الرحمن قال للبشير اخوه والله انا غلطان كان اخليهو يمشي البوليس عشان تتادب الله يحرجك يازول انتا مالك بتحب المشاكل كدا ،،،،،،،،،، الغريبة انو البشير كان سارح بعيد ولا جايب خبر لكلام اخوه دا وفي جواهو يتمتم والله مش كان طلع عتود برضو دي سخلتي سخلتي ..........
المرة دي الصلبطة قربت تسجن عمك البشير لولا تدخل اخوه حاج عبد الرحمن وشهامة عبد الله البرقاوي والمرة الجاية الله يستر
بكرة احكي ليكم فلقة البشير من السماني العوير في الجزارة .........

[ابوبكر عزالدين]

الرجل الدهشه كما احب ان اطلق عليك مزمل والله كلما الواحديغيب منك فتره ويرجع يلقاك اكثر دهشه مماتركك عليه قمة في الجمال والروعه لكن عمك ود البشير ده راجل مبالغه لك مودتي واحترامي وفي انتظار المزيد

[مزمل محمد وداعة الله]

الرجل الدهشه كما احب ان اطلق عليك مزمل والله كلما الواحديغيب منك فتره ويرجع يلقاك اكثر دهشه مماتركك عليه قمة في الجمال والروعه لكن عمك ود البشير ده راجل مبالغه لك مودتي واحترامي وفي انتظار المزيد

الفتي الابنوسي الساحر ابو بكر عز الدين
لك اسمى ايات الشكر وانت تبصم بصمة المتابع الشقف لهذه السلسلة ابداً وقد افتقدناك كثيراً في الفترة الماضية ونحمد الله على عودتك الميمونة ليتواصل هذا النبض بتواصلك الدافئ
ومعك حق فعمك البشير قضية كبيرة جداً ولا زالت مشاكله تنتظر في اقصى المخيلة لتجد دورها من السرد وسوف نواصل معه فهو شخصية متاصلة في المجتمع وامثاله كثر يجب الوقوف عندهم وتسليط الضوء عليهم ..
شكري وامتناني ايها الابنوسي المبدع ..
ودمت سالماً .......

[مزمل محمد وداعة الله]

احبت البساطة الرائعين عدنا لكم من عمق البسطاء في سودان البساطة والناس الرائعين لنكتب عن ما عشناه واقعاً عن هولاء السمر الذين يتسرب عشقهم دواخلنا مع الانفاس
والناس في وطني اجمل ما فيهم بساطتهم لكن معدنهم اغلى من الذهب
انتظروني فمعي الكثير عن هولاء السمر البسطاء
قريباً ساروي لكم قصص واقعية عايشتها بينهم في القرى والحضر
بس شيلو الصبر
واستنو شوية

[ابوبكر عزالدين]

شنو يامزمل الجهجه دي دي تشاهد غدا ولا شنو ؟ طبعا انا جيت جاري قلت مزمل كاتب حاجه جديده بعد ماعرفت انك جيت السودان والله ياريت لو ما رجعت تتصل علينا يامزمل على العموم انا تركت ليك رقم الجوال في البروفايل تبعك لك مودتي واحترامي وانا في انتظار جديد البساطه يارائع

[مزمل محمد وداعة الله]

عشاق البساطة على امتداد مساحات التلاقي الاسفيرية البيضاء عبر صفحات منتدى سنار العملاق
عدت اليكم من عمق البسطاء في سودان الروعة بعد اجازة سنوية قصيرة بين الاهل والاحباب امتدت فقط لشهر من عمر الزمان ، قضيتها بين البسطاء في بورتبيل عشتها بينهم افراحاً واتراح ، عاودت الاهل جميعاً وطفت شوارع بورتبيل المبللة الماطرة ، تنفست رائحة الطين الحبيبة وتلمست الجدران العتيقة ، وسامرت القمر المكتمل بدراً في مساءتٍ حالمة ، تصنتُ ليلاً لاصوات الدهشة التي حدثتكم عنها سابقاً حينما يخيم الظلام وتهدى الدنيا يشجي مسامعي الليل باصوات متناقضة ومتداخلة افهم بعضها ولا افهم البعض الاخر ، اطالع النجوم واتامل انتظامها في دهشة فهناك ( القوس ، وهنا العنقريب ، وتلك هي الثريا تتبسم للوجود في خجل فريد ) ما اشبه الللية بالبارحة ، انها الروعة في احضان الريف الجميل .......
وصلت الى مطار الخرطوم وقبل ان ادلف الى صالة الوصول كانت تنتابني احاسيس ومشاعر جميلة للقاء الاحباب والاهل والاصدقاء ويقفز الى ذهني سؤال يحيرني ابداً ، ترى هل اجد الناس كما تركتهم ؟ ام ان الزمن قد غير في ملامحهم وصفاتهم الجميلة ؟ ولجت الى الداخل والمشاعر تفيض حتى تكاد تخترق الصدر النحيل .
تلقيت خبر وفاة عمي المرحوم يوسف محمد البخيت فور وصولي ، في الصباح توجهت الى بورتبيل وتوجهت الى صالون العزاء ، قابلت الاهل والاصدقاء الجميع كما هم الطيبة تشع من وجههم ويستقبلوك بترحاب ولهفة وشوق افتقدناه كثيراً
كانت ايام العزاء كما وصفتها في هذا البوست عبر الوصف الدقيق للمناسبات الاجتماعية كعادة الاهل بالسودان وبالقرى تحديداً ، انقضت ايام العزاء ، وبداءت استعدادتنا لزفاف شقيقي الاصغر متوكل ، حركة دؤوبة بداءت تدب في كل ارجاء المنزل ، وحركة اخرى خارج المنزل لتجهيز المستلزمات الضرورية للزواج اكثر من اسبوع وانا اركض ما بين بورتبيل وودمدني للتجهيز ، الطباخ ، شركة الافراح ، مستلزمات البيت ، وعندما حانت اللحظة وقبل الزواج بيوم ومساء هطلت الامطار بغزارة شديدة حتى احاطت المياه بالقرية من كل اتجاه مما زاد من صعوبة الموقف ، الضيوف كان يتوجب عليهم الوصول الى منزلنا وهم خائضين معاناة جميلة الجميع مبتسم فلم اسمع يوماً وطوال حياتي ان احداً في القرية قد تضجر من هطول الامطار حتى وان تسببت الامطار في فقدانه احد جدران المنزل فتجده يبتسم ويقول امطار خير وبركة
كانت كل الطقوس للزواج كما هي العادة ، الفطور والغداء والمغرب السيرة خواضة وسافر العرسان الى قضاء شهر العسل في اسمرا وانفض سامر اليوم والجميع منشرح حد الثمالة ..
الناس هناك جميلين في فرحهم واحزانهم ، بسيطون حد اللامنتهى بشوشون ترتسم في ملامحهم السمراء ابتسامة ربانية خلقها الله معهم يوم ميلادهم لا تفارقهم وان جارت عليهم نايبات الدهر لانهم باختصار سودانيون بسطاء ..
مازال انبض يسري بقصص رائعة كما الوعد عن بساطة ابناء شعبنا الرائعون .....
نواصل ،،،،

[سلوى حسن جمبو]

شـكــ وبارك الله فيك ـــرا لك ... لك مني أجمل تحية .

ونقول لك حمدلله على السلامة ونورت دارك بعودتك لها وهى ترحب بيك

ونسآل الله الرحمة والمغفرة للعم المرحوم يوسف

[ابوبكر عزالدين]

الرائع مزمل الف حمدلله على سلامتك وان شاءالله البركه فيكم في فاة عمكم المرحوم يوسف محمد البخيت نسأل الله له المغفره وان يتغمده بواسع رحمته ..
والف مبروك لأخيك متوكل وان شاءالله بيت مال وعيال والعقبه عندك صديقي العزيز ..كما لا يفوتني ان اشكرك على الاتصال والسؤال
ونحن في انتظار بقية البساطه يارئع لك مودتي واحترامي

[عبدالقادر جيلانى]

أيها البسيط الجميل
أحسن الله عزاءكم
وأدام الله أفراحكم
ونحمد الله على سلامتكم

[بورتبيل]

كدا ذي الكنّا حاضرين معاكم

تعرف الصور اكتملت عبر التلفون وعبر هذا البوست

[مزمل محمد وداعة الله]

شـكــ وبارك الله فيك ـــرا لك ... لك مني أجمل تحية .

ونقول لك حمدلله على السلامة ونورت دارك بعودتك لها وهى ترحب بيك

ونسآل الله الرحمة والمغفرة للعم المرحوم يوسف

الاخت الغالية سلوى حسن
لك الف شكر على المرور والترحيب والتعازي ونسال الله ان يديم التواصل بيننا ابداً عبر هذه المساحات
ودمتي سالمة اختي سلوى

[مزمل محمد وداعة الله]

الرائع مزمل الف حمدلله على سلامتك وان شاءالله البركه فيكم في فاة عمكم المرحوم يوسف محمد البخيت نسأل الله له المغفره وان يتغمده بواسع رحمته ..
والف مبروك لأخيك متوكل وان شاءالله بيت مال وعيال والعقبه عندك صديقي العزيز ..كما لا يفوتني ان اشكرك على الاتصال والسؤال
ونحن في انتظار بقية البساطه يارئع لك مودتي واحترامي

الفتي الابنوسي الاسمر كما يحلو لي ان اناديك دوماً ابو بكر عز الدين
لك الف شكر على كلماتك الجميلة والف شكر على هذه المتابعة الدقيقة للاحداث عبر هذه المساحة واشكرك على اتصالك معاي رغم انو الظروف لم تسمح بان اسجل لكم زيارة في سنار ولكن تبقى انت وكل ابناء المنتدى بسنار والخرطوم رمزاً للتواصل والوفاء والشكر عبرك للاخ الغالي مصعب ياسين والذي هاتفته ورحب بي جداً والشكر ايضاً للاخت ام ريم والتى استقبلتني بمكتبها وتحدثنا طويلاً عن المنتدى والايام الجاية شكلها حا يكون كيف وللامانة فالاخت ام ريم انسانة مثقفة وراقية في التعامل واضافة حقيقية للمنتدى سوف نستفيد منها كثيراً ، والشكر ايضاً لملكة الخواطر الاثرة القامة السامقة في المنتدى الاخت العزيزة نور العين والتى هاتفتني ولم استطع ان اقابلها ولكن للامانة ايضاً فنور العين تعشق هذا المنتدى وحريصة على التواصل مع الجميع فهنيئاً للمنتدى بكل هولاء الاماجد
شكراً ايها الاسمر ونتواصل

[مزمل محمد وداعة الله]

أيها البسيط الجميل
أحسن الله عزاءكم
وأدام الله أفراحكم
ونحمد الله على سلامتكم

كبير السلاطين الرائع ابداً عبد القادر جيلاني
لك الف شكر على المؤاساة والتهاني وهذا هو ديدنك متواصل ابداً وتشكل حضوراً راقياً مع الجميع
بارك الله فيك ولك مني الف مساحة شكر وتقدير واحترام فامثالك يجب احترامهم اخي جيلاني
ادام الله علينا نعمة التواصل وادام عليك الصحة والعافية
دمت سالماً جيلاني ،،،

[مزمل محمد وداعة الله]

:msn-wink:
مدثر والله بالجد العرس بس كان فاقدك والصينية الخاتيها دي بالجد زكرتني يوم الغداء وجوطة الناس والطين والمطرة زكريات لا تنسي ليوم خالد
ربنا يجمع الشمل قريب انشاء الله
اقعدوا عافية

[نور الصباح]

صاحب البساطه المعتقه باصالة الزمن الجميل الاخ مزمل
اولا احسن الله عزائكم في وفاة عمكم ، ومبارك عليكم زواج شقيقكم
ننتظر بشوق روائعكم وجديدكم في بساطة الشعب السوداني......

[مزمل محمد وداعة الله]

صاحب البساطه المعتقه باصالة الزمن الجميل الاخ مزمل
اولا احسن الله عزائكم في وفاة عمكم ، ومبارك عليكم زواج شقيقكم
ننتظر بشوق روائعكم وجديدكم في بساطة الشعب السوداني......

صاحبة القلم الجميل الكاتبة المتالقة دوماً نور الصباح
الف شكر على المؤاساة في فقيدنا والتبريكات لزوج شقيقي
ولك الشكر وانت تنتظرين سرد الروائع عن بساطة الشعب السوداني وسوف لن يخيب ظنك فالجديد موجود وسوف تطالعينه قريباً باذن الله لك الف تحية اعزاز وتقدير على مرورك الانيق
ودمتي سالمة نور الصباح ،،،

[تهانى]

أخي مزمل .. نحمد الله على عودتك ،، ولقد نورت المنتدى حقيقي وبانت نسمات السودان وعطره الفواح من خلالك .. وأحسن الله عزاكم في عمكم ورحمه الله وتغمده بواسع رحمته .. ان شاء الله من اهل الجنه ..


لك خالص التقدير والامتنان ..

[مزمل محمد وداعة الله]

أخي مزمل .. نحمد الله على عودتك ،، ولقد نورت المنتدى حقيقي وبانت نسمات السودان وعطره الفواح من خلالك .. وأحسن الله عزاكم في عمكم ورحمه الله وتغمده بواسع رحمته .. ان شاء الله من اهل الجنه ..


لك خالص التقدير والامتنان ..

العملاقة تهاني ..
سعيد انا وسعيدة بك هذه المساحة التي تزدان كلما سطرت اناملك حرفاً عليها
لك الف شكر وتحية اعزاز واحترام وتقدير
ويتواصل نبض البسطاء بمداخلاتكم التي تثري المساحة وتمنحنا اكسجين التواصل
دمتي سالمة ايها العملاقة ابداً بحروفك وادبك الرفيع

[مزمل محمد وداعة الله]

زي ما وعدتكم بان احكي ليكم عن بساطة الشعب السوداني اللمستها اثناء اجازتي القصيرة في السودان والحاولتا احتك فيها بانواع كتيرة من البشر والمجتمعات المختلفة عشان انقل ليكم صورة حقيقية عن بساطة هولاء النفر السُمر من ابناء شعبناء الرائعون
خلال تجوالي بين البشر في السودان لفت انتباهي بساطة من نوع جديد بساطة رياضية لشعب بحب الرياضة ومغموس فيها لابعد حد وخصوصاً حب كرة القدم والمناكفات الدائرة فيها بكل ماهو جميل ورائع
امكن صادف وجودي في السودان احداث رياضية كتيرة بتخص عملاقي الكرة السودانية الهلال والمريخ من خلال تواجدم مع بعض في مجموعة واحدة في دوري ابطال افريقيا للاندية والمواجهة المباشرة للفريقين في امدرمان ، واللاعبين الجدد في الهلال والمريخ وتسجيلات نص الموسم وما صاحبا من احداث واللاعب سادومبا وقصة الكرت وايفوسا وكرت اللاعب وكريم الدافي وتسجيلو للمريخ واللاعب الضجة وارغو الما جاب ليه قون للمريخ لسا ودي كلها احداث عايشتها بين الناس وحدثت لي معاها حكاوي كتيرة
كدي نبداء ليكم بقصة اللاعب سادومبا وشوفوا بساطة الجماهير السودانية وحبها للكرة كيف
معروف انو اللاعب سادومبا لاعب من زيمبابوي واشتراه الهلال وسجلوا بدل من محترف نيجيري اسمو امولادي وصاحبت الحكاية دي مشاكل كتيرة اثارها الطرف الاخر المريخ عن عدم قانونية تسجيل سادومبا للهلال ، المهم الجرائد بداءت تكتب عن وصول سادومبا للمطار وكل يوم الالف من جمهور الهلال يتوجهوا للمطار من الصباح شايلين الاعلام وينتظروا بالساعات ، ويوم وصول اللاعب كان استفتاء جماهيري كبير بشر ضاق بيهم المطار حملوا اللاعب على الاعناق ويكايدوا في اخوانا المريخاب وهاك يا رقيص وغناء ( ساساساسادومبا ) الحركة اتعطلت والمرور اتعطل والجمهور نشوان باللاعب
بعد تسجيل اللاعب في كشوفات الهلال بداء مسلسل الكرت الدولي للاعب الما وصل والناس كلها بقت كل يوم ما عندها سيرة غير كرت سادومبا ( وص ما وصل وصل ما وصل ) لدرجة انو بعض اصحاب المحلات التجارية اخدوا الموضوع دا واطلقوه على واحد من الثياب النسائية السودانية اخر صيحة اسمو كرت سادومبا الثوب دا غالي جداً ونادر جداً ، مش كدا وبس الحلاقين زاتم اغتنموا الفرصة واطلقوا على حلاقة جديدة اسم كرت سادومبا وبقت اخر صيحة من صيحات الحلاقة في السودان ، اتخيل تخش الصالون وتقول للحلاق داير كرت سادومبا وقطعية دائرة بالله شفتوا البساطة دي حدها وين ؟؟؟؟؟؟؟
المهم المناكفات بين الفريقين والجماهير استمرت وكل واحد يشكر في ناسو ناس الهلال فرحانين بسادومبا وكابوندي والمريخاب بغنوا بوارغو وكريم الدافي ، لحدي ما جاءت مباراة الفريقين ضد بعض في استاد المريخ ، اليوم داك انا كنتا في الخرطوم وسائق سيارة اخوي وكل ما امشي بشارع القى لي مجموعة من المشجعين بيغنوا في الشارع لابسين اما شعار الهلال او المريخ وشايلين الطبول والناس المارة كلها تشاركم الفرحة الجميلة دي والمداعبات حاجة تحسسك بالجد انو نحنا شعب متفرد في كل شئ ، بعض الناس كانوا خايفين من الحا يحصل بعد المباراة اذا لا قدر الله فريق من الفريقين خسر لانو اكيد الجمهور ما حا يسكت ، لكن ربك لطف بالجميع وطلعت الكور تعادل ونامت الخرطوم هادئة مطميئنة ، حسيت تاني يوم انو بالجد الناس دي بسيطة ودا من خلال ذهابي لكشك جرايد في الشارع العم عشان اشتري الجرائد في الصباح لقيت الناس دي واقفة بالصف للجرائد وكلهم دايرن يشتروا جرائد الليلة عشان يشوفوا الصحافة كتبت شنو عن المباراة دي حقيقة لفت انتباهي موقف هزاني شديد جداً اثناء وقوفي مع الناس للجرائد لمحتا لي واحد معوق سنو بين الاربعين والخمسين ومن هيئتو وملابسو اتبين لي انو متسول لانو معاق وما عندو عجلة معاقين بيمشي علي اياديهو وكان شايل ليهو خمسمائة جنيه وعايز جريدة قوون عرفتا طوالي انو هلالابي المهم جبتا ليهو الجريدة وبديت اتكلم معاهو قلتا ليهو انت هلالابي ضحك وقال لي ليه ما بين علي ؟ قلتا ليهو لا والله باين عليك هلالابي قال لي والله
انا بشجع الهلال دا من زمن ناس قاقرين النقر وما برضا فيهو اي كلام ، ضحكتا معاهو ومشيت وقلتا لي نفسي بالله شوف الناس دي بتحب الكورة دي كيف الراجل امكن ما اكل من الصباح لكن الجريدة اهم عندو من الاكل زاتو ( دي البساطة الانا بحبها ) ...
بكرة بواصل ليكم البساطة العجيبة دي عن الكورة ....

[ابوبكر عزالدين]

الراجل الدهشه مزمل صاحب كل البساطه اولا حمدا لله على سلامتك كما كنا ننتظرك بفارق الصبر لرؤيتك وانك تحلق ببسطاء الشعب السوداني داخل هذه المساحه التي هي ملك لك وحدك،،،،،

بعد إذنك احب ان اشاركك اخي مزمل عبر مساحة الرياضه وبساطة الرياضين السودانين هناك المشجع الهلالي المعروف في سنار (جــــــــدو) الرجل المقعد والذي تحول الى المعسكر الاحمر اثر تراجع الازرق وتقدم الاحمر في الفترة الماضيه مماكان حديث كثير من الرياضيين والغريبه نراه مريخابيا متعصب رغم حداثه مريخيته
تقبل مروري لك مودتي واحترامي

http://img372.imageshack.us/img372/7906/img0543alz3.jpg

http://img136.imageshack.us/img136/4058/img0545axg0.jpg

http://img182.imageshack.us/img182/9789/img0542akh5.jpg

[مزمل محمد وداعة الله]

احبة الملتقي ونحن نعيش هذه الايام المباركة من شهر الخير والبركة شهر رمضان المعظم نحاول نعرج على اهلنا البسطاء في ارض البساطة لعكس مظاهر الشهر الكريم عند اهلنا السودانيين وعكس العادات والتقاليد المتبعة في هذا الشهر والتي تكاد تكون ما موجودة الا عندنا نحن بس ناس السودان ،،،
رمضان شهر محبوب من الجميع لانو شهر فيهو الكتير من الخير والعمل الصالح والتكافل وكمان هو شهر عبادة يرتبط فيهو الكثيرين بحبل الله ويتركوا الكثير من المعاصي والعادات التي كانو يتبعونها سابقاً ، اذاً شهر رمضان شهر وقوف مع النفس ومحاسبتها على ما مضى .. ومعروف ان السودانيين من اكثر الشعوب الاسلامية التزاماً بتعاليم الدين الحنيف
الاستعداد للشهر الكريم في السودان بيبداء مبكراً وقبل يمكن شهرين او اكثر والاستعداد لرمضان دائماً بيبداء من النساء في البيت لانهن اول من يبداء التجهيز وذلك بما يعرف بزريعة الابري ( الحلو مر ) ودي عادة متوارثة اجيال ورا اجيال وهي بتقوم على تنقية الذرة ملفه بالخيش والاكياس وحفظه في درجة رطوبة معينة لمدة اسبوع او اكثر حتي يبداء الذرة في الانبات ومن ثم يجفف ويطحن ويصنع منه الحلو مر ، طبعاً عواسة الحلو مر او الابري في القرى عندها طقوس راسخة ومتوارثة وروتين ثابت سنوياً يلا اديكم مثال حي من احدى القري
اتلملمن النسوان في بيت خالتك الرضية بت عجب السيد ناس كلتوم بت مكة واحسان بت الحسين ونوال الجعلية وفاطمة بت الشول وزينب بت نصر الدين ومقبولة الحوصاء وانعام الرتينة وسعاد بت الجبير وكلهن اتفقن على العواسة في تكل احسان بت الحسين وتكل الرضية والعواسة بالدور عشان هن عندن بس دوكتين ( الدوكة دي زي الصاج بس مصنوعة من الفخار لعواسة الابري ) ولك واحدة تعوس لاختا جردل يعني اتشاركن العواسة لحدي اخر واحدة وفعلاً بداء اليوم الاول عجين الرضية وبعد ساعتين ونص عواسة انتهى وبداء عجين فاطمة بت الشول وهكذا لحدي اخر جردل عواسة ، انتهينا من الابري وايام العواسة الطويلة ودخلنا في تجهيز البهارات والشرموط ، اها المراءة تكلم الراجل تقول ليهو هوي اسمع بكرة ماشي السوق ما تنسى لي الشرموط والبهارات حقات رمضان ، الحاج الله يحينا لي بكرة اجيب ليك كم كيلو ؟؟ كيلوين بس البهارات كترن لي ، سمح الله يدي العافية ........
عمك جاب الشرموط والهارات وخالتك تمسك الللحم تقطعو وتبهرو وتشرو وتدق البهارات وتعبيهن في القزاز الفاضي وبعد يومين تلاتة تنزل الشرموط عشان تسحنو او تدقو بالفندك .... انتهت الاستعدادت ورمضان خلاص دخل واليوم اول يوم قبل الفجر الناس تقوم على صوت المسحراتية ( دل ددل ددل دل اصحى يا نائم وحيد الدائم السحور سنة وفائدة للصيام ) وتصحى خالتك الرضية وتصحي اولادا حسن والامام وابوهم الجاك ود غناوة وتمد لكل واحد منهم كرة نشاة دخن بلبن حاجة لذيذة ومفيدة للصيام يشربوها ويقومو على صلاة الفجر في المسجد ...
بعد الصلاة يكملوا النومة والساعة 7 يصحو ويمشوا على اشغالم الرضية تغش البيت وتعمل الشاي للشفع الصغار الما عليهم صيام ، الساعة عشرة كلهم يرجعوا الشفع يفطروا بباقي العشاء والباقين ياخدو قيلولة نص النهار لحدى موعد صلاة الظهر يتوضوا وعلى المسجد يصلوا بوعد الصلاة الدرس في المسجد ويرجعوا البيت ويقراوا لاقران لحدي صلاة العصر يصلوا العصر ويتوجهوا للتلفزيون لمتاعبعة المسلسل الديني التاريخي اليومي ودا طبعاً حاجة ثابتة في رمضان والناس كلها متابعة المسلسل ( بذكر ونحن صغار في بورتبيل في الايام ديك كان في مسلسل جميل اسمو لا اله الا الله بطولة محمود المليجي وصفاء ابو السعود واحمد ماهر ، بيحكي عن الانبياء زمن الفراعنة والله من اجمل المسلسلات الشفتها في حياتي ) ارجع بيكم للقصة ، اها بعد المسلسل انتهى الساعة خمسة في مسابقة رمضان في الاذاعة وعمك واولادو متابعين المسابقة وبيحلوها كل يوم ، خلاص الشمس مالت للغروب الاولاد يطلعوا في الترعة ليشاهدوا منظر الغروب والشمس كانها بتسقط بلونها الجميل في مكان ما خلف الافق منظر تتجلى فيه عظمة الخالق سبحانه وتعالى ، اها الافطار قرب والشباب فرشوا الفرشات عشان الناس تفطر في الشارع ودا الما بتلقاهو في الدنيا كلها الا عندنا في السودان في القري والحضر الناس في رمضان كلهم بيفطروا في الشارع عشان يحققوا مبداء التكافل وافطار الصائم وما به من اجر عظيم ، الفرشات اتفرشت والصواني بداءت تتراء على المكان من لك صوب وحدب ، قدام بيت عمل الجاك واولادو كان المكان للافطار ومن هناك جاء حاج الطيب وولدو الامين شايل الصينية ودا عمك الزين واولادو ودا الطاهر واخوه وداك الحسن واولادو ودا بشير شايل صينيتو وكلهم اجتمعوا في البرش وبداوا يتناقشوا في انتظار الاذان ،،،،،،،،،،،،،،،،،،،،،،
والله اكبر الله اكبر .,,,,,,,,, الاذان اذن اتفتحت الصواني وكلها شبه بعض في كل صينية كانها نسخة كربونية للصينية الاخرى مع بعض الاختلافات الطفيفة جداً عدد تلاة جك عصير واحد ليمون واحد ابري احمر وواحد ابري ابيض ، صحن لقمة كبير في نص الصينية ، كورة ملاح شرموط احمر ، صحن بليلة عدس او كبكبي صحن صغير ملين بلح مغموس في موية دا الفطور في كل الصواني فطور مليان بركة وربنا مبارك فيهو لانو كل واحد منهم جاي بيهو قاصد منو وجه الله والتعاون علي البر مع الاخوان والجيران والاهل وافطار العابر وابن السبيل بالله في بركة اكتر من كدا ؟؟؟؟؟؟؟
الجماعة فطروا وصلوا المغرب في جماعة وفوق ليهم هلال الشهر مبتسم وهو بنظر للالفة والتالف والحب الجميل بين الجيران والاهل ، عمك الجاك ينادي لولدو يا احمد قوم عليك الله جيب القهوة والشاي من امك جوا .. القهوة والشاي والونسة لمدة يمكن نص ساعة ، الطاهر يخت ليهو سفة تمباك بااااااااااردة ويدي عمك بشير سفة وينبطحوا يعاينو في السماء ويونسوا ، يا سلااااااااااااااااااااااااام الله يرجع ايام رمضان في السودان لاننا بالجد فقدنا الحاجات دي كلها وتفاصيلها الجميلة دي في الغربة ورمضان ما ليهو اي طعم من دون الناس ديل والابري وان كان بيجي من السودان لكن تحس بيهو هو زاتو مستوحش المكان والناس عشان كدا داسي النكهة من الخشوم ومخاصم الريحة الاليفة
الصيام في السودان حاجة غير ورمضان حاجة غير والناس غير حتى شكل هلال رمضان ومنظرو غير ..........
نواصل السرد الجميل مع البسطاء ....

[مزمل محمد وداعة الله]

العنوان اشبه ما يكون بخاتمة رسالة ، او رد على مداخلة ولكن هو في الحقيقة اكبر من ذلك بكثير لانه شعاع ضوء اطل من خلف ستائر العتمة ليضئ الدروب الحالكة ، (( مع كل الود والتقدير )) اسم برنامج اجتماعي على شاشة تلفزيون قناة الشروق الفضائية السودانية ، برنامج الهدف منه عكس معاناءة الناس والاسر المحتاجة ومد يد العون لهم بعد التعرف على حياتهم لاخذ العبر والدروس منها ، قد يكون العنوان ماثوراً ولكنه قد تحول بفضل عصبة من المبدعين في هذه القناة العملاقة بقيادة معد البرنامج الرائع الشاب عمر الحلاق وتيم العمل المتكامل تحول الى بارقة امل تلوح في ظلمات الحياة القاسية على اناس انتظروا وميض البرق سنيناً عجاف ، لكنهم لم ييأسؤ يوماً لان ظنهم ان الجفاف وان طالت سنينه فلابد ان يحين آوان المطر وتزهر الارض بعد الكفاف ، يقينهم ان الله يرزق من يشاء بغير حساب ومن حيث لا يحتسب ، هُم كثيرون ولكن رحمة الله وسعت كل شئ ، فسخر من عباده من يقومون على حاجات الفقراء والمحتاجين فكان ( مع كل الود والتقدير ))
بالامس وانا اتابع حلقات هذا البرنامج الشيق توقفت عند حلقة الامس طويلاً ورايت ان انقلها لكم لان الشخصيات التي استهدفتها حلقة الامس وجدتها تشابه تماماً شخصياتي البسيطة التي اروى لكم تفاصيل حياتها في هذا البوست امثال الطاهر ود نفيسة وقلد اليمن بت مساعد والبشير الصلباط والكثيرين الذين تطرقنا لقصة حياتهم هنا ، فالقاسم المشترك هو البساطة هنا وهناك ....
حلقة الامس انتقلت الكاميرا الى احدى قرى بلادي الجميلة النائية والفقيرة لتلتقي بنموزجين لابسط ناس سودانيين شفتهم اخيراً
امراءة كفيفة اسمها حاجة السارة ولها ولد اصم وابكم واسمه مرتضى
ولدت الحاجة السارة مبصرة ولكنها عميت بعد سنين فصبرت على ما ابتلاها به الله وحمدت عليه الله كثيراً وواصلت رحلة الكفاح تحت سترة حالكة الظلام لا ترى النور ولكن يقينها ان من خلقها لن ينساها ، انجبت السارة ابنها مرتضي وفرحت به ايما فرح فقد كانت تمني النفس ان يكون مرتضى عينها التي ترى بها ولكن كم كانت المفاجاءة قوية عليها وهي تكتشف ان ابنها اصم وابكم ، هل جزعت وبكت ؟؟ هل لعنت حظها واقبلت تبكى ظلم الدهر لها؟؟؟ لا ورب الكعبة حمدت الله وصبرت ويقينها ان الله اراد لها كل هذا ليمتحنها وهي تشكره لانها مؤمنة بان الله اذا احب عبداً ابتلاه ،، حاجة السارة نموزج للمراءة المؤمنة بالله حق ايمانه ، الحالة المادية للاسرة صفر كما روت حكايتها ومعاناءتها مع العيش المر ، كابدت وكافحت مع زوجها قبل ان يتوفاه الله وربت ابنها مرتضي حتى كبر الصبي واصبح هو من يعول امه بعد وفاة والده كان مرتضى يشتغل بالزراعة اجير في حواشات الغير رزق اليوم باليوم ويوم يلقى ويمين ما يلقى والحال ماشية ، وكمان بشتغل في البنيان يعمل الطين ، بيت مرتضى وامه عبارة عن اوطين من الطين الاخضر والحوش كمان من الطين الوضتين متهالكتين من اثار الامطار

[مزمل محمد وداعة الله]

السوداني اذا افتخر بشئ او تحقق ما وعد به او صدق ما توقعه او تغلب على احد يقول (انا ابوفلان او انا اخو فلان او انا اخو البنات وانا اخو السمحة او انا اخو الساترة حالا مع جيرانه) وغيرها ، والاعتزاء عند السودانيين كثير ، وهو عند كبار السن واصحاب الاصالة من اهل الاقاليم والبوادي اكثر ونعرفه اكثر عند اهلنا في الكواهلة (ناس اخو بنات دوبا- وانا اخو الفقرا) حتى انه لكثرة دورانه في حديثهم ربما وهموا فقد قال احدهم (انا اخو الشيخ حسن ود حسونه) وهذا في ادب الفقراء مخالفة للوائح ،،والاعتزاء معدود في اساليب الرجال ولكن النساء ايضا قد يعتزين فكثيرا ما نسمعهن يقلن : (انا اختك يا فلان او انا امك يا فلان أو انا بتك يا فلان ) وعلى كل حال فقد ذهب من يحسن هذا ، واصبحت مثل هذه العبارات لا تطوع بها السنة عامة جيل اليوم ولا ترتقي اليها هممهم الا من رحم ربك ؛ واصبحت الشجاعة تهورا ، والناس ابناء زمانهم ، وقد كان اسلافنا اذا قال احدهم هذه العبارة خاض النار وركب كل صعب لا يبالي ،، خصوصا اذا كانت امام النساء ؛ وتلك عادة اخرى ما تزال منها بقية فالرجل الحق (اخو البنات العندو عرض) لا يرضى الانهزام او التخاذل امام النساء ، فالرجل يجب ان يظهر امام المرأة بالصورة المشرفة او من باب التجمل ولا اعني (الكبكبه والرجفة) . وقد كانت المرأة بمثابة المخدر الموضعي او البنج لبعض عملياتهم الجراحي ، يستحي المريض امامها فيتحمل من الالام ما لو كان بالفيل يرعد .. فقد كانوا في الماضي البعيد يجرون العمليات الجراحية بحضور النساء (فلا يوح الرجل ولا يزح) ولا ينبت ببنت شفة حياء

واليكم بعض الطرائف في هذا الجانب من حياة البسطاء :
قطعت رجل الجعلي و زغردت النساء ، وعلى الفور مد رجله الاخرى للجراح قائـلا :- حرم تقطع التانية) ،،،

وعادة البطان (وهو عادة الضرب على السياط على الظهر اظهار للشجاعة ويكون في الاحتفال بالزواج وغيره) تلك العادة القاسية التي يتعرى فيها الرجل في المحفل على ايقاع الدلوكة والشتم (الات موسيقية تقليدية ما تزال باقية) والغناية فتلهب السياط جسده وتفري جلده حتى تُعالج اثارها بالزيت الساخن (الشيوية) وهو ثابت لا لا يتزحزح ،، تصم أُذنيه اصوات الزغاريد وهو يُردد(انا اخو البنات ،، ويحردن الكاهليات) وماليها ؛؛؛ وقد املت عليهم التقاليد والعادات الجارية ان يكون ذلك احد معايير الشجاعة ؛؛ ولكنهم مع ذلك كانوا يعدمون الجبان ؛؛

طرفة من حلقة البطان

فر احدهم من حلقة البطان فلما بهم الُبُطان (الشرامة) واعادوه الي الحلقة مر بالنساء وهو يرجف كالقصبه ويقول (ساعدننا بالزغاريد)

[سلوى حسن جمبو]

سبحان الله الذى إذا أحب عبداً من عباده ابتلاه ونكرر سبحان الله عنما يكون العبد راضياً وقانعاً بما قسم له ولكن لاننسى بان رحمه الله واسعة ويعوض عبده شئ بشئ وعسى ان تكون هذه المواقف عبرات وعظات للمسلمين واى انسان يحمد الله على نعمه مهما تكون ان كثرت وان قلت فكل نصيب مقسوم ومقدر وكل ابتلاء هو امتحان للعبد ان صبر عليه ذلك هو الفوز العظيم
ولك كل الشكر أخى مزمل على مواضيعك الثرة وتحياتى *

[مزمل محمد وداعة الله]

شكراً العزيزة سلوى حسن على المرور والتوقيع اللطيف على هذا البوست
دمتي سالمة اختنا سلوى ولك كل التقدير

[ودالصول]

يموتو عشان حقوق الجار
ده كان زمااااااان:icon1366::blow:

[مزمل محمد وداعة الله]

الغالي ود الصول
لك التحية على المرور الكريم
وابشرك اخي ود الصول بان من يموتون من اجل حقوق الجار موجودين وان كثر من لا يحفظون للجار حقاً
شعبنا السوداني الجميل ود الصول ما زال يحمل الخصال النبيلة في داخله ولكن نحتاج حقاً للرجوع الى الجزور ونبذ العادات الدخلية وتقويم السلوك الانساني من جديد ليعود الشعب السوداني البسيط كما عهدناه ابداً شعبنا الذي احببناه منذ امد بعيد
ناس الحارة البيقيفوا في الدارة وسط الدارة وادنبروا ويقولوا للدنيا ديل اهلي
عرب ممزوجة بدم الزنوج الحارة ديل اهلي ديل قبيلتي وقتين ادور افصل للبدور فصلي
اصحاب روحي والوجدان وسافر في بحار شوقم زمان عقلي
اقول بعضي الاقيهم تسربوا في مسارب الروح بقوا كلي
وكان ما جيتا من زي ديلا وا اسفايا وا ماساتي وا ذلي

لك الشكر اخونا ود المامور فقط تفال بان الشعب السوداني الاصيل موجود
لك كل الود
ودمت سالماً

[مزمل محمد وداعة الله]

الى جميع المتداخلين عبر هذه المساحة عن بساطة اهلنا الطيبين وسماحتهم واشياهم الجميلة
نحاول اليوم ان نختبر ذاكرة الاعضاء بان نطرح عليهم اسئلة عن اشياء قديمة من التراث السوداني الجميل بعضها موجود وبعضها اندثر مع العولمة والعصر الحديث المتسارع نحو التغيير ولكن كثيرون من ابناء شعبنا البسطاء ما زالوا يحتفظون بموروثاتهم الجميلة ، اتمنى ان يتداخل الجميع لاختبار الذاكرة عن التراث السوداني الجميل والاشياء التي سنسال عنها تاتي تباعاً ..
اليوم سؤالنا عن الاشياء الاتية ، ما هي ؟؟؟؟
( 1 ) ما هي "" السحارة "" ؟؟

( 2 ) ما هي "" الفِركة "" ؟؟ ( بكسر الفاء )

( 3 ) ما هو "" المشلعيب "" ؟؟

( 4 ) ما هو "" التيبار "" ؟؟

( 5 ) ما هي "" اللداية "" ؟؟

سوف نجيب عن هذه الاشياء بعد مدة وبعد ان نرى ردود الاخوة الاعضاء ومعرفتهم لهذه الاشياء !!
نرجو المشاركة للفائدة ..


((( واقعدو عااااافية )))

[سلوى حسن جمبو]

السحارة :عبارة عن صندوق لتخزين حاجات المنزل .
المشلعيب : مصنوع من السعف ويستعمل لتهوية الطعام وحفظه يعلق على سقف الراكوبة
التيبار: الزير اناء فخاري ويستعمل لتبريد الماء للشرب .
الفركة :عبارة عن قطعة قماش يغلب عليها اللون الاحمر تستعمل للعروس
اللداية :ثلاثة حجارة ترص حتى تشكل قاعدة ويشعل الحطب ويوضع عليها قدر الطعام { يعنى تستعمل بدلاً عن الكانون او المنقد }

[مزمل عبد الصادق فرج الله]

[QUOTE=مزمل محمد وداعة الله;72109][center]الى جميع المتداخلين عبر هذه المساحة عن بساطة اهلنا الطيبين وسماحتهم واشياهم الجميلة
نحاول اليوم ان نختبر ذاكرة الاعضاء بان نطرح عليهم اسئلة عن اشياء قديمة من التراث السوداني الجميل بعضها موجود وبعضها اندثر مع العولمة والعصر الحديث المتسارع نحو التغيير ولكن كثيرون من ابناء شعبنا البسطاء ما زالوا يحتفظون بموروثاتهم الجميلة ، اتمنى ان يتداخل الجميع لاختبار الذاكرة عن التراث السوداني الجميل والاشياء التي سنسال عنها تاتي تباعاً ..
اليوم سؤالنا عن الاشياء الاتية ، ما هي ؟؟؟؟
( 1 ) ما هي "" السحارة "" ؟؟

( 2 ) ما هي "" الفِركة "" ؟؟ ( بكسر الفاء )

( 3 ) ما هو "" المشلعيب "" ؟؟

( 4 ) ما هو "" التيبار "" ؟؟

( 5 ) ما هي "" اللداية "" ؟؟

سوف نجيب عن هذه الاشياء بعد مدة وبعد ان نرى ردود الاخوة الاعضاء ومعرفتهم لهذه الاشياء !!
نرجو المشاركة للفائدة ..


((( واقعدو عافيةا.
[SIZE="5"][COLOR="Red"]السحارة : صندوق خشبى فى شكل دولاب ولكن وضعه يكون افقياً
الفركه : قطعة من القماش المذهب ذات استعمالات لها علاقة بالزواج تبدأ برقيص العروس وتستمر الى ما بعد العسل
المشلعيب : مصنوع من السعف يستعمل فى حفظ الطعام ويعرف فى غرب السودان بدواء الكلب حيث لا يستطيع الكلب الوصول اليه رغم رؤيته
التيبار: اناء من الفخار يستعمل فى الطهى
اما اللداية : هى ثلاثة صخور كبيرة يوضع عليها الاناء المراد الطهى فيه

[مزمل محمد وداعة الله]

العزيزة سلوى حسن جمبو
انتي استاذة بمعنى هذه الكلمة ، استاذة في كل ضروب الثقافة وفوق كل ذلك فانتي امراءة سودانية اصيلة
تحملين كل تفاصيل المراءة السودانية وتحفظين لوطنك كل ما هو جميل ، تضربين المثال الحي لحواء السودان في بلاد المهجر حواء التي تحاول عكس الصورة المشرقة للمراءة السودانية بتراثها وارثها وحضارتها الضاربة في الجزور ، لك ولكل حواء بلادي مليون تحية تقدير واحترام ،،،


تخريمة : (( لكن لقيتك يا سلوى حبوبة قديمة هههههه ))

تقبلي فائق شكري وتقديري
ودمتي سالمة سلوى

[مزمل محمد وداعة الله]

الاستاذ الرائع مزمل فرج الله
لك كل التحايا والتقدير وانت توقع بصمتك على هذا البوست وتثري النقاش باضافاتك الجميلة على الموضوع
لعلي قد استشفيت من مداخلتك ملامح انسان فنان مهموم بقضايا التراث وارجو ان لا يخيب ظني فقد لمحت في سطورك خبايا انسان مُلم بكل الجوانب التراثية لهذا الشعب
لك كل الود والتقدير وارجو صادقاً ان يستمر تداخلك الجميل لنستفيد منك الكثير ايها الرائع
ودمت سالماً

[سلوى حسن جمبو]

أخى مزمل لك الشكر على هذا المدح الطيب وأن نحن كذلك فماذا تكونون انتم

والما عنده كبير يفتش ليه على كبير ونحن تربية حبوبات سااااااااااى

تخريمة : يا أخوى الحال من بعضه كان انا جاوبت وطلعتة حبوبة الطرح الاسئلة نقول عليه شنو؟
هههههههههههههه

[مزمل محمد وداعة الله]

ههههههههههههههههههههههههههههه
والله يا سلوى ضحكتيني شديد ومعاك حق اخوك جد عديل كدا وبالتراث السوداني دا انا بحبو جداً لانو بيعكس حضارتنا وثقافتنا البنباهي بيها العالم ، وزي ما قلتا في اول البوست دا انو نحن شعب بسيط وشعب عندنا خصال وموروثات اندثرت عند كل الشعوب في الدنيا واصبحت مجسدة فقط في هذا الشعب الذي نحبه بكل موروثاته
والتحية عبرك لحبوباتنا كلهن ولجدودنا الرائعيين الذين غرسوا فينا حب هذه الاشياء والتعلق بها والتحية لكل محب لتراث ارضنا الطيبة وكل مهموم بالحفاظ على الارث السوداني والتراث السوداني الجميل حتى لا يضيع كما ضاعات الكثير من ملامح الهوية السودانية بداعي العولمة ومسايرة التطور
لك الف تحية تقدير واحترام المشاركة الدائمة والنحلة الرشيقة بالمنتدى سلوى حسن جمبو
ودمتي سالمة ،،،

[مزمل محمد وداعة الله]

دخلتا الحلة خلسة بعد العصر وتجولتا في الشوارع والازقة ، استنشقتا ريحة الطين من الجدران القديمة وريحة الشجر شميتا دي ريحة نيم ودي ريحة جوافة ودي ريحة جهنمية ، سمعتا همسات الناس في الحيشان نسوان بتونسن بتول بت جار النبي تتونس مع جارتا الرضية بت الامام علي ، وبي غادي الرتينة بت سيد احمد تكورك لشافع ترسلوا الدكان يجيب ليها ملح ، وهناك عمك عثمان الدنقلاوي بيحكي لعمك رجب ود الفكي عن الاسعار الغلت وعن السوق البقى نار ، وقريب مني شفع بيلعبوا حسن وخالد ومحمد والامين بيعلبوا كورة شراب ، وقريب منهم تلاتة غنمايات بينبشن في الكوشة يمكن يلقن ليهن باقي كسرة او ملاح يسدن بيهو رمقن ، ومن بعيد صوت حمار الطاهر ود النفار عالي ، وصوت العصافير راجعا للاعشاش قبل المغيب ... لوحة جميلة بتعشعش في الخيال اترسمت في جواي اكثر من مرة بسيطة وحلوة وبتحكي روعة القرية وناس القرية السمحين الطيبين والبسطاء ..
سؤال عن بسطاء غابوا عن هذه المساحات الندية لروعة الشعب السوداني البسيط وين يا اهلنا واحبابنا
وينك يا عادل سيد ، وينك يا الطيب ادريس ، وين تهاني رمز البساطة ، وينك يا ابنوسي يا ابو بكر عز الدين ، وين كل الرائعيين من هذه المساحة الندية
صوت القرية يناديكم ....

يا رمال حلتنا زولاً .......

http://www.youtube.com/watch?v=AGN4CJiJzCQ

[مزمل محمد وداعة الله]

صحيت اليوم الصباح على ذكريات امس الجمعة ، كان يوم جميل بالجد لانو كان فيهو لمة ناس سودانيين رائعيين ذكرونا بالبلد ولمة الاهل ، امس كنا في رحلة اقمناها لصديقنا وزميلنا العريس ناصر سليمان خليل من ابناء حلفا ومشينا في لمة حلوة فيها كل الاهل والاصدقاء مشينا لمحمية الدوسري الطبيعية في منطقة الشحانية شمال الدوحة ، عبارة عن حديقة حيوانات بصورة تقليدية اشبه بمنتجع مفتوح ، تسامرنا ولعبنا الضمنة والكتشينة وتناولنا وجبة الغداء وشربنا الشاي والقهوة وجلسنا قرابة الخمسة ساعات في صفاء والفة ولمة حلوة

نمتا واسترجعتا شريط اليوم الجميل دا كلو واتذكرتا رحلات مشابهه في السودان عملناها لما كنا طلاب في الجامعة وجالت بخاطري صور لناس عزاز علي شديد فقدتهم في زحمة الحياة والغربة منهم المتواصل معاي ومنهم الما عارف ليهو بلد وبتمني اعرفو ..
صحيت اليوم متقريف لفنجان جبنة كااااااارب من ست شاي في سوق سنار مع اخونا توفيق الضبعاوي ( ابو التوت ) لانو زول بيحب اللمة وونسة الاصحاب وقهوتو دي اول ما تخش الدكان بيكورك لمني ست الشاي ( يا مني قهوة لعربي بورتبيل دا وكتري ليهو الجنزبيل ) والله مني دي استاذة في فن القهوة تجيب ليك القهوة والفناجين والصينية بتاعت الالمونيوم تلمع والمعلقة جوة كباية شاي صغيرة معطونة في موية ورد والبخور الما خمج والله انا كنتا بشرب القهوة الصباح مع توفيق والشابا في الدكان وامشي اشتري الجريدة من مكتبة ريبة واقعد اقلبا ليك كلها وبعد داك اخش على السوق
والله يا توفيق الواحد مشتهي القهوة ديك ومشتهي يقعد معاكم في برندة الدكان ويستمتع بالنظر لوجوه الاهل في السوق واصوات العربات واصوات الناس ..
لعن الله الغربة والاغتراب ورد الطيور المهاجرة الى اوكارها للتمتع بكل جماليات هذا البلد الجميل ..
يا اخوانا فنجان جبنة جبنة جبنة جبنة ةةةةةةةةةةةةةةةة
الواحد قرب يجن ههههههه
لك الود اخونا توفيق ود الريس ابو التوت ولكل الرائعيين امثالك في قلب سوق سنار العتيق ولمني ست الشاي الف تحية تقدير وشكر على فنجان القهوة الكااااارب والبخور الما خمج

تخريمة : معليش خطرفة زول متقريف سااااااااااااااي وقاتلوا الشوق للبلد ولسنار وللناس والاهل

http://www2.0zz0.com/2009/11/14/07/250762710.jpg (http://www.0zz0.com)

http://www2.0zz0.com/2009/11/14/07/183576878.jpg (http://www.0zz0.com)

[سلوى حسن جمبو]

لك التحايا أخى مزمل وانت تذكرنا باللمة وقعدة القهوة مع الاهل وطبعاً القهوة دى حقتنا نحن ناس كسلا وما احلاها فى ضل الضحى ولاتحت ضل الشجرة ومابكمتل الكيف الا بالبخور معاهاوخاصة لما تكون فى جبنة ذى الفى الصورة دى دة المزاج ذااااااااااتو والعجب كان جمبها تمر وفول مدمس لزوم الونسة لانه ونسة القهوة دائماً عندها طعم خاص ودمت
سالم

[مزمل محمد وداعة الله]

لك التحايا أخى مزمل وانت تذكرنا باللمة وقعدة القهوة مع الاهل وطبعاً القهوة دى حقتنا نحن ناس كسلا وما احلاها فى ضل الضحى ولاتحت ضل الشجرة ومابكمتل الكيف الا بالبخور معاهاوخاصة لما تكون فى جبنة ذى الفى الصورة دى دة المزاج ذااااااااااتو والعجب كان جمبها تمر وفول مدمس لزوم الونسة لانه ونسة القهوة دائماً عندها طعم خاص ودمت
سالم
يعني يا سلوى كان ما قلتا ليك متقريف هسي في داعي للكلام دا يعني انا ناقص سويتي ليها كمان تمر وفول مدمس والله الزول هسي يقوم ينهي الاقامة ويقطع تذكرة ويشتت البلد ويكمل اللمة والقهوة بي هناك ....
تبقى سلوى حسن واحدة من اروع زهرات المنتدى المشاركات بفنهن وابداعهن وتبقي كسلا الحبيبة رمزاً للكرم الشرقاوي الاصيل المعبق برائحة البن والبخور واحدة من اجمل واحب مدن السودان لقلوبنا بكرم اهلها وطيبة انسانها وجمالها الآخاذ
لك التحايا سلوى حسن والتحاي عبرك لجميع اهلنا في الشرق الحبيب هولاء النفر الطيبون البسيطون بساطة الشعب السوداني النبيل

[مزمل محمد وداعة الله]

يا حليل زمان وايام زمان

والله اليوم الصباح جاني ايميل من صديق عزيز تحت هذا العنوان وفيه دعوة جميلة للعودة لبساطتنا السودانية الجميلة وفيهو مقارنات بين ماضينا النبيل وحاضرنا الرمادي ، والله وانا بقراء الايميل دا انتابتني احاسيس ومشاعر مختلفة مرة ابكي ومرة اضحك زي ما قال ابراهيم عوض ( مرة اضحك ومرة ابكي ، ومرة اتحمل اسايا) لانو بالجد كلام في المليان كلام من دهب انا قلتا انقلوا ليكم بحزافيرو عشان تتمتعوا معاي اها ياالحبان ايقوا لي جوا وشوفوا الزول دا قال شنو ..........

أسماؤنا السودانية القديمة الأصيلة، كان من الصعب بل المستحيل بأن تأتي لها باسم دلع، فمهما بلغت براعتك فلا يمكنك أن تدلّع أسماء مثل: بلة، الطريفي، أب جيبين، التجاني الخزين، عجبين، الزبير، أب كساوي، الصديق، فضل المولى، فتح الرحمن، عبد الجبار، البشير،عكاشة، الجنيد، تيراب، الريّح، الماحي، حمد النيل، حسب الله،حسب الرسول , جبارة الله، أب سقرة، البي كيفو، تميم الدار، جبر الدار، عمسيب الجاك، الجزولي باشكار ,وغيرها..
عليْ النعمة تحاول تدلع أي واحد من الأسماء الفوق ديل إلا ضهرك كع ينكسر، لأنها أسماء قوية زي الخرسانة... أسماء مضببة ضد التدليع زي العكاكيز.. أسماء أهلنا زمان أسماء رجال وما في أي طريقة لتمييعها أو تدلعيها،
حتى النسوان عندنا كان أسماهن صلبة ومحتشمة، وتنافس أسماء الرجال! في قوتها وخشونتها، فنلقى أسماء مثل ست النفر، الساتر الله، أم حقين، البتول، سكينة، التاية، نفيسة، النخيل، أم زين، بت الجقمتها وغيرها، والواحدة حتى لو أهلها كانوا متحررين، بالكتير يسموها الصندلية، ومع ذلك ما تقدر تشوفها أو تشم ريحتها، النسوان كانن بنات خدور...
والراجل ذاتو بيكون معجب باسم أمو المحتشم وتلقاهو يحلف بيهو في الصغيرة والكبيرة فنسمع: أنا ولدك آآآ ام زين .. أنا ولدك آآآ البخيتة.. هسه أولاد الزمن ده يقولوا شنو ويحلفوا باسم منو.. معقول الواحد يقدر يقول: أنا ولدك يا عبق أو أنا ولدك يا رنا؟
أهلنا الكبار الزمان كانوا ما بعرفوا الني وكل شيء عندهم نجيض. الني بدوهوا النار..
عليْ الطلاق تنطق الاسم كده لما شعرة جلدك تكلّب، وتتنفخ وجضومك تتورّم من العجب والخيلاء بهذه الأسماء
أب كريق في اللجج
سدّر حبس الفجج
عاشميق حبل الوجج
أنا أخويا مقلام الحجج
أبشر آ جنا .. حررّم تبشر.. أبشر آ جنا التقدْ مركوبك..
مش زي أسماء الأيام دي، شدة الأسماء ما بقت مايعة تقررررّب تخت الاسم في التلاجة عشان يجمد ويبقى اسم رجال.
شوفوا الأسماء دي: وائل، وضاح، وحيد، وليد، وديع، ربيع، مازن، تامر، لؤي، راني، هاني، نادر، حمادة، طلال، أيمن، مهند، وفائى, رامى , إيهاب وغيرها..
والأسماء دي رغم مياعتها لكن الناس برضو دلعوها، فحصل ليها ما يعرف في اللغة بتمييع المايع وهو محرّم لغوياً فسمعنا ب: هنو، ولي، مزوني، تموري، عموري، ندوري، أيموني، هنودي، هوبة وغيرها من الأسماء المايعة الما شادة حيلها...
وكذلك غناهم كان غناء رجال وأصواتهم كانت أصوات رجال،
كان المغني يغني الليل كلو بدون مايك وصوتو تلقاهو زي الجبخانة
يا ليل أبقالي شاهد على نار شوقي وجنوني

وناس زمان ديل حتى كعكهم كان كعك رجال.. تدخل الكعكة في خشمك كده لما يغلبك تلوكها وتقعد تقرقش فيها كُرُم كُرُم زي الخروف القاعد يصقع في الجرة. والآن جابوا لينا الكعك المايع بشتى أنواعو تدخل القطعة في خشمك تجي تلوكها تلقاها عملت (سواح) وما تعرف ! نفسك هل أكلتها ولا ما كانت في قسمتك..
نفس الشيء ده بينطبق على الولادة، زمان الواحدة تلد من خمسة لعشرة وكل سنة تساهم مع زوجها في مصاريف البيت بإنجاب طفل جديد، ومرات لو الظروف ساعدتها ممكن في نفس السنة تلد طفل وتشرع في وضع حجر الأساس لطفل جديد، ومرات الراجل ذاتو من كترة الولادة، ما بعرف أسماء أولادو ومنو الأكبر ومنو الأصغر فيهم.. الراجل يسأل مرتو: إنتِ آآآ الزينة دحين كبير ضيف الله ولا كرم الله ؟ فتجيبه الزينة باستغراب: أجي يا راجل: شن جاب ضيف الله لكرم الله! أنا لما ولدت كرم الله ده، ضيف الله كان يا دوووب بيحبا، لكنهم الاتنين مولودين! في نفس السنة المات فيها خالي عبد الرحمن...
بنات الزمن ده الواحدة إلى أن يتخرج ولدها من kg2، حتى يقولوا ليك فلانة قاعدة تتوحّم.. وهو شن الوحم؟ الواحدة وحمها ذاتو مخالف وضد العادات والتقاليد.. تلقاها متوحمة ليها على تفاح لبناني أو زبيب إيراني أو عنب إيطالي أو مهند تركي، فيطلع ليها الولد منعّم ومرخ رخ ،والواحدة أصلها ما بتراعي ظروف زوجها.. زمان حتى وحم حبوباتنا وأمهاتنا كان وحم رجال ووحم بسيط وسهل التنفيذ ، الواحدة تتوحم على أم بقبق فيقوم يطلع الولد لايوق وعبيط أو تتوحم على ويكاب مرس فيطلع الولد بتاع مرايس وشطوط! وكمونية .. نحن ناس بتعيش حياتها بالكمونيّة والنيّة السليمة)..

أهلنا الزمان كانوا متباشرين وحنينين، بكاهم شهر وعرسهم شهرين، والواحدة لما يموت راجلها من شدة الحزن والأسف والإخلاص، بدل أربعة شهور وعشرة يوم، تتحبس عليهو ثمانية شهور وعشرين يوم، لأنو أصلنا ما كنا بنعرف الشوية..

عليْ الجزيمة في الزمن المايع ده حتى شطتنا بقت مايعة وما بتحرق.. ونحن والله شعب لو ما حس بالشطة في جوفو تسوي تح تح، الأكل ما ينفعو. أنا ود التور البتنتّح ومن الشطة ما بقول أحححححح الزمن ده بقى زمن الكيتشاب والمايونيز، أما الشطة الخضراء وشطة القبانيت فزمنهم فات وغنايهم مات..

الناس هجرت المطاعم وبقوا مستعجلين وما عندهم وقت للقعاد عشان كده اتجهوا للكافتيريات، الأكل كلو بقى عبارة عن بوفتيك وطعمية وبرجر وما شابه، والناس بقوا زي المجانين تلقاهم ياكلوا ماشين ويتكلموا ماشين وكان قلت لزول سلام عليك لا بسمعك ولا برد عليك.. مشيت السودان قبل سنة ما لقيت زول يتونس معاي وفي النهاية جيت راجع وشنطتي مليانة ونسة وشوق للناس الزمان...

وكلابنا برضها بقت مايعة وكسلانة ومسكينة وما بتهوهو في زول، الكلب تجي ماشي فوق ليهو ما يقول ليك هوْ، ولو بقى نشيط خلاص، يقوم ينبح فيك بتهوهوة واحدة تاني ما يزيدها، كأنو عامل ليك مس كول.. مرة ناقشت مسألة عدم مبالاة كلاب اليوم مع واحد كلب، فقال لي: زمان كان بيطغى الحماس والانفعال على أدائنا ككلاب، وكنا بننبح في الفاضية والمليانة، لكننا لما شفنا الحكومة ما بتدفع لينا مواهي وحاولت تستملحنا، قلنا ما لنا ومال المشاكل والعباطة الفي الفارغ.. ونحن الآن في ظل نظام عالمي جديد ولن ننبح ببلاش لأنو في حاجة اسمها الملكية الفكرية وأصواتنا دي لازم تقيّم التقييم المناسب واللي عاوز ليهو (هوت دوق) يشوفوا بعيد مننا، نحن خلاص ودعنا عهد العباطة والتهور.
فقلت في نفسي: يا حليل زمان وأيام زمان.. لما الكلاب كانت بتسك الشفّع وتشرط هدومهم.. الآن نبيحها ذاتو بقى مشروط.. زمان تجي ماشي تلقى الكلب من تظرك في الطريق مليان جسارة وعنفوان ولسانو حالو يقول يا دنيا ما فيك إلا أنا، أما الآن فالكلاب بقى مغضوب عليها وضالة ومهمشة وبتعيش على حافة النسيان ولو نظمت نفسها كويس ممكن تدخل الغابة أو تقيم في فنادق وتعلن التمرد وتعمل ليها حركة تمرد وممكن تسميها حركة تحرير الكلاب وتختصرها في كلمة (حتك)..

يا جماعة الكلام ده عيب في حقنا وما بصح في حق شعب عاش (علماً) بين الأمم .. ويا جماعة كفانا تمييع أسماء وتمييع كعك وتمييع وحم وتمييع فحولة وتمييع قضايا وتمييع مياعة وخلونا نرجع لقديمنا ونخلي في البنسوي فيهو ده، الكلام ده بالحيل ما سمح في حقنا ..

حليل زمن الصبا الماضى حليل زهر الحياة الزاهر
حليل زمن الحبيب راضى وحليل زمن الهوى الطاهر
حليلو الأبلج الباسم حليلو الكاحل الناير
حليل قمر السما القاسم لياليه وصبح داير
آه لو آه تفيد مجروح والمثل القديم ساير
رهاب ماحصلو الجاري وسماك ما حصلو الطاير
تجدنى مراقب أخبارك اذا النسمات بها تخابر
تجدني على الفراش مضنى وتجدنى على الأسى صابر
أنا البعدك أصون عهدك وليتك كنت بى خابر وليتك مرة تذكرنى ولو في ذكرة الغابر

[سلوى حسن جمبو]

سبحان الله ياأخى مزمل لقدقرات نفس الايميل اليوم وما اكثر المتغيرات التى تستجد مع كل زمان نسآل الله العافية والستر

[نور الصباح]

الكاتب الرائع مزمـــــــل
دائما اسمع عبارات تتزمر من الحاضر وتتمني رجوع الزمن الجميل كما يقولون له ولكني اجدني استغرب لهذه العبارات فما له الحاضر الست معي يا مزمل انك عندما يدللك صديقك باسمك الا يدل علي محبته لك .
الا تري معي جلستك علي القهوه وونستك لها ما يعادلها اليوم انت في مكان عملك فمجرد ضغطة زر صار بامكانك التواصل مع اصدقائك والاطمئنان علي اهلك .
كمان زمان الناس بتعاني في المعيشه يعني لو عايز تقرأ او تتعالج تعاني اشد المعاناه اما الان اصبح كل شئ سهل وفي متناول اليد والحمدلله كل يوم نري اشياء جديده نحمد الله عليها .
ولكن الا تتفق معي انه مهما كان الحاضر يأخذ لونا رماديا ويحمل الكثير من المتاعب فعلينا ان نتفاءل بانه يحمل القادم الجميل .

[مزمل محمد وداعة الله]

الكاتب الرائع مزمـــــــل
دائما اسمع عبارات تتزمر من الحاضر وتتمني رجوع الزمن الجميل كما يقولون له ولكني اجدني استغرب لهذه العبارات فما له الحاضر الست معي يا مزمل انك عندما يدللك صديقك باسمك الا يدل علي محبته لك .
الا تري معي جلستك علي القهوه وونستك لها ما يعادلها اليوم انت في مكان عملك فمجرد ضغطة زر صار بامكانك التواصل مع اصدقائك والاطمئنان علي اهلك .
كمان زمان الناس بتعاني في المعيشه يعني لو عايز تقرأ او تتعالج تعاني اشد المعاناه اما الان اصبح كل شئ سهل وفي متناول اليد والحمدلله كل يوم نري اشياء جديده نحمد الله عليها .
ولكن الا تتفق معي انه مهما كان الحاضر يأخذ لونا رماديا ويحمل الكثير من المتاعب فعلينا ان نتفاءل بانه يحمل القادم الجميل .

الرائعة نور الصباح
اشرقت انوارك البهية فزادت المساحة القاً وضياء
اشكرك على المداخلة الرقيقة واللطيفة واتفق معك على ان الحاضر جميل ولكننا ندعو خلال هذه البساطة لان لا ينسى الناس ماضيهم الجميل ويتزكروا انهم سودانيين من اصلاب اجداد حفظ لهم التاريخ كل ما هو رائع
ساعود لك بالتفصيل اختي نور الصباح لاحقاً
اشكرك ودمتي سالمة

[عمار ادم سليمان]

اخي العزيز مزمل والله مشتاقين كميات فعلا الشعب السوداني بسيط وبسيط جدا بالرغم من التغيرات الكثيرة التي حدثت في الاونة الاخيرة التي خصمت وتغولت علي الكثير من حجم الموروثات والعادات والتقاليد التي عايشناها من خلال سردك الرائع لهذه الذكريات التي جعلتنا نتنسم عبق الاحداث الماضية والذكريات من خلال واقع الحياة في ذلك الزمن الجميل لك التحية مجددا اخي مزمل فما ولي لن يعود ولكن نظل نعيش علي ذكراه

[مزمل محمد وداعة الله]

اخي العزيز مزمل والله مشتاقين كميات فعلا الشعب السوداني بسيط وبسيط جدا بالرغم من التغيرات الكثيرة التي حدثت في الاونة الاخيرة التي خصمت وتغولت علي الكثير من حجم الموروثات والعادات والتقاليد التي عايشناها من خلال سردك الرائع لهذه الذكريات التي جعلتنا نتنسم عبق الاحداث الماضية والذكريات من خلال واقع الحياة في ذلك الزمن الجميل لك التحية مجددا اخي مزمل فما ولي لن يعود ولكن نظل نعيش علي ذكراه

مشكور يا ابو عمار على المرور الجميل
اتفق ماك انو الماضي لن يعود لكن الموروثات تبقي في دواخلنا لا يغيرها الحاضر ولا المستقبل ولن يتنازل هذا الشعب الجميل عن بساطته وجماله
لك كل الود عمار واشكر مرورك وتوقيع الراقي

[مزمل محمد وداعة الله]

الواحد مشتاق لي لمة ونسة في ضل نيمة في الحلة وكباية شاي حااااااااااااارة
لمة بتاعت اصحاب ونقعد نتكلم عن الذكريات بتاعتنا في الطفولة وين كنا بنلعب ومع منو والناس اتغيرت ولا اتغير الزمن ..
اقيفوا شوية ما تسرحوا بعيد
دا حلم انا حلمتا بيهو قبال يومين وحاولتا اجمعو بس ما قدرتا اجمعو كلو لكن كونت منو قصة جميلة بحكيها ليكم بكرة ان شاء الله
اقعدو بالعافية لي بكرة
ودعتكم الله

[محمد خضر عبد الرحيم]

مزمل سلامات - وكيف اخبارك واحوالك - وشكرا على البوست الجميل ده - وبالمناسبة ظهرت فيهو قدرات سردية من طراز فريد وده ممكن يكون مشروع ابداعى كبير -
- راجين زكريات سنار الثانوية
كل التحايا وخالص الود

[مزمل محمد وداعة الله]

مزمل سلامات - وكيف اخبارك واحوالك - وشكرا على البوست الجميل ده - وبالمناسبة ظهرت فيهو قدرات سردية من طراز فريد وده ممكن يكون مشروع ابداعى كبير -
- راجين زكريات سنار الثانوية
كل التحايا وخالص الود

الليلة البلد جابت ليها تمساح كبير
وينك يا زميل الدراسة وجاري في الفصل وصديقي الحبيب الدكتور محمد خضر عبد الرحيم
والله الواحد بتزيد سعادتو لما يلاقي واحد من ايام سنار الثانوية يرجع ليهو قليل من الذكريات الحلوة في المدرسة الرائعة
سعادتي لا توصف محمد خضر بانضمامك لهذا البوست لننبش سوياً في ذكريات الايام الحلوة في مهدي وغزالي ونجتر الذكريات عن الاخوان والزملاء والاساتذة الكبار
استني علي شوية بجمع ليك جزء منها وبفرح بيها وارجعك للوراء شوية
تحياتي لابن كبوش الرائع الدكتور محمد خضر عبد الرحيم
والى الملتقى دمت سالماً

[محمد خضر عبد الرحيم]

يديك العافية وخالص الود
فصل مهدى (المنفى)- ابوسفيان والمواقف الضاحكة - الشاعر فتح الرحمن ود النيل الابيض - امير لاعب الكرة الممتاز - هانى ومزمل المتميزين اكاديميا- متوكل عاشق الكديت - تنقس وعمر جنكيس والمعز ادريس وبقية العقد الفريد- عمك ادم الصول وجولاته المفاجئة عبر الشباك لضبط المشاغبين - البرامج الثقافية داخل الفصل فى زمن الحصص الفاضية - ولعب كرة القدم بى كور العشر
كانت لنا ايام -

[مزمل محمد وداعة الله]

يا سلام يا دكتور والله رجعتا لي ايام جميلة من الزمن الجميل وذكرى لاصحاب عزاز جداً في زمن غافلنا فيه النسيان لتعود بعد كل هذه السنين وتصحي فينا رائع الذكريات
والله يا محمد خضر الواحد بتذكر كل الكلام القلتو دا وكانو حصل امس مش قبل اكتر من 15 سنة كبرنا وكبرت احزانا مش كدا ههههه
تتذكر الموقف بتاعي مع استاذ احمد النبال لما كُنا جايطين بين الحصتين وانا وابو سفيان حسين كُنا واقفين قدام السبورة وبنعمل في مسرحية ونحاكي الاساتذة قام استاذ النبال جاء ودخل من الشباك الوراء وقعد جنب المعز وسمع كل الحصل ونحنا ما حسينا بيهو لحدى ما خلصنا قام صفق لينا وقال لكن والله يا ناس مهدي فرقة الاصدقاء ما بتلحقكم مش كدا ؟ واخدنا انا وسفيان علقة جامدة ههههههههههههه
يديك العافية يا دكتور ولنا عودة بالتفصيل لمباريات الكرة في الميدان مع استاذ النقر والطيب عبد المحمود ...
تحياتي يا رائع
بالمناسبة تتذكر اسامة ( ابو بطانية ) ههههههههه

[ضياء الدين]

يامزمل انت من برتبيل الجزيزه ولابرتبيل دى فى سنار/انا ضياء الدين جديد فى المنتدى /وانا من الجزيره المدينه عرب ومقيم بالمملكه العربيه السعوديه الرياض......

[مزمل محمد وداعة الله]

ود منطقتي الغالي ضياء الدين
مرحب بيك حبابك الف واسف جداً على التاخر في الرد عليك ولك العتبى حتى ترضى
انا يا سيدي الفاضل من بورتبيل ريفي المدينة عرب يعني ود بلدك لكن سنار هي البيت الذي احتواني حينما ضاقت بي الدنيا ومنحتني سنار الاهل والاصدقاء ومنحتني التكوين الاكاديمي والاجتماعي فكان ارتباطي بها لا يقل عن ارتباطي ببورتبيل
التحية ليك يا ضياء وانا سعيد باني اشوف واحد من ابناء المدينة عرب معنا في منتدى سنار لنشكل هذا النسيج الرائع
تخريمة : انا اصدقائي في المدينة عرب هود بشير مهدي واحمد دفع الله العمدة ومحمد حسين اما عمي فهو ابراهيم العليقي والد ابوعاقلة ووليد ومعاوية ومحمد وكل ناس المدينة اهلي واصحابي
بس سؤال انت اسمك الكامل ضياء الدين منو ..؟
تحياتي ونلتقي ..

[مزمل محمد وداعة الله]

والله الواحد وحشتو البساطة واشتاق لونسة الناس البسطاء واشتاق للمة الجميلة وسط الناس الرائعيين ديل كلهم ...
اوعدكم اني اعود لاحياء هذا البوست من جديد بحكايات اكثر من رائعة فقط انتظروني
وحكايات البسطاء من عمق الواقع السوداني الجميل

[نور الصباح]

ونحن في انتظار البساطه والقلم الجميل ....
لك التحايا اخي مزمل صاحب بساطة الزمن الجميل

[مزمل محمد وداعة الله]

احبة البساطة في كل مكان رجعنا لحكايات البسطاء من جديد والليلة نحكي حكاية شخصية موجودة بينا في المجتمع السوداني وبنحتك بيها كل يوم شخصية نسائية طيبة وبسيطة لكن عندها مرض اسمو الفشخرة ، وطبعاً معني الفشخرة هو التباهي والتظاهر قدام الناس باشياء قد تكون موجودة في الانسان وقد تكون ما موجودة بغرض الظهور بمظهر اعلى من الجميع ...
نخش قرية ( الرجوبة ) قرية وادعة من قرى الريف السوداني مجتمعها مجتمع بسيط يعيش على الزراعة والتجارة والرعي ومعظم الناس في القرية اهل من قبيلة واحدة مع تداخل لبعض القبائل الاخري .. بطلة القصة هي التومة بت النفار شيخ الحلة وحكيمها
التومة مرة في الاربعين من عمرها ، طويلة ومليانة ولونها اصفر وشعرها اسود طويل وعاجبا شديد ، التومة متزوجة من ود عمها الطيب ود العوض وعندها منو تلاتة اولاد ولدين وبت .. وطبعاً لانها بت شيخ الحلة الكبيرة كانت عاشت حياة فيها دلع وعجن ولما كبرت كبر معاها احساس انها زولة مهمة وكل الانظار لازم تتوجه نحوها ، عرسها كان اجمل عرس في الحلة ابوها صرف على العرس مال كتير وجاب ليها احسن الاشياء للعرس من الاثاث لحدي الفنان الكبير
لما ولدت اول ولادة ليها الحلة كلها اتغدت في الضبائح اكتر من تورين ضبحوهم للسماية ودنيا وعالمين وخمج شديد ، كل دا طبعاً عشان اختنا التومة مرة بتحب الفشخرة والتباهي وقدر ما تكون في مجلس هي تنضم (( انا اختك يا حسن والله في سمايتي بولدي العوض الحلة كلها اكلت لحم والناس كلها اتبسطت تقول لي ناس فلانة وفلتكانة ))
طبعاً اللبس بتاع التومة غير كل اللبس التياب من اغلي التياب والدهب دا مالي اليدين والرقبة وكل ما تشوف ليها دهبة عند مرة في الحلة لازم بعد يومين تشتري احسن منها فشخرة سااااااااي
التومة بتحب النضمي الكتير عشان كدا عاملة ليها جلسة بتاعت جبنة يومية في بيتها عندها شجرة نيم كبيرة في الحوش ومعاها اختها الرضية وجارتا محاسن ونسوان افريق كلهن يتلمن بعد الفطور عند الجبنة حقت التومة ونضمي شديد وقطيعة وطبعاً التومة ست المجلس فشخرة بالطريقة الصاح وداك وداك وداك وانا والله عملتا وانا اختك يا الحسن وانا العندي شنو وانا بت منو ....
جنس فشخرة .. مرة عندها جارتا اسمها سكينة بت الرجوب مرة مسكينة لكن نضامة اها التومة كرهتا ليك عيشتا بالفشخرة دي قامت قالت لي صاحبتا البتول بت احمد والله اا البتول صاحبتك التومة دي وقعت فينا دودودودو وانا وانا والله التومة دي كان ربنا ساكت فتح عليها وخشت كلية الطب قسم اكان رحلتنا من الحلة ساااااااي البشوفا وهي ما بتعرف تكتب اسمها يقول عليها استاذة في الثانوي العالي ههههههههههههههههه...
طبعاً كتيرات من نسوان الحلة التومة مكرهاهن لكن ما بقدرن يفتحن خشمن لانو التومة مرة قاهرة وبتشاكل طوالي ، غايتو مجبورات يكتمن في حشاهن ساااااااااااااااااي ...
دي التومة الفشخارة شخصية موجودة وبكثرة في مجتمعاتنا السودانية البسيطة مش كدا ؟؟؟؟؟؟؟
اشوفكم بكرة مع شخصية تانية ..
اقعدو بالعافية
ودعتكم الله ..

[الطيب ادريس]

صاحب السماحة والسياحة الجميلة في ربوع البساطة أهلا بعودتك بعد غياب طال شوقنا له ..

أهلا أستاذ مزمل

ولي عودة بي مهلة .

[مزمل محمد وداعة الله]

يا ريس ، اهلاً بيك وبكل البسطاء من ابناء سنار الاحباء
سعيد جداً بهذا التواصل وفي انتظار عودتك بمهلة وبنجهز ليك الجبنة الما خمج ....

[Abosamer]

مزمل بعد ما تجهزوا الجبنة خلونا نشم القلية بس

[عبدالله الضوء البشير]

مشكور مزمل علي البساطة السوداني وعلي هذا السردالرايع .

[Abosamer]

البساطة البساطة يا عينى عالبساطة
للذكرى فقط
بالزمن الجميل

[عادل فوكس]

وكان ما جيت من زي ديل واسفاي وا ماساتي وا زّلي
اخى مزمل الرحمه على تلك الايام وذالك الشعب الاسطورى
النادر فى الكون ، وعظمه وكرم وتفرد الشعب السودانى يشهد بها
حتى العجم اهلى الخواجات البيض لانى خواجه اسود ههههههههههههههه
اذكر فى عام 96 فى بيريطانيا ركبت القطار من بورتسموث الى لندن
وبعد محطتين من بداية الرحله ركب عجوز خواجه والقطر فاضى جاء قعد
جنبى ، طبعا تصرف ذى ده مثير للانتباه فى اوروبا، وانا كنت اقراء فى
جريده اسمها( العربى) بعد فتره انتبهة له ونظره له فابتسم لى وقال لى
بالعربى( سلام ) فرديت عليه ما صدق سالنى من اين انت قلت له السودان فطار من
الفرح واخذ يكلمنى الجمله كلمه عربى واخرى انجليزى واكتشف انه بولندى صوفى مهوس
بالسودان وادهشنى بمعرفته لقبايل ا لسودان ، يقول لى قبيله كذاء لهم شلوخ افقيه والاخرى لهم
خطوط رأسيه ، كذالك عجوز انجليزيه اسمها لندا والكتير سوف احكى لكم قصصهم انشاء الله.

[عادل فوكس]

لكن يا اخ مزمل اتمنا الا تكون البساطه بمفهوم
جيرانا فى الشمال (اولاد بمبا) وماتت البساطه بعد
ما جات الانقاذ وجابتم يمسحوا ما فضل من بساطه

[مزمل محمد وداعة الله]

اخوي العزيز عادل فوكس لك التحايا على المداخلة وفي شوق شديد لنسمع منك السرد الجميل لحكاوي البسطاء الذين قابلتهم ، اما اولاد بمبا فكك منهم لانهم بيعاملوا السودانيين بالدونية البغيضة التي خلفها في عقولهم عهد الاستعمار والذي صور لهم ان السودانيين طبقة ادني منهم ( عبيد بالعربي الفصيح ) ولا زالوا يمارسون هذا المفهوم البغيض ولكن الايام دول وها نحن نعبر جسورهم ونرغمهم على احترامنا في كل المجالات حتى في الكورة وكدي امشي السودان شوف بتاعين العدة البلفوا في القرى السودانية كلهم من شمال الوادي
انا شاكر لك اخي عادل وفي انتظار قصصك الجميلة لنحي هذا البوست الرائع الذي احبه جداً ولي معه ذكريات فقد كان اول ما افتتحت به مواضيعي في منتديات سنار
لك التحية اخي عادل